މި ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ކުރިއަށް ގެންދާ "ޢާއިލީ ބޯހިޔާވަހިކަން" ޕްރޮގްރާމުން ދޫކުރުމަށް ހަމަޖެހިފައިވާ ފްލެޓާއި ގޯއްޗަށް ކުރިމަތިލުމުގެ ފުރުސަތު ހުޅުވާލައިފިއެވެ.

ގޯއްޗާއި ފުލެޓަށް އެދި ހުށަހަޅަންޖެހެނީ ”ބޯހިޔާވަހިކަން އެންމެނަށް“ ޕޯޓަލް މެދުކޮށެވެ. ޕޯޓަލްގެ ލިންކަކީ ‪boahiyaavahikan.housing.gov.mv‬⁩ އެވެ. ފުލެޓަށް އެދުމުގެ ފުރުސަތު މިއަދުން ފެށިގެން 17 އެޕްރީލްވާ ހުކުރު ދުވަހުގެ 23:59 ނިޔަލަށް ހުޅުވާލާފައިވާ ކަމަށް ހައުސިން މިނިސްޓްރީން ބުނެއެވެ.

އަދި ގޯއްޗަށް އެދުމުގެ ފުރުސަތު ހުޅުވާލާއިވަނީ 04 މާރިޗު 2026 ވާ ބުދަ ދުވަހުގެ 23:59 ގެ ނިޔަލަށް ކަމަށްވެސް ބުންޏެވެ. 

ފުލެޓާއި ގޯތި ދޫކުރުމާބެހޭ އިތުރު މައުލޫމާތު ހޯދުމަށް މިނިސްޓްރީގެ ހޮޓްލައިންނަންބަރު 4004-861, 4004-860, 4004-863, 4004-862, 4004-864,ނުވަތަ 4004-865 ގުޅުމަށް އެދިފައިވެއެވެ. އަދި އެ މިނިސްޓްރީގެ  އީމެއިލް:[email protected]އަށް ހުށަހަޅައިގެންވެސް މަޢުލޫމާތު ސާފުކުރެއްވޭނެއެވެ. 

ހައުސިން މިނިސްޓްރީން ބުނެފައިވާގޮތުން، މި އުސޫލުގެ ދަށުން ފްލެޓަށް އެދި ހުށަހަޅާނީ ކޮންމެ ފަރާތަކުން ވަކި އެޕްލިކޭޝަނެއް ކަމަށެވެ. ނަމަވެސް މި ދެ އުސޫލުގެ ދަށުން ޝަރުތު ފުރިހަމަވާ ދެމަފިރިންނަމަ، އެޕްލިކޭޝަން ހުށަހަޅަންވާނީ ދެމަފިރިން އެކުގައި ޖޮއިންޓް އެޕްލިކޭޝަނެކެވެ. އަދި ދެމަފިރިންގެ ތެރެއިން އެކަކު ޝަރުތު ފުރިހަމަނުވާ ބައެއް ހާލަތްތަކުގައި ޝަރުތު ފުރިހަމަވާ ފަރާތަށް ވަކި އެޕްލިކޭޝަނެއް ހުށަހެޅޭނެކަމަށްވެސް ބުންޏެވެ.

- ފުލެޓު ނުވަތަ ގޯތީގެ މައި ކެޓަގަރީތަކުން މައި އެޕްލިކަންޓު ޝަރުތު ފުރިހަމަވާ ކެޓަގަރީއަށް ހުށަހެޅުމާއެކު މައި އެޕްލިކަންޓު ޝަރުތު ފުރިހަމަވާ ޚާއްސަ ކެޓަގަރީތަކަށްވެސް އެޕްލިކޭޝަން ހުށަހެޅިދާނެ ކަމަށާ ނަމަވެސް އެމީހަކަށް މި ސްކީމްގެ ދަށުން ބޯހިޔާވަހިކަން ލިބޭނީ ޝަރުތުހަމަވާ ކޮންމެވެސް އެއް ކެޓަގަރީއަކުން ކަމަށް މިނިސްޓްރީން ބުނެއެވެ.