އީރާންގެ ސަރުކާރާ ދެކޮޅަށް އާންމުން ނުކުމެ، ކުރަމުންދާ މުޒާހަރާތަކުގައި ހިނގަމުންދާ ހަމަނުޖެހުންތަކުގެ ތެރޭގައި މިހާތަނަށް 2571 މީހުން މަރުވެފައިވާކަމަށް ރިޕޯޓުކޮށްފިއެވެ.
އީރާންގެ ސަރުކާރުގެ އޮފިޝަލަކު ވިދާޅުވި ގޮތުގައި، އެ މަރުތަކުގެ ފަހަތުގައި ތިބީ، މުޒާހަރާކުރުމުގެ ނިވަލަށް ވަދެ، މުޒާހަރާގެ ބައިވެރިންނަށާއި ސަލާމަތީ ބާރުތަކަށް ޙަމަލާދެމުންދާ ނިރުބަވެރި ބައެކެވެ. އެހެންކަމުން މަރުވި މީހުންގެ ތެރޭގައި ސަލާމަތީ ބާރުތަކުގެ މުވައްޒަފުންވެސް ލިމެނެއެވެ.
މިދިޔަ މަހުގެ ފަހުކޮޅު އީރާނުގައި ފަށައިފައިވާ މި މުޒާހަރާ އަކީ އެގައުމުގައި ތަކެތީގެ އަގުތައް އިންތިހާއަށް އުފުލިފައިވާތީ އެ ކަމާ ދެކޮޅަށް ރައްޔިތުން ކުރަމުން އަންނަ މުޒާހަރާއެކެވެ. މި މުޒާހަރާތައް މިހާރު ވަނީ އެގައުމުގެ އެކި ސަރަޙައްދުތަކަށް ފެތުރިފައެވެ. މިއާއިއެކު އެގައުމުގެ ބޮޑު ސަރަހައްދަކުން އިންޓަނެޓުގެ ހިދުމަތްވެސް ވަނީ ކެނޑިފައެވެ.
އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ އީރާންގެ މުޒާހަރާތައް ހުއްޓުވަން އެކަށީގެންނުވާ ބާރުގެ ބޭނުންކުރާނަމަ، މުޒާހަރާގެ ބައިވެރިންގެ ދިފާޢުގައި އެމެރިކާއިން އީރާނަށް އަރާނެކަމުގެ އިންޒާރު، ތަކުރާރުކޮށް ދެއްވަމުންނެވެ. މިގޮތުން، ޓްރަމްޕް އިއްޔެ ވަނީ އީރާނާ އެކު ވިޔަފާރީގެ ގުޅުން ބާއްވާ ޤައުމުތަކުން އެމެރިކާއަށް ބޭރުކުރާ މުދަލުން 25 ޕަސެންޓުގެ ޑިޔުޓީއެއް ވެސް ނަގަން ފަށާފައެވެ.
Advertisement
This content is created and paid for by advertisers and does not involve Voice Journalists
