ފަލަސްޠީނުގެ ޣައްޒާގެ ރައްޔިތުންގެ ޙައްޤުތަކަށް ވަކާލާތުކޮށް، އިންސާނީ އެހީތެރިކަން ފޯރުކޮށްދިނުމަށް ބައިނަލްއަޤުވާމީ ފެންވަރުގައި މަސައްކަތްކުރާ 'ގްލޯބަލް ސުމޫދު ފްލޮޓިލާ' (ޖީ.އެސް.އެފް) ގެ މަތީ ފަންތީގެ ވަފުދެއް ރާއްޖެ އަތުވެއްޖެއެވެ.
މި މަހުގެ 6 އިން 8 އަށް ކުރިއަށްދާ މި ދަތުރުގެ ވަފުދުގައި ޖީ.އެސް.އެފް ގެ ސްޓިއަރިންގ ކޮމިޓީގެ މެންބަރުން ކަމަށްވާ ތިއާގޯ އަވިލާ، ސައިފް އަބޫކޭޝެކް، ނާދިރު އަލް-ނޫރީ އަދި ކްލިއޮނިކީ އެލެކްސޮޕޫލޫ ހިމެނިވަޑައިގަންނަވައެވެ.
ޖީ.އެސް.އެފް އަކީ އިސްރާއީލުން ޣައްޒާއަށް އަޅާފައިވާ ޣައިރުޤާނޫނީ ބަންދާ ދެކޮޅަށް އަޑުއުފުލައި، އެ ސަރަޙައްދުގެ ރައްޔިތުންނަށް އިންސާނީ އެހީ ފޯރުކޮށްދިނުމަށް މަސައްކަތްކުރާ މިނިވަން އިއްތިޙާދެކެވެ.
މި ދަތުރުގެ ތެރެއިން، މި ވަފުދުގެ ބޭފުޅުން ސަރުކާރުގެ މަތީ ފަންތީގެ ވެރިންނާއި، މަދަނީ ޖަމުޢިއްޔާތަކުގެ މަންދޫބުންނާއި، ކަމާގުޅޭ އެކި އިދާރާތަކުގެ އިސް ބޭފުޅުންނާ ބައްދަލުކުރެއްވުމަށް ވަނީ ހަމަޖެހިފައެވެ.
މި ބައްދަލުވުންތަކުގައި ޖީ.އެސް.އެފް ގެ މަޤްޞަދުތަކާއި، ފަލަސްޠީނުގެ ޙައްޤުގައި ބައިނަލްއަޤުވާމީ މައިދާނުގައި ކުރަމުންދާ މަސައްކަތްތަކުގެ ތަޖުރިބާ ޙިއްޞާކުރުމުގެ އިތުރުން، ކުރިއަށް ރޭވިފައިހުރި ކަންކަމާމެދު މެދު މަޝްވަރާކުރެވޭނެއެވެ.
އިންޓަރނޭޝަނަލް އެއިޑް ކެމްޕޭން (އައި.އޭ.ސީ) އިން މަޢުލޫމާތު ދޭ ގޮތުގައި، މި ދަތުރަކީ ބައިނަލްއަޤުވާމީ މައިދާނުގައި ރާއްޖެއިން ކުރަމުންދާ އިންސާނީ އެހީތެރިކަމުގެ މަސައްކަތްތަކާއި ގުޅިފައިވާ މުހިންމު ދަތުރެކެވެ.
އަދި މި ދަތުރުގެ މައިގަނޑު އެއް ބޭނުމަކީ ޖީ.އެސް.އެފް ފަދަ ބައިނަލްއަޤުވާމީ އިދާރާތަކުން ކުރިއަށްގެންދާ އިންސާނީ ޙަރަކާތްތަކުގައި ދިވެހިރާއްޖޭގެ ބައިވެރިވުން މިހާރަށްވުރެ ވަރުގަދަކުރުމެވެ.
މިދިޔަ އަހަރުގެ ޖުލައި މަހުގެ މެދުތެރޭގައި ފެށި މި ޙަރަކާތަކީ، ސުލްޙަވެރިކަމާއެކު ޣައްޒާގެ އިންސާނީ ކާރިސާއަށް ބައިނަލްއަޤުވާމީ ސަމާލުކަން ހޯދުމަށް ކުރިއަށްގެންދާ މަސައްކަތެކެވެ. މި ޙަރަކާތުގެ މައިގަނޑު އަމާޒަކީ ފަލަސްޠީނުގެ ރައްޔިތުންނަށް އިންސާނީ އެހީ ފޯރުކޮށްދިނުމާއެކު، އެމީހުންގެ އަމިއްލަ ގޮނޑުދޮށްތަކާއި ވަޞީލަތްތައް ބޭނުންކޮށް، އިޙްތިރާމާއި ކަރާމާތާއެކު ދިރިއުޅުމުގެ ޙައްޤު ހޯދައިދިނުމަށް ވަކާލާތުކުރުމެވެ.
Advertisement
This content is created and paid for by advertisers and does not involve Voice Journalists
