މިދިޔަ ހަފުތާގައި އެކަނި ވެސް މާލެއާއި، ބުރިޖު އަދި ހައިވޭގައި 67 އެކްސިޑެންޓު ހިނގާފައިވާ ކަމަށް ފުލުހުން މިއަދު އާންމުކުރި ތަފާސްހިސާބުތަކުން ދައްކައިފިއެވެ. 

މި ތަފާސްހިސާބުތަކުން ދައްކާގޮތުގައި މިދިޔަ ހަފުތާގައި ހިނގާދިޔަ 67 އެކްސިޑެންޓުގެ ތެރެއިން 56 އެކްސިޑެންޓު ހިނގީ މާލޭގައެވެ.

މިދިޔަ ހަފްތާގައި އެންމެ ގިނަ އެކްސިޑެންޓު ހިނގާފައިވާކަމަށޤ ދައްކަނީ އެ ހަފުތާގެ އަންގާރަ ދުވަހުއެވެ. އެ ދުވަހު 13 އެކްސިޑެންޓު ފުލުހުންނަށް ރިޕޯޓުކުރިއިރު، ޖެހިގެން އައި ބުދަ ދުވަހު ވެސް 12 އެކްސިޑެންޓު ފުލުހުންނަށް ރިޕޯޓުކޮށްފައިވެއެވެ.

ފުލުހުން މައުލޫމާތުދޭގޮތުގައި މި އެކްސިޑެންޓުތަކުގެ ތެރެއިން މީހަކަށް ސީރިއަސް އަނިޔާއެއްވީ އެންމެ އެކްސިޑެންޓެއްގައެވެ. ބާކީ 66 އެކްސިޑެންޓުގައި އެއްވެސް ސީރިއަސް އަނިޔާއެއް މީހަކަށް ލިބިފައެއް ނުވެއެވެ. އެކަމަކު، އެ 67 އެކްސިޑެންޓުގައި ޖުމުލަ 87 އުޅަނދަކަށް ގެއްލުންވެފައިވެއެވެ.

މި ތަފާސްހިސާބުތަކުގައި ވާގޮތުން ސައިކަލަކާއި ސައިކަލެއް ޖެހިގެން 19 އެކްސިޑެންޓު ހިނގާފައިވެއެވެ. އަދި، ސައިކަލަކާއި ކާރެއް ޖެހިގެން ވެސް 19 އެކްސިޑެންޓު ހިނގާފައިވެއެވެ. އަދި ކާރަކާއި ކާރެއް ޖެހިގެން 6 އެކްސިޑެންޓު ހިނގާފައިވެއެވެ.

ފުލުހުންގެ ހިސާބުތަކުން ދައްކާ ގޮތުގައި މިދިޔަ ހަފުތާގައި އެންމެ ގިނަ އެކްސިޑެންޓު ހިނގީ ދުވާލު ގަޑީގައެވެ. އެ ގޮތުން، ދުވާލު 46 އެކްސިޑެންޓު ހިނގިއިރު، ރޭގަނޑު ހިނގީ 21 އެކްސިޑެންޓެވެ.

މާލެ ސަރަހައްދުގައި އެކްސިޑެންޓުތައް ހިނގުމަކީ ވަރަށް އާންމު ކަމެކެވެ. މިކަމާއި ގުޅިގެން އާއްމު ރައްޔިތުން ސަމާލުވުމަށް ފުލުހުން އަންނަނީ ތަރުކާރުކޮށޤ ހަނދާން އައު ކޮށްދެމުންނެވެ.