ސައިބަރޓްރަކަކީ ޓެސްލާއިން މިހާތަނަށް ނެރުނު އެންމެ މޮޅު އުޅަނދުކަމަށް އީލޮން މަސްކް ބުނެފިއެވެ. 

އޭނާ މިހެން ބުނެފައިވަނީ މިއަދު 'އެކްސް' ގައި ކުރި ޓްވީޓެއްގައެވެ. މި ޓްވީޓާއި އެކު މުސްތަޤްބަލަށް އަމާޒުކޮށް އުފައްދާފައިވާ މި އިލެކްޓްރިކް ޕިކަޕާ މެދު އުފެދިފައިވާ ބަހުސްތައް އަނެއްކާވެސް ވަނީ ހޫނުވެފައެވެ. 

އާންމުކޮށް ފެންނަ ޕިކަޕްތަކުގެ ފަރުމާއާ މުޅިން ތަފާތު ގޮތަކަށް އުފައްދާފައިވާ ސައިބަރ ޓްރަކްގައި "ސްޓެއިންލެސް-ސްޓީލް އެކްސޯސްކެލެޓަން" ނުވަތަ ދަގަނޑު އޮނިގަނޑަކާއި، ތަފާތުއެކި ސިފަތައް އެކުލެވިގެންވާ އިެލކްޓްރިކް ވެހިކަލްއެކެވެ. ޓެސްލާއިން އުފައްދާފައިވާ މި އުޅަނދު އެއްފަހަރު ޗާޖުކޮށްލައިގެން ވެސް 325 މޭލަށް ދަތުރުކުރެވެއެވެ. އަދި މީގެ އެންމެ މަތީ ފަންތީގެ "ސައިބަރބީސްޓް" މޮޑެލްއަކީ ތިން ސިކުންތުގެ ތެރޭގައި 60 މޭލުގެ ބާރުމިނަށް ދުވެލި އިތުރުކޮށްލުމުގެ ގާބިލުކަން ލިބިފައިވާ ވެހިކަލްއެކެވެ.

މި އުޅަނދުގައި ހާލަތާ އެއްގޮތަށް ބަދަލުވާ އެއަރ ސަސްޕެންޝަނާއި، މުދާ އުފުލުމަށް ހާއްސަ ބަޔަކާއި، ކަރަންޓު ސާމާނު ބޭނުންކުރުމަށް ޚާއްޞަ އައުޓްލެޓްތަކުގެ އިތުރުން ޓެސްލާގެ އެންމެ ޒަމާނީ "އޮޓޯޕައިލެޓް" އަދި އިޚްތިޔާރީގޮތުން ހިމަނައިދޭ "ފުލް ސެލްފް-ޑްރައިވިންގ" ސޮފްޓްވެއަރވެސް ހިމެނެއެވެ.

މި އުޅަނދުގެ އެތެރެ ފަރުމާކޮށްފައިވަނީ އެންމެ ފަހުގެ ޒަމާނީ ޓެކްނޮލޮޖީ ހިމަނައިގެންނެވެ. އެގޮތުން މި ޓްރަކް މެދުގައި ބޮޑު ޓަޗްސްކްރީނާއި، ފަހަތުގައި ތިބޭ ފަސިންޖަރުންނަށް ޚާއްޞަ ޑިސްޕްލޭއެއް ހިމެނެއެވެ. މި އުޅަނދަކީ ޓެސްލާގެ "ސުޕަރޗާޖަރ" ނެޓްވޯކާ ގުޅޭ އުޅަނދަކަށްވުމުން، ދިގު ދަތުރުތަކުގައި ވަރަށް އަވަހަށް ޗާޖުކޮށްލެވެއެވެ.

އީލޮން މަސްކް މި ޓްރަކްގެ މޮޅުވާހަކަ ދައްކަމުންދިޔަ ނަމަވެސް އޭގެ ވިޔަފާރި ނިސްބަތުން ދަށެވެ. މީގެ މައިގަނޑު ސަބަބުތަކުގެ ތެރޭގައި އުޅަނދުގެ އަގު ބޮޑުވުމާއި، ފަންނީ މައްސަލަތަކާ ހުރެ އަނބުރާ ގެންދަން ޖެހުމުގެ އިތުރުން، އޭގެ ތަފާތު ފަރުމާ އާންމުންނަށް ބަލައިގަންނަން އުނދަގޫވުން ހިމެނެއެވެ. 

ކަމާއިބެހޭ މާހިރުން ދެކޭގޮތުގައި ސައިބަރޓްރަކަކީ ޓެކްނޮލޮޖީގެ ގޮތުން ފާހަގަކޮށްލެވޭ އާދަޔާޚިލާފު އުފެއްދުމެކެވެ. އެހެންނަމަވެސް، އާންމު ބާޒާރުގައި މި އުޅަނދަށް ބޮޑު ކާމިޔާބީއެއް ލިބިދާނެތޯ ކުރެވޭ ސުވާލުތަކަށް އަދިވެސް ވަނީ އެކަށީގެންވާ ޖަވާބެއް ނުލިބިފައެވެ.