އުމްރާގެ މަތިވެރި އަޅުކަން އަދާކުރުމަށް ޑިސެންބަރުމަހު ރާއްޖެއިން ދިޔަ ހައްޖު ކޯޕަރޭޝަންގެ އުމްރާވެރިންގެ ފުރަތަމަ ފްލައިޓު، އުމްރާގެ އަޅުކަން ނިންމުމަށްފަހު އެނބުރި ރާއްޖެ އަތުވެއްޖެއެވެ. 

މޯލްޑިވްސް ޙައްޖު ކޯޕަރޭޝަން ލިމިޓެޑުން މައުލޫމާތު ދޭ ގޮތުގައި އުމްރާވެރިންނާއިއެކު މޯލްޑިވިއަންގެ މި މަތިންދާބޯޓު ރާއްޖެ އައިސްފައިވަނީ ރޭގެ 11:35 ގައެވެ. މި ބޯޓު ސައުދީން ފުރާފައިވަނީ އިއްޔެ ހަވިރު 03:35 ގައެވެ. 

އުމްރާވެރިންގެ އިތުރު ބޯޓެއް މިއަދުވެސް ރާއްޖެ އައުމަށް ހަމަޖެހިފައިވާކަމަށް ޙައްޖު ކޯޕަރޭޝަނުން މައުލޫމާތުދެއެވެ. މި ބޯޓު ސައުދީއިން ފުރާނީ މެންދުރު 02:05 ގައެވެ. އަދި ރާއްޖެ ޖައްސާނީ ރޭގަނޑު 10:05 ގައެވެ. 

މީގެ އިތުރުން، 12 ޖެނުއަރީގައި ވެސް އުމްރާވެރިންގެ ބަޔަކު އެނބުރި ރާއްޖެ އަންނާނެއެވެ. މި ބޯޓު ސައުދީއިން ފުރާނީ ފަތިހު 5:45 ގައެވެ. އަދި ރާއްޖެ އަންނާނީ އެދުވަހުގެ މެންދުރު 01:45 ގައެވެ. 

ޑިސެންބަރު މަހާއި ޖެނުއަރީ މަހަކީ ކޮންމެ އަހަރެއްގައި ވެސް ރާއްޖެއިން ގިނަ ބަޔަކު އުމްރާގެ އަޅުަކަން އަދާކުރުމަށް ދަތުރުކޮށް އުޅޭ ދުވަސްވަރެކެވެ. އެގޮތުން މިފަހަރު އެކަނިވެސް ރާއްޖެއިން 7726 މީހުން އުމްރާގެ އަޅުކަން އަދާކުރުމަށް ގޮސްފައިވެއެވެ. އެގޮތުން ރާއްޖޭގެ އެންމެ ފުރަތަމަ ގްރޫޕް ސައުދީއަށް ފުރާފައިވަނި ޑިސެންބަރު 21 ގައެވެ. އަދި އެންމެ ފަހު ގްރޫއްޕު ރާއްޖެއިން ފުރާފައިވަނީ  މި މަހުގެ 9 ވަނަ ދުވަހުއެވެ.

އިސްލާމިކް މިނިސްޓްރީން މައުލޫމާތު ދޭ ގޮތުގައި މިފަހަރު އެންމެ ގިނަ މީހުން އުމްރާއަށް ދިއުމަށް ފުރީ ޑިސެމްބަރުމަހުގެ 28 ވަނަ ދުވަހުއެވެ. އެދުވަހު އެކަނިވެސް އެއްހާހަށްވުރެ ގިނަ މީހުން ފުރާފައިވެއެވެ.