އެފްރިކާގެ ޤައުމުތަކުގެ މެދުގައި ކުޅެވޭ އެންމެ ޝަރަފްވެރި މުބާރާތް ކަމަށްވާ އެފްރިކަން ކަޕް އޮފް ނޭޝަންސް (އެފްކޮން) ގެ ކުއާޓާ ފައިނަލުގެ ޖާގައެއް މިސްރު ހޯދައިފިއެވެ.

މުބާރާތުގެ ޖާގައެއް މިސްރު ހޯދާފައިވަނީ އެފްރިކާއަށް ނިސްބަތްވާ ކުޑަ ޤައުމެއްކަމަށްވާ ބެނިންއާ ދެކޮޅަށް ކުޅުނުމެޗް ކާމިޔާބުކޮށްގެންނެވެ. މިމެޗްގެ ފުރިހަމަ ވަގުތުގެ ކުޅުން ނިމުނުއިރު އެކެއް އެކެއްގެ ނަތީޖާއިން ދެޓީމް އެއްވަރުވުމުން ނަތީޖާ ނެރެފައިވަނީ އިތުރުވަގުތުގެ ކުޅުމުގެ ތެރޭގައެވެ. 

މެޗްގައި އެންމެ ފުރަތަމަ ލަނޑެއް ޖަހައި ކުރިހޯދީ، މިސްރުންނެވެ. އެއީ ފުރަތަމަ ހާފްގެ 29 ވަނަ މިނެޓް ތެރޭގައި މަރްވީން އަތިއާ ކާމިޔާބުކޮށްދިން ލަނޑުންނެވެ. މެޗުން މިސްރު މޮޅުވަމުން ދަނިކޮށް ބެނިންގެ ޖޮޑެލް ޑޯސޫ ވަނީ 88 ވަނަ މިނެޓް ތެރޭގައި ލަނޑެއް ޖަހައި މެޗް އެއްވަރުކޮށްފައެވެ.

ފޯރިގަދަ ކުޅުމެއް ފެނިގެންދިޔަ މި މެޗްގައި ނަތީޖާ ނެރުމަށް ކުޅުނު އިތުރުވަގުތުގައިވެސް އެންމެ ފުރަތަމަ ލަނޑެއް ޖަހައި ކުރި ހޯދީ މިސްރުންނެވެ. އެއީ 97 ވަނަ މިނެޓް ތެރޭގައި އަތިއާ ތަނަވަސްކޮށްދިން ފުރުސަތެއްގައި ޔާސިރް އިބްރާހީމް ކާމިޔާބުކޮށްދިން ލަނޑުންނެވެ. މެޗުން މިސްރު ލީޑް ނަގާފައިވަނިކޮށް، މޮޅުވުމުގެ އުއްމީދު އިތުރަށް ޔަގީންވެގެން ދިޔައީ ކެޕްޓަން މުހައްމަދު ސަލާ ކާމިޔާބުކޮށްދިން ލަނޑުންނެވެ.

ކުއާޓާފައިނަލުގައި މިސްރު ބައްދަލުކުރާ ޓީމެއް އެނގިގެންދާނީ، އައިވަރީ ކޯސްޓާއި ބުރްކިނަފާސޯ ބައްދަލުކުރާ މެޗުންނެވެ.