"ބޯހިޔާވަހިކަން އެންމެންނަށް" ސިޔާސަތުގެ ދަށުން ކުރިއަށް ގެންދާ "ޢާއިލީ ބޯހިޔާވަހިކަން" ޕްރޮގްރާމުން ދޫކުރުމަށް ހަމަޖެހިފައިވާ ފްލެޓަށް ކުރިމަތިލާ ފަރާތްތަކަށް ގޯއްޗަށް ކުރިމަތި ނުލެވޭނެކަށް ހައުސިން މިނިސްޓްރީން ބުނެފިއެވެ.

މި ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ކުރިއަށް ގެންދާ "ޢާއިލީ ބޯހިޔާވަހިކަން" ޕްރޮގްރާމުން ދޫކުރުމަށް ހަމަޖެހިފައިވާ ފްލެޓާއި ގޯއްޗަށް ކުރިމަތިލުމުގެ ފުރުސަތު ހުޅުވާލައިފިއެވެ.

ގޯއްޗާއި ފުލެޓަށް އެދި ހުށަހަޅަންޖެހެނީ ”ބޯހިޔާވަހިކަން އެންމެނަށް“ ޕޯޓަލް މެދުކޮށެވެ. ޕޯޓަލްގެ ލިންކަކީ ‪boahiyaavahikan.housing.gov.mv‬⁩ އެވެ. ފުލެޓަށް އެދުމުގެ ފުރުސަތު މިއަދުން ފެށިގެން 17 އެޕްރީލްވާ ހުކުރު ދުވަހުގެ 23:59 ނިޔަލަށް ހުޅުވާލާފައިވާ ކަމަށް ހައުސިން މިނިސްޓްރީން ބުނެއެވެ.

އަދި ގޯއްޗަށް އެދުމުގެ ފުރުސަތު ހުޅުވާލާއިވަނީ 04 މާރިޗު 2026 ވާ ބުދަ ދުވަހުގެ 23:59 ގެ ނިޔަލަށް ކަމަށްވެސް ބުންޏެވެ. 

ބޯހިޔާވަހިކަން އެންމެނަށް ސިޔާސަތުގެ ދަށުން ފުލެޓާއި ގޯތި ދޫކުރުމުގެ އުސޫލުގައިވާގޮތުން، ކޮންމެ ފަރާތަކަށްވެސް އެޕްލައިކުރެވޭނީ އެއް ސްކީމަކަށެވެ. 

އަދި މި އުސޫލުގެ ދަށުން ފްލެޓަށް އެދި ހުށަހަޅާނީ ކޮންމެ ފަރާތަކުން ވަކި އެޕްލިކޭޝަނެއް ކަމަށެވެ. ނަމަވެސް މި ދެ އުސޫލުގެ ދަށުން ޝަރުތު ފުރިހަމަވާ ދެމަފިރިންނަމަ، އެޕްލިކޭޝަން ހުށަހަޅަންވާނީ ދެމަފިރިން އެކުގައި ޖޮއިންޓް އެޕްލިކޭޝަނެކެވެ.

ދެމަފިރިންގެ ތެރެއިން އެކަކު ޝަރުތު ފުރިހަމަނުވާ ބައެއް ހާލަތްތަކުގައި ޝަރުތު ފުރިހަމަވާ ފަރާތަށް ވަކި އެޕްލިކޭޝަނެއް ހުށަހެޅޭނެކަމަށްވެސް ބުންޏެވެ.

މީގެ އިތުރުން ވަޒީފާއަށް ނުދާ ފަރާތްތަކަށްވެސް އެޕްލިކޭޝަން ހުށަހެޅޭނެ ކަމަށާ ވަޒީފާއަކަށް ނުދިޔަނަމަވެސް އެމީހަކީ އެއްވެސް އާމްދަނީއެއް ހޯދުމަށް މަސައްކަތެއްކުރާ ފަރާތެއްނަމަ އެކަން ސާބިތުކޮށްދިނުމުގެ ލިޔުން ހުށަހެޅޭނެ ކަމަށް ބުނެފައިވެއެވެ. 

މީގެ އިތުރުންވެސް ގޯއްޗާއި ފުލެޓަށް އެދޭ ފަރާތްތަކުން ހުށަހަޅަންޖެހޭޱލިޔެކިޔުން ތަކާއި އެހެނިހެން މައުލޫމާތު އެ އުސޫލުގައި ހާމަކޮށްފައިވެއެވެ. އެ އުސޫލު ބޯހިޔާވަހިކަން އެންމެނަށް ޕޯޓަލްއިން ބަލައިލެވޭނެއެވެ.