ސްކޫލުތަކުގައި ދެ ޖިންސު މައްސުނި ނުކޮށް ކިޔަައިވައިދެެއްވުމަށް އެދި ވަޒީރަށް ސިޓީއެއް
ދިވެހިރާއްޖޭގެ ސްކޫލް މަދަރުސާތަކަކީ އިސްލާމީ އުޞޫލުތަކާ އެއްގޮތަށް ދަރިވަރުން ތަރުބިއްޔަތުކުރާ ތަންތަނަށް ހެދުމަށް ޓަކައި، އަންހެން އަދި ފިރިހެން ދަރިވަރުން މައްސުނި ނުވާނެހެން ކިޔަވައިދިނުމުގެ ނިޒާމު އިޞްލާޙުކޮށްދެއްވުމަށް ތަޢުލީމީ ވަޒީރު ޑރ. އިސްމާޢީލް ޝަފީޢުއަށް ޢިލްމުވެރިންގެ ގުޅުމުން އިލްތިމާސްކުރައްވައިފިއެވެ.
ޢިލްމުވެރިންގެ ފަރާތުން ޑރ. އިސްމާޢީލް ޝަފީޢުއަށް ފޮނުވި ސިޓީގައި ބުނީ، 2008 ވަނަ އަހަރާ ހަމައަށް ރާއްޖޭގެ ބޮޑެތި ސްކޫލްތަކުގައި އަންހެން އަދި ފިރިހެން ކުދިން ތިބީ ވީހާވެސް ބޮޑަކަށް ވަކިކުރެވިފައި ކަމަށެވެ.
ނަމަވެސް، 2008 ވަނަ އަހަރު އައި އައު ސަރުކާރުން ތަޢުލީމީ ދާއިރާ އިސްލާމީ އުޞޫލުތަކާއި ދިވެހީންގެ ޘަޤާފަތާ ބީރަށްޓެރި، ސެކިއުލަރ ފިކުރެއްގެ މައްޗަށް ބިނާކޮށް ބަދަލުތަކެއް ގެނެސްފައިވާ ކަމަށް ސިޓީގައި ބުނެފައިވެއެވެ.
މިއާއެކު އެ ސިޓީގައި ވަނީ ދާދިފަހުން އައްޑޫ ހައި ސްކޫލުގައި ހިނގައިދިޔަ ކަންކަމަށް އިޝާރާތްކޮށް، އެއީ ދެ ޖިންސު މައްސުނިކޮށް ކިޔަވައިދިނުމުގެ ސަބަބުން ކުރިމަތިވާ އަޚްލާޤީ ދަށުދަރަޖައިގެ ކަމެއް ކަމުގައި ސިފަކޮށްފައެވެ.
ޢިލްމުވެރިން އިތުރަށް ބުނި ގޮތުގައި، ދެ ޖިންސު މައްސުނި ކުރުމަކީ ދަރިވަރުންގެ އަޚްލާޤާއި ސުލޫކަށް އޭގެ ނޭދެވޭ އަސަރުކުރާ ކަމެކެވެ. އެކަމަށް ބާރުދޭ، ދުނިޔެވީ ގޮތުން ތަރައްޤީވެފައިވާ ބައެއް ޤައުމުތަކުގެ މުއައްސަސާތަކުން ހަދާފައިވާ ދިރާސާތަކަށް ސިޓީގައި އިޝާރާތްކޮށްފައިވެއެވެ. އޭގެ ތެރޭގައި ހަވަރޑް ޔުނިވަރސިޓީއާއި ބީބީސީ ފަދަ ބައިނަލްއަޤުވާމީ މުއައްސަސާތަކުގެ ދިރާސާތައް ހިމެނެއެވެ.
އެއާއެކު، ޢިލްމުވެރިންގެ ގުޅުމުންވަނީ، ދެ ޖިންސު ވަކިކޮށްގެން ކިޔަވައި ދިނުމަށް ދަލީލުކުރާ ކީރިތި ރަސޫލާ ﷺ ގެ ޒަމާނުގެ ބައެއް ޙާދިޘައް ވެސް ސިޓީގައި ބަޔާންކޮށްފައެވެ.
އެހެންކަމުން ސްކޫލްތަކުގެ ތަޢުލީމީ މާޙައުލަކީ ދެ ޖިންސު މައްސުނި ނުވާނެ ފަދަ މާޙައުލަކަށް ހެއްދެވުމަށްޓަކައި ކަމާގުޅޭ އުޞޫލުތައް އިޞްލާޙުކޮށްދެއްވުމަށް ޢިލްމުވެރިންވަނީ އެދިފައެވެ.
Advertisement
This content is created and paid for by advertisers and does not involve Voice Journalists
