ޅެންވެރިންގެ ދުވަހަކީ 1989 ވަނަ އަހަރުން ފެށިގެން، ކޮންމެ އަހަރެއްގެ ވެސް ޖަނަވަރީމަހުގެ 15 ވަނަ ދުވަ ދިވެހި ޅެންވެރިކަމަށާއި ޝާއިރިއްޔަތަށް ޚިދުމަތްކުރައްވާ ކުޅަދާނަ ޅެންވެރިންގެ ބުރަ މަސައްކަތުގެ އަގުވަޒަންކުރުމުގެ ގޮތުން، ރާއްޖޭގައި ފާހަގަ ކުރާ ދުވަހެކެވެ.

ޅެންވެރިކަމަކީ ފަންނެކެވެ. ދިވެހިބަހާއި އަދަބިއްޔާތަށް މުއްސަނދިކަމާއި އާރޯކަން ގެނުވައިދޭ ބަހާއެކެވެ. ބުނަން ބޭނުންވާ ވާހަކައެއް ނުވަތަ ފޯރުކޮށްދޭން ބޭނުންވާ މައުލޫމާތެއް ފަށުވި ކަމާއި އެހެންމީހުންނަށް ފޯރުކޮށްދެވޭ، އިހުސާސާއި އަސަރުން ފުރިގެންވާ އުފެއްދުންތަކެކެވެ. މުއްސަނދި ހިޔާލުތަކާއި ހުނަރުވެރިކަން ދައްކުވައިދޭ މުހިންމު ހެކިތަކެކެވެ. 

ދިވެހިންނަކީ ޒަމާނުއްސުރެ އެބައި މީހުންގެ ޝުއޫރުތައް ވަޒަނަކަށް ފެތޭ ބަސްތަކަކުން ހާމަކުރަމުން ދިޔަ ބައެކެވެ. ބަނދި، ކާ، އަންބާ އަދި ރައިވަރުން ފެށިގެން ތަފާތު ވައްތަރުތަކުގެ ޅެންވެރިކަމުން ދިވެހިން ދިޔަައީ ދިވެހިންގެ ހުނަރު ދައްކަމުންނެވެ.  

ޅެމާއި ބެހޭގޮތުން މުހައްމަަދު ޖަމީލު ދީދީ ވިދާޅުވެފައިވެއެވެ. "ޅެމަކީ ވަޒަނަކަށް ފެތޭ ގޮތަށް ޤާފިޔާ ހަމަކޮށް ކިއިފައިވާ ބަސްތަކެކެވެ. ފުނަށް އަސަރު ފޯރާފަދަ ގޮތަކަށް ސިފަކޮށް ދައްކާ ރީތި ޙިޔާލުތަކެއް ފައުޅުކޮށް ބަޔާންކޮށްދޭ ބަސްތަކެކެވެ. ބައެއް ފަހަރަށް އެބަސްތައް ފަތިފައްޗަށް އެކުލަވައި އަމުނާލެވެއެވެ. ބައެއް ފަހަރަށް އަމުނައިލުމެއް ނެތި އުކައިލެވެއެވެ." 

މި ދުވަހަކީ ޝާއިރުއް ޝަބާބުގެ ލަގަބު ލިބިވަޑައިގެންފައިވާ އަލްމަރުހޫމް އިބްރާހީމް ޝިހާބުގެ ނަންފުޅުގައި ފާހަގަކުރަމުން އަންނަ ދުވަހެކެވެ. އެގޮތުން ކޮންމެ އަހަރަކުވެސް ޅެންވެރިންގެ ދުވަސް ފާހަގަކުރަނީ ޅެންވެރިކަމުގެ ރޮނގުން ފާހަގަކޮށްލެވޭ ވަކި ބޭފުޅަކަށް ހާއްސަ ކޮށްގެންނެވެ.

