ޝަހީމް ކުރިމައްޗެއް ނުލެއްވި، އަދާލަތުގެ ރައީސް ކަމަށް ދެ ނަމެއް
އަދާލަތު ޕާޓީގެ ރައީސް ކަމަށް ހުޅުވާލުމުން ކުރިމަތިލީ ދެ ކެންޑިޑޭޓެއް ކަމަށް އެ ޕާޓީން ބުނެފި އެވެ.
އަދާލަތުގެ ރައީސް ކަމަށް ހުޅުވާލި ފުރުސަތު ބަންދުވީއިރު ކުރިމަތިލީ މުހައްމަދު ޝިފާން އާއި އިކްރާމް އަބްދުއްސައްތާރެވެ. ސައްތާރަކީ އަދާލަތުގެ އާންމު މެންބަރެކެވެ. ޝިފާން އަކީ މި ފަހުން އެެ ޕާޓީގެ ނާއިބު ރައީސެވެ.
އަދާލަތާއި ގުޅި އެ ޕާޓީގެ ރައީސް ކަމަށް ކުރިމަތިލައްވާނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ކުރީން ވަނީ އިއުލާނު ކުރައްވާފަ އެވެ.
މިނިސްޓަރު އެކަން އިއުލާނު ކުރެއްވީ އޭޕްރީލް 30، 2025 ގަ އެވެ. އެ ދުވަހު ވޮއިސްއާ ވާހަކަ ދައްކަވަމުން މިނިސްޓަރު ވިދާޅުވީ އަދާލަތުގެ ސީނިއާާ އެއް މުއައްސިސްގެ ހައިސިއްޔަތުން އަހަރުތަކެއް ވަންދެން އެމަނިކުފާނު ހިދުމަތްކުރި އަދާލަތު ޕާޓީއަށް އަލުން ވަނުމަށް ނިންމާފައިވާ ކަމަށެވެ. އަދި އެ ޕާޓީގެ އާ ރައީސަކު ހޮވުމަށް ބާއްވާ އެތެރޭގެ އިންތިހާބުގައި ވާދަކުރައްވާނެ ކަމަށެވެ.
އެ މޭރުމުން ސޯޝަލް މީޑިއާގައި ވެސް ވަނީ ޕޯސްޓް ކުރައްވާފަ އެވެ.
ނަމަވެސް މުއްދަތު ހަމަވީއިރު މިނިސްޓަރު ކުރިމައްޗެއް ނުލެއްވި އެވެ. އެކަމުގެ ސަބަބެއް ސާފެއް ނުވެ އެވެ.
އަދާލަތު ޕާޓީ އުފެއްދުމުގައި އެންމެ އިސް ދައުރެއް އަދާކުރެއްވި އެއް ބޭފުޅަކީ މިނިސްޓަރު ޝަހީމެވެ. އަދާލަތުގެ ރަން ދުވަސްތަކުގައި އެ ޕާޓީ ހިންގުމުގައި ވެސް ޝަހީމްގެ ދައުރު ބޮޑެވެ. އެ ޕާޓީއަށް ރައްޔިތުން ކުުރި އިތުބާރު ގެއްލި ޕާޓީގެ ރަން ދުވަސްތައް ގެއްލުނީ އެ ޕާޓީގެ ރައީސް ކަމަށް މިހާރުގެ ރައީސް އިމްރާން ވަޑައިގަތް ފަހުންނެވެ.
މިދިޔަ ދުވަސްތަކުގައި އެ ޕާޓީން ގިނަ މެންބަރުންތަކެއް ވަނީ ވަކިވެފަ އެވެ. އަދި އެ ޕާޓީ އުފެއްދުމުގައި އިސްކޮށް ހަރަކާތްތެރިވި ވަރަށް ގިނަ އިލްމުވެރީން ވެސް ވަނީ އަދާލަތުން ވަކިވެވަޑައިގެންފަ އެވެ. އެ ޕާޓީގެ މެންބަރުންގެ އަދަދު ވަނީ ނުވަހާހުން ދަށްވެފަ އެވެ.
Advertisement
This content is created and paid for by advertisers and does not involve Voice Journalists
