އެމެރިކާއިން އީރާނަށް އަސްކަރީ ހަމަލާއެއް ދީފާނެކަމުގެ ބިރު ބޮޑުވެފައިވާ ދަނޑިވަޅެއްގައި، އީރާނަށް ހަމަލާދިނުމަށް ސައުދީ އަރަބިއްޔާގެ ބިމާއި ވައިގެ ސަރަހައްދު ބޭނުންކުރުމުގެ ހުއްދަ އެއްވެސް ފަރާތަކަށް ނުދޭނެކަން ސައުދީން އީރާނަށް އަންގައިފިއެވެ.

ސައުދީ ސަރުކާރާ ގާތްގުޅުމެއް އޮންނަ ދެ މަސްދަރަކުން އޭއެފްޕީ ނިއުސް އެޖެންސީއަށް މައުލޫމާތު ދިން ގޮތުގައި، މި މެސެޖު އީރާނަށް ރަސްމީކޮށް މިހާރު ވަނީ ފޮނުވާފައެވެ.

އެގޮތުން ސައުދީ އަސްކަރިއްޔާއާ ގާތް މަސްދަރުން ބުނީ، އީރާނާ ދެކޮޅަށް ހިންގާ އެއްވެސް އަސްކަރީ ހަރަކާތެއްގައި ސައުދީން ބައިވެރިނުވާނެ ކަމަށާއި، އެ ގައުމުގެ ސަރަހައްދު އެފަދަ ކަމަކަށް ބޭނުންކުރުމުގެ ފުރުސަތު ނުދޭނެ ކަމަށް ސީދާ އީރާނަށް އަންގާފައިވާ ކަމަށެވެ.

މި ނިންމުން ސައުދީން މި ނިންމީ، އީރާނުގައި ކުރިއަށްދާ މުޒާހަރާތައް ހުއްޓުވުމަށް އެ ގައުމުގެ ސަރުކާރުން ބާރުގެ ބޭނުންކުރަމުންދާތީ، އެކަމަށް ރައްދުދިނުމުގެ ގޮތުން އެމެރިކާއިން ހަމަލާއެއް ދީފާނެ ކަމުގެ އިންޒާރު ދީފައިވާ ވަގުތެއްގައެވެ.

މީގެ އިތުރުން، އެމެރިކާއިން ހަމަލާއެއް ދީފިނަމަ، ގަލްފް ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށާއި މުދާ އުފުލާ ބޯޓުފަހަރަށް ހަމަލާދޭނެ ކަމުގެ އިންޒާރު އީރާނުން ވެސް ވަނީ ދީފައެވެ.

މި ހަމަނުޖެހުންތަކާ ގުޅިގެން، ސައުދީގައި ހުންނަ އެމެރިކާގެ އެމްބަސީން ވަނީ އެ ގައުމުގައި ތިބި އެމެރިކާގެ މުވައްޒަފުން ސަމާލުވުމަށް އިލްތިމާސްކޮށްފައެވެ. އެމެރިކާގެ އަސްކަރީ ވަސީލަތްތައް ސައުދީ އަރަބިއްޔާ ހިމެނޭހެން ގަލްފުގެ އެކި ގައުމުތަކުގައި ގާއިމުކޮށްފައިވެއެވެ.

މި މައްސަލައިގައި ގަތަރުން ވެސް ވަނީ ފިޔަވަޅުތަކެއް އަޅަން ފަށާފައެވެ. ގަތަރުގެ އަލް އުދައިދު އެއާބޭސްގައި ތިބި ބައެއް މުވައްޒަފުން އެ ތަނުން ބަދަލުކުރަމުންދާ ކަމަށް އެ ގައުމުން ވަނީ ބުނެފައެވެ. ގަތަރުގެ އިންޓަނޭޝަނަލް މީޑިއާ އޮފީހުން ނެރުނު ބަޔާނެއްގައި ބުނީ، ސަރަހައްދީ މަސްލަހަތު ގޯސްވަމުންދާތީ ރައްޔިތުންނާއި ގައުމުގެ ސަލާމަތަށްޓަކައި އަޅަންޖެހޭ ހުރިހާ ފިޔަވަޅެއް އަޅަމުންދާ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ސީބީއެސް ނިއުސްއަށް ދިން އިންޓަވިއުއެއްގައި ބުނީ، އީރާނުގެ ސަރުކާރުން މުޒާހަރާގެ ބައިވެރިން ދަންޖައްސަން ފަށައިފިނަމަ، އެމެރިކާއިން ވަރުގަދަ ރައްދެއް ދޭނެ ކަމަށެވެ. "އެމީހުން އެފަދަ ކަމެއް ކޮށްފިނަމަ، އަހަރެމެން ވަރަށް ވަރުގަދަ ފިޔަވަޅެއް އަޅާނަން،" ޓްރަމްޕް ބުންޏެވެ.

ނަމަވެސް އިއްޔެ ފަހުން ދިން އިންޓަވިޔުއެއްގައި ޓްރަމްޕް ވަނީ އީރާނުން އެފަދަ ކަމެއް ކުރަން ނޫޅޭކަމަށް ބުނެފައެވެ.