އއ.ތޮއްޑޫ ކައުންސިލުން 2023 އަހަރުގެ އީދު ކުޅިވަރުތަކަށް ކަނޑައެޅި އަދަދަށްވުރެ އިތުރަށް ފައިސާ ދޫކުރި މައްސަލައެއް ފެންމަތިވެއްޖެއެވެ.

އޮޑިޓް އޮފީހުން ނެރެފައިވާ ތޮއްޑޫ ކައުންސިލްގެ 2023 ވަނަ އަހަރުގެ އޮޑިޓް ރިޕޯޓްގައިވަނީ ކައުންސިލްގެ މާލީ ބޮޑެތި މައްސަލަތަކެއް ފާހަގަކޮށްފައެވެ. އޭގެ ތެރޭގައި އެއަހަރުގެ އީދުކުޅިވަރުތަށް ބޭއްވުމަށް އިތުރަށް ހަރަދުކުރި މައްސަލަ ފާހަގަކޮށްލެވެއެވެ.

ރިޕޯޓްގައި ބުނީ އަޟްހާ އީދު ފާހަގަކުރުމަށް ތޮއްޑޫ ކައުންސިލުން ޖުމްލަ 719،742 ރުފިޔާ ހޭދަކޮށް، އަދި އުސޫލްތަކާ ހިލާފަށް އެކަމަށް ހޭދަކޮށްފައިވާކަން ފާހަގަކޮށްފައެވެ.

ކުލަގަދަކޮށް އީދު ފާހަގަކުރުމަށް މިއުޒިކް ޝޯއަކާއެކު އީދުގެ ހަރަކާތްތައް ހިންގަން ކުންފުންޏެއް ހޯދައި އެފަރާތާއެކު އެއްބަސްވުން ގާއިމްކުރީ 270،000 ރުފިޔާގެ އަގަކަށް އެމަސައްކަތް ކުރުމަށެވެ. ނަމަވެސް އީދު ފާހަގަކުރުމުގެ ކަންތައްތަކުގެ ތެރެއިން ބައެއް ކަންކަން ފެންވަރުދަށްކޮށް ކުރިއަށްގެންގޮސްފައިވާތީވެ އެފަރާތަށް ފައިސާ ދޫކޮށްފައިވަނީ އެއްބަސްވެފައިވާ އަގުގެ 25 އިންސައްތަ އުނިކުރުމަށްފަހު 202،500 ރުފިޔާއެވެ. ކައުންސިލް އިދާރާއި އެފަރާތާ ދެމެދު ކުރެވުނު އެއްބަސްވުމުގައި އިތުރު އެއްވެސް ފައިސާއެއް ދިނުމަށް އެއްބަސްވެފައި ނުވާއިރު، ކައުންސިލުން ފަހުން ވަނީ އީދު ފާހަގަކުރުމަށް އެކި ފަރާތްތަކަށް އެހީއަށްއެދި ސިޓީ ފޮނުވައިގެން ލިބުނު 210،000 ރުފިޔާވެސް އެފަރާތަށް ޖަމާކޮށްފައެވެ.

ތޮއްޑޫގައި 2023 ވަނަ އަހަަރު އީދު ފާހަގަކުރުމުގެ ކަންކަން ކުރިއަށްގެންދިއުމުގައި ހަރަދު ކުޑަކުރެވޭނެ ގޮތްތައް ބަލާފައިނުވާކަން ރިޕޯޓްގައި ވަނީ ފާހަގަކޮށްފައެވެ. އެގޮތުން ކައުންސިލުން އެ އަހަރުގެ އަޟްހާ އީދު ފާހަގަކުރުމަށް 719،742 ރުފިޔާ ހޭދަކުރިއިރު އޭގެ ތެރެއިން 509،742 ރުފިޔާ އަކީ ކައުންސިލް ބަޖެޓުން ކޮށްފައިވާ ހަރަދެވެ. އެއީ އެއަހަރުގެ މުސާރަ ފިޔަވައި ބްލޮކް ގްރާންޓާއި ކައުންސިލްގެ އާމްދަނީން ކޮށްފައިވާ ޚަރަދުގެ 8.4 އިންސައްތަކަމަށް އޮޑިތް ރިޕޯޓްގައި ވަނީ ފާހަގަކޮށްފައެވެ.

އޮޑިޓް ރިޕޯޓްގައި އޮޑިޓަރ ޖެނެރަލް ދެއްވި ލަފާގައި ވަނީ، އީދު ފާހަގަކުރުމަށް ހަވާލުކޮށްފައިވާ ފަރާތަށް ދީފައިވާ 210،000 ރުފިޔާ އަނބުރާ ހޯދުމަށްފަހު ކައުންސިލްގެ އާމްދަނީއަށް ޖަމާކުރުމަށް އެދިފައެވެ.