ވެރިކަންކުރާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕިއެންސީ) ގެ މައި އޮފީސް މިރޭ ހުޅޫވައިފިއެވެ.
ހ. ވެޔޮވިލާގައި ގާއިމްކުރި ޕީއެންސީގެ އޮފީސް ހުޅުވައިދެއްވީ ރައީސުލްޖުމްހޫރިއްޔާ އަދި ޕީއެންސީގެ ރައީސްޑރ.މުހައްމަދު މުއިއްޒެވެ.
ޕީއެންސީގެ އޮފީސް ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ޕީއެންސީ ގެ މައި އޮފީސް ވެގެންދާނީ، ޑިމޮކްރަސީގެ ރީތި އުސޫލުން ސިޔާސީ ޕާޓީއެއް ޒިންމާދާރުކަމާއެކު ހިންގުމަށް މުހިންމު ވަސީލަތަކަށް ކަމަށެވެ.
ރައީސް ވިދާޅުވީ މިއީ ކުރެވިގެންދިޔަ ވަރަށް މުހިންމު މަސައްކަތެއް ކަމަށާއި، ޕީއެންސީ އޮފީސް އިމާރާތުގެ ބޭނުންތެރިކަން ވަރަށްބޮޑުކަމަށެވެ.
"އާދެ މި ޕާޓީ ދުވަހެއް ދުވަހަކަށް ބޮޑުވެ، ހަރަކާތްތެރިކަން އިތުރުވެ، ރާއްޖޭގެ އެކި ކަންކޮޅުތަކުގައި ކުރަމުންދާ މަސައްކަތްތައް އިތުރަށް ދުވެލި ހަލުވިވެ ބާރު ސްޕީޑުގައި ގެންދިއުމުގައި މިއަދު މިތަނުގައި މިރޭ އަޅުގަނޑުމެން މި ހުޅުވި މައި އޮފީސް އިރާދަކުރެއްވިއްޔާ ވެގެންދާނީ ޑިމޮކްރަސީގެ ރިވެތި އުޞޫލުގެ މަތިން ސިޔާސީ ޕާޓީއެއް އެންމެ ފުރިހަމައަށް އެންމެ ޒިންމާދާރުކަމާއެކީގައި ހިންގުމަށްޓަކައި ބޭނުންކުރެވިގެންދާނެ މުހިއްމު ވަސީލަތެއްގެ ގޮތުގައި"
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
މި ހަފްލާގައި ވާހަކަދައްކަވަމުން އިނގުރައިދޫ ދާއިރާގެ މެންބަރު އިބްރާހިމް ފަލާހު ވެސް ވިދާޅުވީ މި ޖަގަހައާއިއެކު އެ ޕާޓީގެ މެންބަރުންގެ ހަރަކާތްތަކަށް އިތުރު ހިތްވަރަކާއި ފަސޭހަކަމެއް ލިބިގެންދާނެކަމަށެވެ.
ހެންވޭރު އާޓިފިޝަލް ބީޗްކައިރި ހުޅުވި ޕީއެންސީ އޮފީސް އިމާރާތް ހަދައިފައިވަނީ 4 ފަންގިފިލާއަށެވެ. އެ ޕާޓީގެ އޮޮފީސް މީގެ ކުރިން ހިންގީ ހ. ސީޓްރެކްގެ ހަތްވަނަ ފްލޯގަ އެވެ.
ޕީއެންސީއަކީ މިވަގުތު ރާއްޖޭގައި އޮތް އެންމެ މެންބަރުން ގިނަ ޕާޓިީއެވެ. އެގޮތުން އެޕާޓީގައި މިވަގުތު 74،000 އަށް ވުރެ ގިނަ މެމްބަރުން އެބަތިބިކަމަށް ފަލާހް ވަނީ މިރޭ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
