ދެކުނު ޗައިނާ ކަނޑުގެ މައްސަލައިގައި ޗައިނާގެ ޑްރާމާއެއް ވިއެޓްނާމްގެ ނެޓްފްލިކްސްއިން އުނިކޮށްފި

ދެކުނު ޗައިނާ ކަނޑުގެ މިލްކުވެރިކަމާ ގުޅުން ހުރި، ޚިޔާލުތަފާތުވެފައިވާ މެޕެއް ހިމެނޭތީ، ވިއެޓްނާމް ސަރުކާރުގެ އެދުމުގެ މަތިން ޗައިނާގެ މަޝްހޫރު ޑްރާމާ ސީރީޒްއެއް ނެޓްފްލިކްސްއިން އެ ޤައުމުގައި ދެއްކުން ހުއްޓާލައިފިއެވެ.

ހަތާވީސް އެޕިސޯޑުގެ މައްޗަށް އެކުލެވޭ ރޮމޭންޓިކް ޑްރާމާ "ޝައިން އޮން މީ" އުނިކުރީ، އޭގައި ޗައިނާގެ ނައިން-ޑޭޝް ލައިން ހިމެނޭ މެޕެއް ދައްކާތީއެވެ. ވިއެޓްނާމުން ބުނާ ގޮތުގައި އެ މެޕަކީ ކަނޑައެޅިގެން ދޮގު މައުލޫމާތު ހިމެނޭ އަދި އެ ޤައުމުގެ އިސްތިޤްލާލަށް އަރައިގަންނަ މެޕެކެވެ.

މި ޑްރާމާގެ 25 ވަނަ އެޕިސޯޑުގައި ޗައިނާގެ އިއާދަކުރަނިވި ހަތަކަތައިގެ ދާއިރާއާއި ބެހޭ ގޮތުން ދޭ ލެކްޗަރެއްގެ ތެރެއިން، ދެކުނު ޗައިނާ ކަނޑުގެ ބޮޑު ބަޔަކީ ޗައިނާގެ ތަނެއްގެ ގޮތުގައި ދައްކުވައިދޭ މެޕެއް ފެނެއެވެ. ވިއެޓްނާމްގެ ކަލްޗަރ މިނިސްޓްރީން ޖެނުއަރީ 3 ވަނަ ދުވަހު ނެޓްފްލިކްސްއަށް އެންގީ 24 ގަޑިއިރު ތެރޭގައި އެ ސީރީޒް އުނިކުރުމަށެވެ. މި ސީރީޒްއަކީ ވިއެޓްނާމްގެ އިތުރުން ސިންގަޕޫރާއި ތައިވާނުގައި ވެސް ނެޓްފްލިކްސްގެ ގަދަ 10 އެއްގައި ހިމެނުނު މަގުބޫލު ޝޯއެކެވެ.

ދެކުނު ޗައިނާ ކަނޑުގެ މިލްކުވެރިކަމަށް ޗައިނާއިން ކުރާ ދަޢުވާތަކަށް ވިއެޓްނާމްގެ އިތުރުން ފިލިޕީންސް، ތައިވާން، މެލޭޝިއާ އަދި ބުރުނާއީން ވެސް ދެކޮޅު ހަދައެވެ. 2016 ވަނަ އަހަރު ދަ ހޭގްގެ އިންޓަނޭޝަނަލް ޓްރައިބިއުނަލުން ވަނީ ޗައިނާގެ މި ދަޢުވާތަކާ ދެކޮޅަށް ހުކުމް ކޮށްފައެވެ. ނަމަވެސް ޗައިނާއިން އެ ހުކުމް ގަބޫލެއް ނުކުރެއެވެ.

ޗައިނާގެ ސަރުކާރު ނޫސް "ގްލޯބަލް ޓައިމްސް" އިން ބުނެފައިވަނީ މުނިފޫހިފިލުވުމުގެ ކަންކަމާއި ކަނޑުގެ މައްސަލަ ވަކިކުރަން ޖެހޭނެ ކަމަށެވެ.