އުމްރާގެ އަޅުކަމުގައި އުޅެނިކޮށް ދެ ދިވެހީން ނިޔާވެފައިވާ ކަމަށާ އެ މީހުންގެ ޖަނާޒާގެ ކަންތައްތައްވެސް ވަނީ ފުރިހަމަ ކޮށްފައި ކަމަށް އިސްލާމީ ކަންތައްތަކާއި ބެހޭ ވުޒާރާ އިން ބުނެފި އެވެ.
ވަރަށް ގިނަ ބަޔަކު މި ބަންދާއި ދިމާކޮށް އުމްރާގެ އަޅުކަމަށް މައްކާއަށް ދިޔަ އެވެ. ސަރުކާރުން ލަފާކުރާ ގޮތުގައި އަށެއްކަ ހާސް މީހުން އުމްރާގެ އަޅުކަން އަދާކުރުމަށް ވަނީ ގޮސްފަ އެވެ.
އިސްލާމީ ކަންތައްތަކާއި ބެހޭ ވުޒާރާ އިން ބުނި ގޮތުގައި އެ މީހުންގެ ތެރެއިން ދެ މީހަކު ނިޔާވި އެވެ. އެއީ މ. ސާނިޔާ, އިބްރާހިމް ރަޝީދު (ވައިކަރަދޫ ރަޝީދު) އާއި މ. ސައްކެޔޮމާގެ މުޙައްމަދު އިމްތިޔާޒް (އިންތި) އެވެ. އެ ދެ ބޭފުޅުންގެ ޖަނާޒާގެ ކަންތައްތައް ވަނީ ފުރިހަމަ ކޮށްފައި އެވެ. މިއީ ސަފާ ގުރޫޕްއިން ޢުމްރާގެ އަޅުކަމަށް ދިޔަ ދެ ބޭފުޅުންނެވެ.
މީގެ ތެރެއިން ވައިކަރަދޫ ރަޝީދަކީ ވަރަށް ބޮޑު ހިދުމަތްތެރި އެކެވެ. ވަރަށް ގިނަ ދުވަސްތަކެއް ވަންދެން އޮޑިޓް އޮފީހާއި ފިނޭންސް މިނިސްޓްރީގައި މަަސައްކަތް ކުރެއްވި އެވެ. އެއީ އޮޑިޓާއި ގުޅޭ ކަންކަމުގައި ވަރަށް ތަޖުރިބާކާރު ބޭފުޅެކެވެ.
މައުލޫމާތު އެނގޭ ބައެއް މީހުން ބުނި ގޮތުގައި ރަޝީދު ވަނީ ދެ އުމްރާ ކޮށްފަ އެވެ. އަދި ނިޔާވީ ތިންވަނަ އުމްރާއަކަށް އިހްރާމް އަޅައިގެން އަޅުކަމަށް ދާން ތައްޔާރުވެފައި ވަނިކޮށެވެ.
އިމްތިޔާޒް ވެސް ނިޔާވީ އުމްރާގެ އަޅުކަމަށް ފަހު އެވެ. އޭނާ ނިޔާވީ ހާޓްއެޓޭކެއް ޖެހި ކުއްލި ގޮތަކަށެވެ.
މީގެ އިތުރުން އުމްރާއަށް ދިޔަ ދިވެއްސަކު ހާލު ދެރަވެ މިހާރު އޮތީ އެޑްމިޓްކޮށްފަ އެވެ. އޭނާ މާލެ ގެނައުމުގެ މަސައްކަތް އާއިލާއާ ގުޅިގެން ދަނީ ކުރަމުންނެވެ. އިސްލާމީ ކަންތައްތަކާއި ބެހޭ ވުޒާރާ އިން ބުނި ގޮތުގައި މި މަހުގެ 10 ވަނަ ދުވަހު އެމީހާ ރާއްޖެ ގެންނާނެ އެވެ.
Advertisement
This content is created and paid for by advertisers and does not involve Voice Journalists
