އަވައްޓެރި ސްރީލަންކާ އާ ދިމާލަށް އަނެއްކާވެސް ކޮޅިގަނޑެއް މިސްރާބު ޖަހައިފިއެވެ.
ބޭއޮފް ބެންގަލް ގައި އުފެދުނު މި ކޮޅިގަނޑުގެ މިސްރާބު މިވަގުތު ހުރީ، ސްރީލަންކާގެ އިރުދެކުނުން ޕޮއްޓުވިލް އާ ދިމާލަށެވެ. މި ކޮޅިގަނޑާ ގުޅިގެން ސްރީލަންކާގެ ޑިޕާޓްމަންޓް އޮފް މީޓިއޮލޮޖިކަލް ސެންޓަރުން ޕޮއްޓުވިލް ސަރަހައްދުގައި އުޅޭ ފަރާތްތްތަކަށް ރައްކާތެރިވުމަށް އެދިފައެވެ.
ސްރީލަންކާގެ މޫސުމާ ބެހޭ އިދާރާއިން ލަފާކޮށްފައިވަނީ، މި ކޮޅިގަނޑު ހުޅަނގު އުތުރަށް ދަތުރުކޮށް، ސްރީލަންކާގެ އިރުމަތީ އައްސޭރިއާ ދިމާލަށް މިސްރާބު ޖަހާނެކަމަށެވެ. މީގެ އިތުރުން އަދި ކުރިއަށް އޮތް 12 ގަޑިއިރުގެ ތެރޭގައި ކޮޅިގަނޑު އިތުރަށް ބާރުގަދަވެ، ބާރު ކޮޅިގަނޑަކަށް ބަދަލުވާނޭކަމަށްވެސް މޫސުމާ ބެހޭ އިދާރާއިން ވަނީ ލަފާކޮށްފައެވެ.
ސްރީލަންކާއަށް މިދިޔަ ޑިސެމްބަރުމަހު ވަނީ ބާރުގަދަ ތޫފާނެއް އަރައި ބޮޑެތި ގެއްލުންތަކެއް ލިބިފައެވެ. ތޫފާން ދިތުވާގެ ނަމުން ނަންދީފައިވާ މި ތޫފާނުގައި 600 އަށްވުރެ ގިނަ މީހުންގެ ފުރާނަ ގެއްލުނުއިރު، އެތައް ބައެއްގެ ގެދޮރުވަނީ ގެއްލިފައެވެ.
ތޫފާނުގެ ސަބަބުން ސްރީލަންކާއަށް ލިބުނު ގެއްލުންތައް ބޮޑުކަމުން އެޤައުމުން ވަނީ ބައިނަލްއަޤްވާމީ ފަރާތްތަކުގެ އެހީއަށްވެސް އެދިފައެވެ. ތޫފާން ދިތުވާއަކީ ސްރީލަންކާގެ ތާރީހުގައިވެސް އެންމެބޮޑަށް ގެއްލުންލިބުނު އެއް ތޫފާނެވެ.
Advertisement
This content is created and paid for by advertisers and does not involve Voice Journalists
