ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ކުރީގެ ހެޑް ކޯޗް ސޮފްވާން އަހުމަދަށް ކުރެވޭ ޖިންސީ ކުށުގެ މައްސަލަ ފުލުހުން ތަހުގީގު ކުރަން ފަށައިފި އެވެ.

ސޮފްވާންގެ މައްޗަށް ތުހުމަތު ކުރެވޭ ސީރިއަސް ތުހުމަތުތަކަކާއި ގުޅިގެން ވީއޭއެމްގެ ހެޑް ކޯޗު ކަމުން ވަކިކޮށް ފަސް އަހަރަށް ވަނީ ސަސްޕެންޑުކޮށްފަ އެވެ. ފުލުހުން މިރޭ ބުނީ ރާއްޖޭގެ ކުޅިވަރު އެސޯސިއޭޝަންއެއްގއި އެތްލީޓުން ތަމްރީނު ކުރުމުގެ ޒިންމާ އޮތް ފަރާތެއްގެ މައްޗަށް ތުހުމަތު ކުރެވޭ ޖިންސީ ކުށުގެ މައްސަލައެއް ފުލުހުންގެ ސަމާލު ކަމަށް އައުމާއި ގުޅިގެން އެ މައްސަލަ ފުލުހުން ދަނީ ތަހުގީގު ކުރަމުން ކަމަށެވެ.

މި މައްސަލައާ ގުޅިގެން މީހަކު ހައްޔަރު ނުކުރާ ކަމަށްވެސް ބުންޏެވެ.

ސޮފްވާންގެ މައްޗަށް އޮތީ ވޮލީ ކުޅުންތެރިއަކަށް ބިރު ދައްކައިގެން ޖިންސީ ގޯނާކުރުމުގެ ތުހުމަތެވެ. މި މައްސަލައާ ގުޅިގެން ވޮލީބޯޅަ އެސޯސިއޭޝަނުން ފިޔަވަޅު އެޅީ އެތެރޭގެ ތަހުގީގަކަށް ފަހު އެވެ.

އެ ތަހުގީގަށް ސޮފްވާން އާއި ޖިންސީ އަނިޔާ ލިބުނު ކަމަށް ބުނާ ކުޅުންތެރިޔާ ވަނީ ހާޒިރުކޮށްފަ އެވެ. އަދި މައްސަލަ ބަލާ ކޮމެޓީން ވަނީ ގިނަ ސުވާލުތަކެއް އެ ދެ މީހުންނަށް ކޮށްފަ އެވެ.

އަންހެން މީހާ ބުނީ އޭނާއަށް ބިރު ދައްކައިގެން ސޮފްވާން ޖިންސީ ގުޅުން ހިންގާފައިވާ ކަމަށެވެ. އަދި އޭނާ އަތުގައި އެ ދެ މީހުންގެ ޗެޓްލޮގެއް އޮތް ކަމަށް ބުނެ އެ އާއިލާއަށް ދައްކާނެ ކަމަށް ބުނެ ބިރުދައްކާ ކަމަށެވެ. އަންހެން މީހާ ބުނި ގޮތުގައި ސޮފްވާން ވަނީ އެތައް ފަހަރަކު އޭނާއާ ޖިންސީ ގުޅުން ހިންގާފަ އެވެ. އަދަދު ބުނަން ނޭންގޭ ކަމަށާ މަދުވެގެން ހަފްތާއަކު އެއް ފަހަރު ޖިންސީ ގުޅުން ހިންގާ ކަމަށްވެސް ބުންޏެވެ.

އަދި އޭނާ ދެއްކި ވާހަކަތަކަކީ ތެދު ހަގީގަތް ކަމަށާ ހަތިމުގައި އަތްލާ ހުވާކުރަން ވެސް ތައްޔާރަށް ހުރި ކަމަށް ބުނެފައިވެ އެވެ.

ސޮފްވާން ބުނީ އޭނާއާ އެ އަންހެން ކުޅުންތެރިޔާ އުޅުނީ ލޯބީގެ ގޮތުން ގުޅިގެން ކަމަށެވެ. ނަމަވެސް އަންހެން އެތްލީޓް ބުނީ އެއީ ދޮގެއް ކަމަށެވެ. ސޮފްވާން ބުނީ އޭނާއާ ދެ މީހުން ގުޅުން އޮތްކަން އެނގޭ ޗެޓް ލޮގްތައްވެސް ދައްކަންހުރީ ތައްޔާރަށް ކަަމަށެވެ.

އަދި އަންހެން ކުޅުންތެރިޔާ ވަނީ "ދުވަސް ދުއްވާލާނެ ކަމަށާ" "ކެރިއާ ދުއްވާލާނެ" ކަމަށް ބުނެ އިންޒާރު ދީފައި ކަމަށެވެ. ނަމަވެސް ދުވަހަކު ވެސް އެފަދަ އިބާރާތެއް ބޭނުންކޮށްފައިނުވާނެ ކަމަށް އަންހެން މީހާ ވަނީ ބުނެފަ އެވެ.