ނިކްލަސް މަޑޫރޯ ވަގަށްނެގުމުގެ އޮޕަރޭޝަނުގައި އެމެރިކާގެ ސިފައިން މަޑޫރޯގެ ސެކިއުރެޓީ ޓީމްގައި ހިމެނޭ ގިނަ އަދަދެއްގެ އޮފިސަރުންތަކެއް މަރާލާފައިވާކަމަށް ވެނެޒުއެލާގެ ޑިފެންސް މިނިސްޓަރު ވްލަޑިމިއާ ޕެދްރީނޯ ހާމަކޮށްފިއެވެ.

ވެނެޒުއެލާގެ ޤައުމީޓީވީއަށް ދެއްވި ބަސްދީގަތުމެއްގައި ޕެދްރީނޯ ވިދާޅުވީ ހާއިނުންގެ ބަޔަކު އެޤައުމަށް އަރައި ރައީސް ވަގަށް ނަގައިގެން ގެންދިޔައިރު، ރައީސްގެ ސެކިއުރެޓީ ޓީމްގައި ހިމެނޭ ގިނަ އަދަދެއްގެ އޮފިސަރުން މަރާލާފައިވާކަމަށެވެ. މީގެ އިތުރުން ދިން ވައިގެ ހަމަލާތަކުގައި ކުށެއްނެތް ގިނަ އަދަދެއްގެ އާއްމު ރައްޔިތުންވެސް އެމެރިކާއިން މަރާލާފައިވާކަން އޭނާ ފާހަގަކުރެއްވިއެވެ.

ރައީސް މަޑޫރޯގެ ސެކިއުރެޓީ ފޯސްގެ އިތުރުން އާއްމުންގެ ގިނަ އަދަދެއްގެ ބަޔަކު މެރިނަމަވެސް، އެމީހުންގެ އަދަދެއް ވިދާޅެއް ނުވެއެވެ. ފެދްރީނޯ ވިދާޅުވީ ވެނެޒުއެލާގެ ސިފައިން ދަނީ އެޤައުމުގެ އެކި ސަރަހައްދުތަކުގައި ހަރަކާތްތެރިވަމުން ކަމަށާއި، ޤައުމުގެ ސިޔާދަތާއި އިސްތިގްލާލު ދެމެހެއްޓުމަކީ ސިފައިންގެ އެންމެ އިސް ވާޖިބުކަމަށެވެ. 

އެމެރިކާގެ ރައީސް ޑޮނާލްޑް ޓްރަމްޕްގެ އަމުރުފުޅަށް ވެނެޒުއެލާގެ ރައީސް ވަގަށް ނަގައިގެން އެޤައުމަށް ގެންގޮސްފައިވާއިރު، ޓްރަމްޕް ވަނީ ވެނެޒުއެލާ ހަމަމަގަށް އެޅެންދެން އެޤައުމުގެ ކަންކަމަށް ބާރުފޯރުވާނޭކަމަށް ވިދާޅުވެފައެވެ. އެގޮތުން ތެލުގެ އޮޕަރޭޝަންތަކާއި އެނޫންވެސް ކަންކަން ދެން ކުރިއަށްގެންދާނީ އެމެރިކާގެ ބައިވެރިވުމާއެކުގައިކަން ޓްރަމްޕް ވަނީ ވިދާޅުވެފައެވެ.