އެގޮތުން މިއަހަރުގެ ޅެންވެރިންގެ ދުވަސް ހާއްސަ ކުރެވިފައިވަނީ ސ. ހިތަދޫ ކެމީ ހަސަން ލަބީބަށެވެ. މިއީ އެކި މައުލޫތަކަށް، ތަފާތު ވަޒަންތަކަށް އަދި އެކި ހާލަތްތަކަށް ޅެން ހައްދަވާފައިވާ މޮޅު ޝާޢިރެކެވެހަސަން ލަބިބު

ހަސަން ލަބީބު-- ފޮޓޯ/ ޝާއިރުންގެ ވާދީ 

އުމުރުން އެންމެ 16 އަހަރުގައި ޅެން ހައްދަވަން ފެށި ހަސަން ލަބީބަކީ ދިވެހި ޅެންވެރިކަމަށް އެތައް އަގުހުރި ހިދުމަތްތަކެއް ކޮށްދެއްވާފައިވާ ބޭފުޅެކެވެ. އޭނާއަކީ ތަފާތު ރޮނގުތަކުން ޅެން ހެއްދެވި ކުޅަދާނަ މުގައްރިރެކެވެ. މޮޅު އަދީބެކެވެ. އެތައް ބަޔަކަށް ޅެން ހަދަން ދަސްކޮށްދެވި މުދައްރިސެކެވެ. 

ހަސަން ލަބީބަކީ އެކި ދުވަސްތަކަސާއި،ޚާއްސަ މުނާސަބާތަކަށާއި، އަދި އެކި ކަންކަމަށް، ތަފާތު ތައްގަނޑުތަކަށް، ތަފާތު ވަޒަންތަކަށް ޝުޢޫރާއި ތަޖުރިބާތައް ހިމަނުއްވަވައިގެން ލެން ހެއްދެވި މޮޅު ޝާއިރެކެވެ. އޭނާ ލެންވެރިކަމުގެ ތެރެއަށް ވަނީ "ރަމަޟާން މުބާރިކް" ޅެމުންނެވެ. މި ދާއިރާގައި އޭނާ މަސައްކަތްކުރައްވާތާ މިހާރު 60 އެއްހާ އަހަރުވެއްޖެއެވެ. ހަސަން ލަބީބުގެ އެންމެ ފާހަގަކޮށްލެވޭ ބައެއް ޅެންތަކަކީ، "ނޮވެންބަރުގެ ހަނދާނުގައި "މި ޅެމާއި، "ޝަހީދުވީ ބަޠަލުންގެ ޒިކުރާއިން އައު ރޫޙެއް ލިބިގަންނަމާތޯ؟" މި ޅެމާއި، "ޤައުމީ މަލުގެ ތަޞައްވުރު" މި ޅެމެވެ. ހަސަން ލަބީބަކީ ދިވެހިބަހާއި ތާރީޚަށް ޚިދުމަތްކުރާ ޤައުމީ މަރުކަޒުން ނެރުއްވި ފަތްތޫރަ މަޖައްލާއަށްވެސް ތަފާތު އެތައް ޅެންތަކެއް ހައްދަވައިދެއްވައިފައިވާ ބޭކަލެކެވެ. 

ޅެންވެރިކަމުގެ ރޮނގުން ކޮށްދެއްވި ޚިދުމަތްތަކުގެ އަގު ވަޒަންކޮށް އައްޑޫ އެވޯޑުގެ ޝަރަފްވެރި ބައިން ބަހާއި އަދަބަށް ޚިދުމަތް ކުރެއްވުމުގެ، އެވޯޑު ލަބީބަށް ލިބިވަޑައިގެންވެއެވެ. އަދި ގައުމީ ޚިދުމަތުގެ އެވޯޑުވެސް އެމަނިކުފާނަށް ލިބިވަޑައިގެންނަވާފައިވެއެވެ. 

ހަސަން ލަބީބަށް ގައުމީ ޚިދުމަތުގެ އެވޯޑު އެރުވުމުގެ ތެރެއިން-- 

މިއަހަރުގެ ޅެންވެރިންގެ ދުވަސް ފާހަގަކުރުމަށްވެސް ހާއްސަ ހަރަކާތްތަކެއް ކުރިއަށް ގެންދިޔުމަށް ނިންމާފައިވެއެވެ. އެގޮތުން ޅެންވެރިންގެ ދުވަހުގެ ހާއްސަ ޖަލްސާއާއި، ޚަބަރު ފަތުރާ ވަސީލަތްތައް މެދުވެރިކޮށް ކުރިއަށް ގެންދާ ހާއްސަ ޕްރޮގްރާމުތަކާއި، ސަމާސާ އަދަބުގެ ޅެން ހެދުމުގެ މުބާރާތެއްވެސް ބޭއްވުމަށް ވަނީ ހަމަޖެހިފައެވެ. މި ދުވަހުގެ ހަރަކާތްތައް ތިން ދުވަހުގެ މުއްދަތަށް ކުރިއަށް ގެންދިއުމަށް ވެސް ވަނީ ހަމަޖެހިފައެވެ.