ޕެންޝަންފަންޑުގެ ފައިސާއިން ބޮޑެތި ބަލިތަކަަށް ފަރުވާ ކުރެވޭގޮތް ހެދުމަކީ ރަނގަޅު ކަމެއް ނޫން: ޣަފޫރު
ޕެންޝަންފަންޑުގެ ފައިސާއިން ބޮޑެތި ބަލިތަކަަށް ފަރުވާ ކުރެވޭގޮތް ހެދުމަކީ ހެޔޮ ބަދަލެއް ނޫން ކަމަށާ، އެއީ އެކަން ކުރަންވީ ގޮތް ނޫން ކަމަށް އެމްޑީޕީގެ ވަގުތީ ޗެއާޕާސަން އަދި ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ވިދާޅުވެއްޖެއެވެ.
ފުރާނައަށް ނުރައްކާވާ ބޮޑެތި ބަލިތަކަށް ފަރުވާ ހޯދަން ޖެހޭ ހާލަތްތަކުގައި ޕެންޝަން ފަންޑުގައި ހުންނަ ފައިސާ ދޫކުރެވޭނެ ގޮތް ހެދުމަށް، ޕެންޝަނާ ބެހޭ ގާނޫނު ސަރުކާރުން ވަނީ އިސްލާހު ކޮށްފައެވެ.
އެކަމާ ގުޅިގެން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޣަފޫރު ވިދާޅުވީ، އެ ގާނޫނަށް ސަރުކާރުން ބަދަލު ގެނައީ އެއްވެސް ދިރާސާއެއް ކުރުމެއްނެތި ކަމަށެވެ.
ބޮޑެތި ބަލިތަކުގައި އުޅެމުންދާ މީހުންނަށް ޕެންޝަން ފަންޑުން އެމީހުންގެ ހުރި ލާރި ނަގައި ޚަރަދު ކުރެވޭގޮތް ހެދުން އެއީއެއް ނޫން އެކަން ވާންޖެހޭ ގޮތަކީ. ދައުލަތުގެ ބަޖެޓުން 7 ބިލިއަން ރުފިޔާ ރާއްޖޭގެ ސިއްހީ ދާއިރާއަށް ޚަރަދުކުރަމުންދާއިރުގާ، އެ ބަޖެޓުގައި، ބަލިތައް ތަހަންމަލްކުރަމުންދާ ފަރާތްތަކަށް ދައުލަތުން އެކަން ކޮށްދޭންޖެހޭނެ… އެއާ ދިމާލަށް ރައްޔިތުން ސަރުކާރަށް މި ގެންދަނީ. އެއީ ހެޔޮ ބަދަލަކަށް ވެގެން ނުދާނެ. ހެޔޮ ބަދަލަކަށްވާނީ، ދައުލަތުން އެ ބަލިތައް ތަހަންމަލްކުރާ މީހުންނަށް އެކަންކަން ކޮށްދިނުން. އޭގެ ބަދަލުގައި އަނެއް އަތަށް ޖަހާފައި މިއޮތީ.
ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ
މިއާއެކު ޣަފޫރުވަނީ ދޮށީ އުމުރުގެ މީހުންނަށްދޭ 5000 ރުފިޔާގެ އެލަވަންސްއަށްވުރެ އިތުރަށް އެންމެ 1000 އެއް މުސާރައިގެ ގޮތުގައި ލިބުނުކަމުގައި ވީނަމަވެސް އެލަވަންސް ކުޑަވާގޮތް ހަދާފައިވާކަން ފާހަގަކުރައްވައި އެއީ އެކަން ވާންވީގޮތް ނޫން ކަމަށް ވިދާޅުވެފައެވެ.
އެހެންނަމަވެސް ވަކި މިންގަނޑެއްގެ ތެރޭގައި އެލަވަންސް ދިނުމުގެ ކަންކަން ބެހެއްޓުމަށް ތާއީދު ކުރައްވާ ކަމަށް ފަލާޙް ވިދާޅުވިއެވެ.
އަޅުގަނޑުމެންވެސް ގަބޫލުކުރަން އާމްދަނީގެ ގޮތުގައި 20، 15 ހާސް ރުފިޔާ ލިބޭ މީހުންނަށް ކޮންމެހެން މި 5000 ރުފިޔަ ލިބުން އެއީ ރަނގަޅު ކަމެއް ކަމަށް. އެހެންނަމަވެސް ސަރުކާރުން ވަޒީފާ އަދާކޮށްފައި ރިޓަޔާ ކުރީމާ އެލިބޭ 3000 ރުފިޔާ ލިބެމުންދަނިކޮށް 65 އަހަރުވެގެން 5000 ރުފިޔާ ލިބުނީމާ، އެ 3000 ރުފިޔާ ލިބޭތީ، އެ ލިބޭ 5000 ރުފިޔާއިން އިތުރު 3000 ރުފިޔާ ކަނޑާފައި ޖުމުލަ 5000 ރުފިޔާ ލިބުމަކީ އިންސާފެއް ނޫން
ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ
ސަރުކާރުން ޕެންޝަން ފަންޑަށް ގެނައި އިސްލާހުގައިވަނީ ފުރާނައަށް ނުރައްކާވާފަދަ ބައްޔެއް ނުވަތަ ޓާމިނަލް އިލްނަސްގެ ޙާލަތުގައިވާ ފަރާތްތަކަށް ޕެންޝަން ފަންޑުގައިވާ ފައިސާ ދޫކުރުމަށް ކަނޑައެޅުމާއި އެ ފައިސާ ދޫކުރުމުގެ އުސޫލުތައް ހިމަނާފައެވެ.
ޓާމިނަލް އިލްނަސްގެ ހާލަތް ކަމަށް އެ އިސްލާހުގައި ބުނެފައިވަނީ އެކަށީގެންވާ ސިއްހީ ފަރުވާ ފޯރުކޮށްދިން ނަމަވެސް 12 މަހަށް ވުރެ ދިގު މުއްދަތަކަށް އެ މީހަކު ދިރިހުރުމަކީ ނާދިރުކަމެއް ކަމަށް އެފަދަ ބައްޔަކާ ބެހޭ ސްޕެޝަލިސްޓު ޑޮކްޓަރަކު ކަނޑައަޅާފައިވާ ސިއްހީ ހާލަތްތަކަށެވެ.
Advertisement
This content is created and paid for by advertisers and does not involve Voice Journalists
