ރާއްޖޭގެ ސީނިއާ ޤައުމީ ފުޓްބޯޅަ ޓީމުގެ ހެޑް ކޯޗަކަށް ހަންގޭރީއަށް ނިސްބަތްވާ އިސްޓަވާން އުރުބާނީ އަނެއްކާވެސް ހަމަޖައްސައިފިއެވެ.
އެފްއޭއެމުން ބޭއްވި އެކްސްކޯ ބައްދަލުވުމުގައި މިއަދު ވަނީ ޤައުމީޓީމްގެ ޓެކްނިކަލް ޑައިރެކްޓަރެއްގެ އިތުރުން ހެޑް ކޯޗެއްގެ ގޮތުގައި އުރުބާނީ އައްޔަނުކުރުމަށް ނިންމާފައެވެ.
އުރުބާނީ ވަނީ މީގެކުރިން ދެފަހަރެއްގެ މަތިން ޤައުމީ ޓީމްގެ ކޯޗްކަމުގެ ޒިންމާ އަދާކޮށްފައެވެ. އެގޮތުން އެންމެ ފުރަތަމަ ޓީމާ ހަވާލުވީ، 2009 ވަނަ އަހަރުގެ ތެރޭގައެވެ. އުރުބާނީގެ އިރުޝާދުގެ ދަށުން އެއަހަރު ސާފް ޗެމްޕިއަންޝިޕް ފައިނަލަށް ރާއްޖެ ގެންގޮސްދިންއިރު، 2012 ވަނަ އަހަރު ވަނީ ލަންކާގައި ބޭއްވި އިންވިޓޭޝަނަލް މުބާރާތުގެ ޗެމްޕިއަންކަން ހޯދާފައެވެ.
އުރުބާނީގެ އިރުޝާދުގެ ދަށުން ރާއްޖޭގެ ޤައުމީޓީމްގެ ކުޅުމުގެ ސްޓައިލް ތަފާތުކޮށް ފެނިގެންދިޔައިރު، އޭނާ ވަނީ ހަންގޭރީގެ އިތުރުން އެމެރިކާގެ ބައެއް ޓީމްތަކަށްވެސް ކޯޗްކަންކޮށްދީފައެވެ. ޤައުމީ ޓީމްގެ ކޯޗަކަށް އުރުބާނީ އައްޔަނުކުރަން ނިންމިނަމަވެސް އޭނާ ރާއްޖެ އަންނާނޭ ތާރީހެއް އެފްއޭއެމަކުން އަދި ނުބުނެއެވެ.
Advertisement
This content is created and paid for by advertisers and does not involve Voice Journalists
