އިރާނުގެ މުޒާހަރާތަކާ ގުޅިގެން ރާއްޖޭގެ ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުތަކަށް، ލަންކާއަށްާ ކަނޑައަޅުއްވާފައި ހުންނަވާ އީރާނުގެ ސަފީރު ވަރުގަދަ ރައްދެއް ދެއްވައިފިއެވެ.

ރައީސް ނަޝީދު ކުރެއްވި އެކްސް ޕޯސްޓެއްގައި ވިދާޅުވީ، އީރާނުގެ ރައްޔިތުން މަގުތަކަށް ނުކުމެ އަޑުއުފުލަމުންދަނީ އެތައް އަހަރެއްގެ އަނިޔާވެރިކަމާއި ދިރިއުޅުމުގެ އަގުބޮޑުވުމާ ދެކޮޅަށް ކަމަށެވެ. އަދި އީރާނުގެ ރައްޔިތުންނަކީ މުސްލިމް އަޚުންނާއި އުޚުތުން ކަމަށްވާއިރު، ބައިނަލްއަޤުވާމީ މުޖުތަމަޢުން ތިބެންވާނީ ސަރުކާރު ހިމާޔަތްކުރުމުގެ ބަދަލުގައި ރައްޔިތުންނާއެކު ކަމަށް ނަޝީދު ވިދާޅުވިއެވެ.

ނަޝީދުގެ މި ވާހަކަތަކަށް ރައްދު ދެމުން ލަންކާގައި ހުންނަ އީރާނުގެ އެމްބަސީގެ އެކްސްގެ ރަސްމީ އެކައުންޓުން ލިޔެފައިވަނީ، ޖޫން 2025 ގައި ހިނގި 12 ދުވަހުގެ ހަނގުރާމައިގައި އީރާނަށް ފެނިގެންދިޔައީ ޒަޔަނިސްޓު އިސްރާއީލުން އެ ގައުމުގެ ސިޓީތަކަށާއި، އާންމު ރައްޔިތުންނަށް ދިން ނުރައްކާތެރި އަސްކަރީ ހަމަލާތަކެއް ކަމަށެވެ. އަދި މި ހަމަލާތަކުގައި އީރާނުގެ އެއްހާހަށްވުރެ ގިނަ ފިރިހެނުންނާއި، އަންހެނުންނާއި ކުޑަކުދިން ޝަހީދުވެފައިވާކަން ފާހަގަކޮށްފައުވެއެވެ.

އޭގައި އިތުރަށް ބުނީ، އެމެރިކާގެ ސީދާ އެހީތެރިކަމާއެކު ޒަޔަނިސްޓުން ދިން އިންސާނިއްޔަތާ ޚިލާފު ހަމަލާތަކުގެ ބޭނުމަކީ އީރާނުގެ މަގުތަކުގައި ހަމަނުޖެހުން އުފައްދައި، އާންމު ސަލާމަތާއި ރައްކާތެރިކަން ނަގައިލުން ކަމަށެވެ. އަދި މޮސާޑާ ގުޅުންހުރި ޓެރަރިސްޓް ގްރޫޕުތަކުން އީރާނުގެ މިސްކިތްތަކުގައި ހުޅުޖަހައި، ހޮސްޕިޓަލްތަކާއި، ބޭންކުތަކާއި މެޓްރޯ ސްޓޭޝަންތަކަށް ބޮޑެތި ގެއްލުންތަކެއް ދީފައިވާ ކަމަށްވެސް ބުނެފައިވެއެވެ. 

އެއަށްފަހު އެ ރައްދުގައި ވަނީ މިފަދަ ނުރައްކާތެރި ހާލަތެއްގައި ނަޝީދު ހުންނެވީ ކޮން ފަރާތެއްގައިތޯ ސުވާލުކޮށްފައެވެ.

އީރާނުގެ ވެރިރަށް ތެހެރާނާއި އެހެނިހެން ބޮޑެތި ސިޓީތަކުގައި މުޒާހަރާ ކުރާތާ ދެ ހަފުތާއަށްވުރެ ގިނަ ދުވަސްވެފައިވާއިރު، މި ހަމަނުޖެހުންތަކުގައި މިހާތަނަށް މަދުވެގެން 116 މީހުން މަރުވެ، 2,600 އަށްވުރެ ގިނަ މީހުން ހައްޔަރުކޮށްފައިވާ ކަމަށް އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ބުނެއެވެ.

އެ ހަމަނުޖެހުމުގެ ތެރެއަށް އެމެރިކާއިންވެސް ވަންނާނެ ކަމަށް އެގައުމުގެ ރައީސް ޑޮނަލްޑް ޓްރަމްޕް ބުނެފައުވާއިރު، އީރާނުން ވަނީ އެމެރިކާއިން ހަމަލާދީފި ނަމަ ރައްދުގައި އެމެރިކާއާއި އިސްރާއިލަށްވެސް ހަމަލާދޭނެ ކަމަށް ބުނެފައެވެ.