މަގުމަތީގައި ނުރައްކާތެރިކޮށް ދުއްވާ ފަރާތްތައް ހުއްޓުވައި ފިޔަވަޅު އެޅުމަށް ފުލުހުން ކުރަމުންދާ މަސައްކަތުގެ ދަށުން މިދިޔަ މަހު އެކަނިވެސް 27،000 އަށް ވުރެ ގިނަ އުޅަނދު ބަލާފާސްކޮށްފައިވާކަމަށް ފުލުހުން ހާމަކޮށްފިއެވެ. 

ފުލުހުން އާއްމުކުރި ތަފާސްހިސާބުތަކުގައި ވާގޮތުން މިދިޔަ ޑިސެންބަރު މަހު ދެ ފުރޮޅުލީ 12782 އުޅަނދާއި، 14404 ހަތަރު ފުރޮޅުލީ އުޅަނދު ހިމެނޭނެހެން ޖުމުލަ 27186 އުޅަނދު ބަލާފާސްކޮށްފައިވެއެވެ.

ފުލުހުން ބުނީ މިދިޔަ މަހު ދެ ފުރޮޅުލީ 5،765 އުޅަނދު އަދި ހަތަރު ފުރޮޅުލީ 6،659 އުޅަނދު ޗެކުކޮށްފައިވާ ކަމަށެވެ. އަދި ދެ ފުރޮޅުލީ 5،037 އުޅަނދާއި، ހަތަރު ފުރޮޅުލީ 5،833 އުޅަނދު ހިމެނޭނެހެން، ޖުމުލަ 10،870 އުޅަނދަށް ނަސޭހަތްތެރިވެފައިވާއިރު ނުރައްކާތެރިކޮށް ދުއްވައިގެން ދެ ފުރޮޅުލީ 728 އުޅަނދަކާއި، ހަތަރު ފުރޮޅުލީ 826 އުޅަނދު ވީހެން، ޖުމުލަ 1،554 އުޅަނދަކަށް ފިޔަވަޅު އަޅާފައިވާކަމަށްވެސް ފުލުހުން މައުލޫމާތުދެއެވެ.

ތަފާސްހިސާބުތަކުން ދައްކާގޮތުގައި ނުރައްކާތެރިކޮށް ދުއްވައިގެން ދެ ފުރޮޅުލީ 27 އުޅަނދަކާއި، އެއްގޮތަކަށްވެސް ލައިސަންސް ނެތި ދުއްވައިގެން ދެ ފުރޮޅުލީ 241 އުޅަނދާއި، ހަތަރު ފުރޮޅުލީ 20 އުޅަނދު ހިމެނޭނެހެން 260 އުޅަނދު ހުއްޓުވާފައިވެއެވެ.  އަދި ޓްރެފިކް ވައިލޭޝަންއާ ގުޅިގެން ދެ ފުރޮޅުލީ 323 އުޅަނދާއި، ހަތަރު ފުރޮޅުލީ 360 އުޅަނދު ހިމެނޭހެން ޖުމްލަ 683 އުޅަނދު ވަނީ ޓޯރކޮށްފައެވެ.

މީގެއިތުރުން ފުލުހުން ބުނީ، ޕާކިންގ ވައިލޭޝަންއާ ގުޅިގެން ޖުމްލަ 1367 އުޅަނދު ޓޯރކޮށްފައިވާ ކަމަށެވެ. މީގެތެރޭގައި ދެ ފުރޮޅުލީ 661 އުޅަނދާއި، ހަތަރު ފުރޮޅުލީ 706 އުޅަނދު ހިމެނެއެވެ

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުންގެ ހިދުމަތުން އަންނަނި މުހިންމު އެތައް މަސައްކަތްތަކެއް ވަރަށް ހާއްސަ ސަމާލުކަމެއް ދިގެން ކުރަމުންނެވެ. އެގޮތުން މިމަހުގެ ތެރޭގައި ވެސް މަގުމަތީގެ ރައްކާތެރިކަން ކަށަވަރުކުރުމަށް ރަނގަލުކޮށްލާގެ ނަމުގައިވެސް ފުލުހުންވަނީ ހާއްސަ ހަރަކާތެއް ފަށާފައެވެ.