ފީފާއިން އެފްއޭއެމަށް ދިން 1.2 މިލިއަން ޑޮލަރު އުސޫލްތަކާ ހިލާފަށް އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް, އަމިއްލަ ކަންކަމުގައި ބޭނުންކުރުމާ ގުޅިގެން އޭނާގެ މައްޗަށް އުފުލި މަނީ ލޯންޑަރީންގެ ދައުވާ ސާބިތުވެ 23 އަހަރަށް ޖަލަށްލައި 44.7 މިލިއަން ރުފިޔާ އިން ޖޫރިމަނާ ކުރުމަށް ކްރިމިނަލް ކޯޓުން މިއަދު ހުކުމްކޮށްފި އެވެ.

ފުޓްބޯލް އެސޯސިއޭޝަން އޮފް މޯލްޑިވްސްއަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ހިޔާނާތްތެރިވެ، އިތުރު ކުށުގެ އަމަލުތައް ހިންގާކަމަށް ތުހުމަތުކުރެވޭ މައްސަލައިގައި އުފުލި ޖިނާއީ ދެ ދައުވާ ވެސް ކުރީން ސާބިތުވެފައިވާ ބައްސާމަށް މިއަދު ހުކުމް އިއްވީ ފީފާއިން އެފްއޭއެމަށް ދިން 1.2 މިލިއަން ޑޮލަރު އުސޫލްތަކާ ހިލާފަށް ބައްސާމް އަމިއްލަ ކަންކަމުގައި ބޭނުންކޮށްފައިވާތީ އެވެ.

އެ މައްސަލާގައި ބަައްސާމްގެ މައްޗަށް ދެ ދައުވާއެއް އުފުލި އެވެ. އެއީ ހިޔާނާތުގެ ދައުވާ އާއި މަނީ ލޯންޑަރީންގެ ދައުވާ އެވެ. އާއި މި ދެ ދައުވާވެސް ސާބިތުވާ ކަމަށް ވަނީ ކަނޑައަޅާފަ އެވެ.

އަދި އެ މައްސަލާގައި އަދަބު ކަނޑައެޅުމަށް މިއަދު ބޭއްވި އަޑުއެހުމުގައި ވަނީ މި ދެ ދައުވާއަށް 23 އަހަރުގެ ޖަލު ހުކުމެއްް އިއްވާފަ އެވެ. އެއީ ހިޔާނާތުގެ ދައުވާއަށް 8 އަހަރުގެ ޖަލު ހުކުމެއް އަދި މަނީ ލޯންޑަރީންގެ ދައުވާއަށް 15 އަހަރުގެ ޖަލު ހުކުމެކެވެ. މި ދެ ހުކުމް އިއްވަމުން ގާޒީ ވަނީ މިއީ އެ ކުށަށް ދެވޭނެ އެންމެ ބޮޑު އަދަބުކަން ފާހަގަ ކުރައްވާފަ އެވެ.