ލުބުނާނުގެ 2 ސަރަހައްދަކަށް އަމާޒުކޮށް، އިސްރާއީލުގެ އަސްކަރިއްޔާއިން ބޮމުގެ ހަމަލާއެއް ދީފިއެވެ. 

އިސްރާއީލުން ހަމަލާދީފައިވަނީ ލުބުނާނުގެ އިރުމައްޗާއި ދެކުނުގެ ހަތަރު ރަށަކަށް ⁠އަމާޒުކޮށެވެ. 

މީގެ ކުރިން އިސްރާއީލު ސިފައިންގެ ތަރުޖަމާނަކު ވަނީ އެ ސަރަހައްދަށް ހަމަލާތައް ދިނުމަށް ރާވާފައިވާ ކަމަށް ބުނެފައެވެ.

އެހެންކަމުން ލުބުނާނުގައި އެ ޖަމާއަތްތަކުގެ މީހުން ދިރިއުޅެމުންދާ ސަރަހައްދުތަކުން ބައެއް އާއިލާތައް ގެދޮރު ދޫކޮށް ސަލާމަތްތެރިކަން ހޯދުމަށް އެހްނ ސަރަހައްދުތަކަށް ގޮސްފައިވެއެވެ. އަދި އިސްރާއީލުގެ މި އިންޒާރާއިއެކު  ލުބުނާނުގައި އެމްބިއުލާންސްތަކާއި އާއި ފަޔާ ޓްރަކްތައް ތައްޔާރީހާލަތަށް ގެނެސްފައިވާކަމަށް އެގައުމުގެ ސަލާމަތީ ބާރުތަކުން މައުލުމާތުދީފައިވެއެވެ. 

އިސްރާއީލުން ލުބުނާނަށް އެންމެ ފަހުގެ ހަމަލާތައް ދީފައިވަނީ އެގައުމުގެ ދެކުނުގެ ބިންޓް ޖްބޭލް ޓައުންގެ އުތުރުގައި އޮންނަ އައިން އަލް މިޒްރާބް ސަރަހައްދުގައި އޮތް އުޅާނދަކަށެވެ. މިއީ އެގައުމުގެ ބޯޑަރާއި 10 ކިލޯމީޓަރު (6 މޭލު) ދުރުން ދިން ހަމަލާއެކެވެ. މި ހަމަލާގައި ލުބުނާނުގެ 2 މީހަކު ވަނީ މަރުވެސްވެފައެވެ. އިސްރާއީލުގެ އަސްކަރިއްޔާއިން މި ހަމަލާއާއި ގުޅުވާ ބުނީ އެއީ ވެސް ހިޒްބުاللهގެ މެމްބަރަކަށް އަމާޒުކޮށް ދިން ހަމަލާއެއް ކަމަށެވެ.

ލުބުނާނުގެ ދެކުނުގެ އަވަށެއް ކަމަށްވާ ބްރައިކޭގައި އިއްޔެގެ ވަގުތެއްގައި ވެސް ކާރަކަށް ޑްރޯން ހަމަލާއެއް ދިނުމުން ދެ މީހަކު ޒަޚަމްވެފައިވާ ކަމަށް ލުބުނާނުގެ ހެލްތު މިނިސްޓްރީން ވަނީ ބުނެފައެވެ. އެއާއެކު އިސްރާއީލުގެ އަސްކަރިއްޔާއިން ބުނީ މި ހަމަލާވެސް އަމާޒުކޮށްފައިވަނީ ހިޒްބުاللهގެ ދެ މެންބަރަކަށް ކަމަށެވެ.

2024 ވަނަ އަހަރު އެމެރިކާގެ މެދުވެރިވެގެން ހަނގުރާމަ ހުއްޓާލި ނަމަވެސް އިސްރާއީލުން ވަނީ އެގައުމުގެ ސިފައިންނާއި ހިޒްބުالله އާ ދެމެދު ގާއިމްކުރި މި އެއްބަސްވުމާއި ހިލާފުވެ، އަދިވެސް ހަމަލާތައް ދެމުންނެވެ.