ސައުދީ އަރަބިއްޔާގެ މަގުމަތީގައި ހިނގަން ދިޔަ ނުރައްކާތެރި އެކްސިޑެންޓަކުން، މަންމައަކާއި އޭނާގެ ދަރިން ސަލާމަތްކުރި ހިތްވަރުގަދަ އަންހެން މީހާއަށް އެންމެފަހުގެ އަގުބޮޑު އާ ކާރެއް ހަދިޔާކޮށްފައެވެ.

މި ހާދިސާ ހިނގާފައިވަނީ ސައުދީ އަރަބިއްޔާގެ އަބޫ އަރީޝް ސަރަހައްދުގައެވެ. ހާދިސާ ހިނގަން މެދުވެރިވީ، މަގުގެ އެއްފަރާތުގައި ޕާކުކޮށްފައި އޮތް ކާރެއްގެ ޑްރައިވަރު، ހޭންޑްބްރޭކް ޖައްސަން ހަނދާންނެތި ކާރުން ފޭބުމާ ގުޅިގެންނެވެ. އެވަގުތު ކާރުގެ ތެރޭގައި މަންމައަކާއި ކުޑަ ދަރިން ތިބިއިރު އެމީހުން ތިއްބާ ކާރު ފަހަތަށް ދުވަން ފަށައި، ބާރު ބޮޑު މަގުގެ ތެރެއަށް ދާން ފެށިއެވެ.

މި ނުރައްކާތެރި ވަގުތު، "ދުޚޫން އަލް އިމާރާތިއްޔާ" ގެ އަބޫ އަރީޝް ބްރާންޗުގައި ސުޕަވައިޒަރެއްގެ ގޮތުގައި މަސައްކަތްކުރާ ހިތްވަރުގަދަ ސައުދީ އަންހެނެއް ކަމަށްވާ ލައިލާ އަހުމަދު ވަނީ ވަގުތުން ހަރަކާތްތެރިވެފައެވެ.

އެގޮތުން އޭނާ ދުވެފައި ގޮސް، ފަހަތަށް ދަތުރުކުރަމުންދިޔަ ކާރުގެ ތެރެއަށް ވަދެ، ކާރު ކޮންޓްރޯލްކޮށް ހުއްޓުވިއެވެ. މި ހިތްވަރުގަދަ އަމަލުގެ ސަބަބުން ކާރުގައި ތިބި އާއިލާ ބޮޑު ނުރައްކަލަކުން ވަނީ ސަލާމަތްވެފައެވެ.

މި ހާދިސާގެ ވީޑިއޯ މީސްމީޑިއާގައި އާންމުވުމާއެކު، ގިނަ ބައެއްގެ ތައުރީފު އެ އަންހެން މީހާއަށް ވަނީ ލިބިފައެވެ. މީސްމީޑިއާގައި އޭނާއަށް ނިސްބަތްކޮށް "ޖީޒާންގެ ބަތަލާ" ގެ ނަމުން ހޭޝްޓެގްތައް ވެސް ވަނީ ބޭނުންކުރަން ފަށާފައެވެ. 

އެކަމާ ގުޅޭގޮތުން ދިން އިންޓަވިޔުއެއްގައި އަންހެން މީހާ ވަނީ އޭނާ އަކީ އާއްމު ދިރިއުޅުމުގައިވެސް ހަރަކާތައް އަވަސް މަސައްކަތަށް ފަރުވާ ބަހައްޓާ މީހެއް ކަމަށް ބުނެފައެވެ. އަދި އެ ހާދިސާގައި އެހާ އަވަސް ފިޔަވަޅެއް އެޅުނީވެސް އެހެންވެ ކަމަށް ވަނީ ބުނެފައެެވެ.  

އެ އަންހެންމީހާ މަސައްކަތްކުރާ ޔޫއޭއީގެ "ދުޚޫން" ކުންފުނިން ވަނީ އޭނާގެ މި ހިތްވަރުގަދަ މަސައްކަތުގެ އަގުވަޒަންކޮށްފައެވެ. އެގޮތުން އެ ކުންފުނިން ވަނީ އެންމެ ފަހުގެ 2026 ވަނަ އަހަރުގެ މޮޑެލްއެއްގެ އެންމެ އައު ކާރެއް އޭނާއަށް ހަދިޔާކޮށްފައެވެ. އެ ކުންފުނިން ބުނީ އެފަދަ ހިތްވަރުގަދަ މުވައްޒަފަކު އެ ކުންފުނީގައި މަސައްކަތް ކުރާތީ ފަޚުރުވެރިވާ ކަމަށެވެ.