އެންމެންނަށް ނުރައްކާވާ މިންވަރަށް މެދުރާއްޖެތެރެއާއި އުތުރަށް މިއަދު ވެސް ވައި ނުސާފު ކަމަށް އެއާ ކޮލިޓީ އިންޑެކްސް މޮނިޓާތަކުން ދައްކައިފި އެވެ.
"އައިކިއު އެއާ" ގެ މައުލޫމާތުތަކަށް ބަލާއިރު، ވައިގައި ހިމެނޭ "ފައިން ޕާޓިކިއުލޭޓް މެޓާ" (ޕީއެމް2.5) ގެ މިންވަރު މިހާރު ހުރީ ކޮންމެ ކިއުބިކް މީޓަރެއްގައި 43.8 މައިކްރޯ ގްރާމްގައެވެ. މިއީ ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ރައްކާތެރިކަމަށް ކަނޑައަޅާފައިވާ އެންމެ ދަށް މިންވަރަށްވުރެ 8.8 މަތީ އަދަދެކެވެ.
ކޮންމެ އަހަރެއްގެވެސް އިރުވައިމޫސުން ފެށޭ ދުވަސްކޮޅާ ދިމާވާއިރު، ވައިނުސާފުވެ ދުރު ފެންނަ ނިސްބަތް ވަރަށްބޮޑަށް ދަށްވެގެން ދެއެވެ.
އެޗްޕީއޭއިން ވަނީ ވައިނުސާފްވުމުން ލިބިދާނޭ ގެއްލުންތަކުން ސަލާމަތްވުމަށް ދީފައިވާ އިރުޝާދުތަކަށް އަމަލުކުރުމަށް އިލްތިމާސްކޮށްފައެވެ.
އެގޮތުން މިވަރަށް ވައިނުސާފުވެއްޖެނަމަ ނޭވާލާ ނިޒާމުގެ މައްސަލަތައް ޖެހުމުގެ ފުރުސަތު ބޮޑުކަން ފާހަގަކުރަމުން އެޗްޕީއޭއިން ބުނީ، މި ހާލަތަށް ވައިނުސާފުވެއްޖެނަމަ ނާޒުކު ހާލަތުގައިވާ ފަރާތްތަކުން ބޭރަށްނިކުމެ އުޅުމުން ދުރުވާން ޖެހޭކަމަށެވެ.
މީގެ އިތުރުން ނޭވާލާ ނިޒާމުގެ މައްސަލަތައް ހުންނަ މީހުން ބޭރަށްނިކުމެ ކަސްރަތުކުރުމާއި ކުޅިވަރުކުޅުން ފަދަ ކަންކަން މަޑުޖައްސާލަން ޖެހެއެވެ.
އަދި ނޭވާލާ ނިޒާމުގެ މައްސަލަ ހުންނަ މީހުން ގެއިން ބޭރަށް ނިކުމެ އުޅުމުގައި މާސްކު އަޅައިގެން އުޅުމަށް އެޗްޕީއޭއިން އެދެއެވެ.
Advertisement
This content is created and paid for by advertisers and does not involve Voice Journalists
