ގްރީންލޭންޑް މައްސަލާގައި އެމެރިކާގެ ސިޔާސަތާ ދެކޮޅުވާ ގައުމުތަކަށް އިތުރު ފިޔަވަޅުތައް އަޅަންޖެހިދާނެ ކަމުގެ އިންޒާރު އެމެރިކާގެ ރައީސް ޑޮނާލްޑް ޓްރަމްޕް ދެއްވައިފިއެވެ.

ވައިޓްހައުސްގައި ބޭއްވި ނުސްވެރިންގެ ބައްދަލުވުމުގައި ޓްރަމްޕް ވިދާޅުވީ، އެމެރިކާއިން ގްރީންލޭންޑް ހިފުމާ ދެކޮޅު ޤައުމުތަކަށް ޓެރިފް އިތުރުކުރަން ޖެހިދާނެކަމަށެވެ. ޓްރަމްޕް ވިދާޅުވީ، ގްރީންލޭންޑް އެމެރިކާގެ ބެލުމުގެ ދަށަށް ގެންނަނީ ރަނގަޅު ނިޔަތެއް އޮވެގެންކަމަށެވެ. އެގޮތުން އެމެރިކާގެ ޤައުމީ ސަލާމަތަށްޓަކައި ގްރީންލޭންޑް ހިފުމަކީ ކޮންމެހެން ކުރަންޖެހޭ ކަމެއްކަން ޓްރަމްޕް ވިދާޅުވިއެވެ.

އެމެރިކާއިން ގްރީންލޭންޑް ހިފުމާމެދު ދެކޮޅުވާ ޤައުމުތަކަށް ޓެރިފް ބޮޑުކޮށްގެން އަދަބު ދެއްވާނޭކަމަށް ވިދާޅުވިނަމަވެސް، އެއީ ކޮންކޮން ޤައުމުތަކެއްކަމެއް ބަޔާންކޮށްފައެއް ނުވެއެވެ.

ޓްރަމްޕް ވަނީ އެމެރިކާގެ ޤައުމީ ސަލާމަތާ ގުޅޭ ކަންކަމުގައި ނިންމާ ނިންމުންތަކަށް އިހުތިރާމް ނުކުރާ ޤައުމުތަކަށް ހެޔޮއެދުމުގެ މާނައެއް ނެތްކަން ފާހަގަކުރައްވާފައެވެ. 

ގްރީންލޭންޑް ހިފާނޭކަމަށް އެމެރިކާގެ ރައީސް ވިދާޅުވަމުންދާއިރު، ރިޕަބްލިކަން ޕާޓީން ވަނީ ގްރީންލޭންޑް ހިފައި އެ ސަރަހައްދުގެ މައްޗަށް ބާރު ފޯރުވުން ހުއްޓުވުމަށް އެމެރިކާގެ ސެނެޓަށް ބިލެއް ހުށަހަޅާފައެވެ. މި ބިލުގެ މަގްސަދަކީ ނޭޓޯގެ އެއްވެސް މެންބަރު ގައުމެއްގެ ސަރަހައްދެއް ބަންދުކުރުމަށް ނުވަތަ ހިފުމަށް ނޫނީ އެ ސަރަހައްދެއްގެ މައްޗަށް ބާރު ހިންގުމަށް އެމެރިކާގެ ދިފާއީ ވުޒާރާ އާއި ޚާރިޖީ ވުޒާރާގެ ފައިސާ ބޭނުންކުރުން މަނާކުރުމެވެ.

ގްރީންލޭންޑް ހިފުމަށް އެމެރިކާއިން ކުރަމުންގެންދާ މަސައްކަތްތަކުގެ ސަބަބުން ޔޫރަޕާއި އެމެރިކާގެ އޮންނަ އިގްތިސާދީ ގުޅުމަށް ބުރޫ އަރާފައިވާއިރު، ޓްރަމްޕް ވިދާޅުވެފައިވަނީ ބަޔަކު ރުހުނަސް ނުރުހުނަސް އެއީ އެމެރިކާއިން ކުރާނެކަމެއްކަމަށް ވިދާޅުވެފައެވެ.