ދަރުމަވަންތަ ހޮސްޕިޓަލްގެ ފާޓިލިޓީ ސެންޓަރުން އައިވީއެފް މެދުވެރިކޮށް ފުރަތަމަ ފަހަރަށް ކާމިޔާބުކަމާއެކު ކުއްޖަކު އުފަންވެއްޖެކަމަށް އެ ހޮސްޕިޓަލުން ހާމަކޮށްފިއެވެ.

މިކަމާ ގުޅޭގޮތުން އައިޖީއެމްއެޗުން ނެރުނު ބަޔާނެއްގައި ބުނީ، ނެޝަނަލް ފާޓިލިޓީ ސެންޓަރުން ފުރަތަމަ ފަހަރަށް އައިވީއެފް މެދުވެރިކޮށް ކުއްޖަކު އުފަންވެފައިވާކަމަށާއި، މައިމީހާ އާއި ތުއްތު ކުއްޖާގެ ހާލުވެސް ރަނގަޅު ކަމަށެވެ. މިއީ ތާރީހީ ކާމިޔާބެއްކަން ފާހަގަކުރަމުން އައިޖީއެމްއެޗުން ބުނީ، މިއީ މި ނިޒާމު މެދުވެރިކޮށް ދަރިން ހޯދަން ބޭނުންވެފައިވާ މީހުންނަށް ލިބިގެންދިޔަ ވަރަށްބޮޑު އުއްމީދަކާއި ހިތްހަމަ ޖެހުމެއްކަމަށެވެ. 

މިކަމާ ގުޅިގެން ދަރުމަވަންތަ ހޮސްޕިޓަލްގެ ސީއީއޯ އަބްދުއްރައްޒާގު ހަލީމް ވިދާޅުވީ، މި ތާރީޚީ ކާމިޔާބީއަކީ ރާއްޖޭގައި ދަރިމައިވުމުގެ ޞިއްޙަތާގުޅޭ ފަރުވާ ހޯދަމުންދާ އާއިލާތަކަށް ލިބުނު އުއްމީދެއްކަމަށެވެ. އޭނާ ވިދާޅުވީ އައިވީއެފް ޙިދުމަތް ހޯދުމަށް ރާއްޖެއިން ބޭރުގައި ގިނަ ދުވަސްތަކެއް ހޭދަކުރަންޖެހުމަކީ، މާލީ ގޮތުންނާއި ނަފްސާނީ ގޮތުން ދިވެހި އާއިލާތަކަށް އުފުލަމުންދިޔަ ބޮޑު ތަކުލީފެއްކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް، ނެޝަނަލް ފާޓިލިޓީ ސެންޓަރެއް ހުޅުވިގެން ގޮސްފައިވަނީ 2024 ވަނަ އަހަރުގެ ނޮވެމްބަރުމަހުގެ 15 ވަނަ ދުވަހުއެވެ. ރައްޒާގް ވިދާޅުވީ ނެޝަނަލް ފަރޓިލިޓީ ސެންޓަރަކީ، ދިވެހި އާއިލާތަކަށް ލިބުނު ވަރަށް ބޮޑު އުފަލަކާއި ހިތްހަމަޖެހުމެއްކަން ޔަޤީން ކަމަށާއި، މިއީ ރައްޔިތުންނަށް ނުހަނު ބޭނުންތެރި ސެންޓަރެއްކަމަށެވެ.

ދައުލަތުގެ އެހީގައި އައިވީއެފް ހިދުމަތް ހޯދުމަށް ބޮޑު ކިއޫއެއް އޮތްއިރު، އެންސްޕާ މެދުވެރިކޮށް އައިވީއެފް ހެދުމަށް މިފަހުންވެސް ވަނީ 50 މީހަކަށް ފުރުސަތު ދިނުމަށް ނިންމާފައެވެ. 

މާލީ ފުދުންތެރިކަން ނެތް މީހުންނަށް ދައުލަތުގެ ޚަރަދުގައި އައިވީއެފް ހެދުމުގެ އިންތިޒާމު ފަހިކޮށްދިނީ 2024 ވަނަ އަހަރުގެ ކުރީކޮޅުގައެވެ.