މިހިނގާ ޑިސެމްބަރުމަހު މިހާތަނަށް އެންމެގިނަ ފަތުުރުވެރިން ޒިޔާރަތްކުރިދުވަހަށް އިއްޔެ ވެއްޖެއެވެ.

ޓޫރިޒަމް މިނިސްޓްރީން މިއަދު ނެރެފައިވާ ތަފާސްހިސާބުތަކަށް ބަލާއިރު މިމަހު އެއްދުވަހެއްގެ ތެރޭގައި އެންމެގިނަ ފަތުރުވެރިން ޒިޔާރަތްކޮށްފައިވަނީ މިދިޔަ އާދިއްތަ ދުވަހުއެވެ. އިއްޔެ ރާއްޖެއަށް 9،596 ފަތުރުވެރިން ޒިޔާރަތްކުރިއިރު، ދެން އެންމެގިނައިން ފަތުރުވެރިން ޒިޔާރަތްކޮށްފައިވަނީ، މިމަހުގެ ތިނެއް ވީ ހޮނިހިރުދުވަހެވެ. ކޮންމެ ހަފްތާއެއްގެވެސް އާދިއްތަ ދުވަހަކީ ހަފްތާގެ ދުވަސްތަކަށް ބަލާއިރު އެންމެގިނައިން ފަތުރުވެރިން ރާއްޖެއަށް ޒިޔާރަތްކުރާ ދުވަހެވެ.

މިއަހަރުގެ ފުރަތަމަ 11 ދުވަހުގެ ތެރޭގައި ރާއްޖެއަށް 79,004 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު، 13.6 އިންސައްތަ އިތުރު އަދަދެކެވެ. މިދިޔަ އަހަރުގެ ފުރަތަމަ 11 ދުވަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އުޅެނީ، 69,553 ގައެވެ. 

ހުސްވި ޑިސެމްބަރުމަހު ރާއްޖެއަށް ޒިޔާރަތްކުރި 224,455 ފަތުރުވެރިންނާއެކު، މިފަހަރުގެ ޓޫރިޒަމް ސީޒަން ފާހަގަކުރެވެނީ ކުރީ އަހަރާ އަޅާބަލާއިރު ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތްކުރާ ސީޒަނެއްގެ ގޮތުގައެވެ.  މިދިޔަ ޑިސެމްބަރުމަސް ވެގެން ގޮސްފައިވަނީ، ރާއްޖޭގެ ތާރީހުގައިވެސް މަހެއްގެ ތެރޭގައި އެންމެ ގިނަ އަދަދަކަށް ފަތުރުވެރިން ޒިޔާރަތްކުރި މަހުގެ ގޮތުގައެވެ.

މިދިޔަ އަހަރު ނިމުނުއިރު ރާއްޖެއަށް ވަނީ 2.24 މިލިއަން ފަތުރުވެރިން ޒިޔާރަތްކޮށްފައެވެ. ޓޫރިޒަމް މިނިސްޓްރީ އަދި އެމްއޭސީއެލުން ބުނާގޮތުގައި މިފަހަރުގެ ޓޫރިޒަމް ސީޒަނުގައި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު މިދިޔަ އަހަރަށްވުރެ އިތުރުވެގެންދާނެއެވެ. އެގޮތުން ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލް ހުޅުވުމާއެކު ރާއްޖެއަށް ޒިޔާރަތްކުރާ ފަތުރުވެރިންނަށް ހިދުމަތް ދިނުމުގެ ގާބިލްކަންވަނީ އިތުރުވެގެން ގޮސްފައެވެ. ސަރުކާރުގެ އަމާޒަކީ އައުޓާމިނަލާއެކު އަހަރެއްގެ ތެރޭގައި 7.5 މިލިއަން ފަސެންޖަރުންނަށް ހިދުމަތް ދިނުމެވެ.