އިންޑޮނޭޝިއާގެ ކަނޑުގެ ސަރަޙައްދު ބެލެހެއްޓުމުގެ މަސައްކަތުގައި އުޅެނިކޮށް، މިދިޔަ ހޮނިހިރު ދުވަހު ވީނުވީއެއް ނޭނގި ގެއްލުނު މަތިންދާބޯޓުގެ ބައިތައް އެޤައުމުގެ ކަމާބެހޭ ފަރާތްތަކުން ހޯދައިފިއެވެ.
މި ބޯޓުން ދަތުރުކުރި 11 މީހުންގެ ތެރޭގައި ހިމެނެނީ ފަޅުވެރިންގެ 8 މީހުންނާއި ސަރުކާރުގެ 3 އޮފިޝަލުންނެވެ.
"އިންޑޮނޭޝިއާ އެއަރ ޓްރާންސްޕޯޓް" އިން އޮޕަރޭޓްކުރާ އޭ.ޓީ.އާރް 42-500 މަރުކާގެ މި ބޯޓު ރާޑާރުން ގެއްލިފައިވަނީ ޔޮގްޔަކާޓާ އިން މަކައްސަރަށް ދަތުރުކުރަނިކޮށް، ދެކުނު ސުލަވެސީގެ ފަރުބަދަތައް ހިމެނޭ ސަރަޙައްދެއް ކަމަށްވާ މައުންޓް ބުލުސަރައުންގް ކައިރިންނެވެ.
ބޯޓު ހޯދުމުގެ މަސައްކަތުގައި އިންޑޮނޭޝިއާގެ ނޭޝަނަލް ސާޗް އެންޑް ރެސްކިއު އެޖެންސީ (ބަސަރްނަސް) އާއި ސިފައިންނާއި ފުލުހުންގެ އިތުރުން ގިނަ އަދަދެއްގެ ދަރުމަވެރިން ވަނީ ބައިވެރިވެފައެވެ. ބޯ ދުންފިންޏާއި، ބާރުވައި އަދި ވެހެމުންދިޔަ ބޯ ވާރޭގެ ސަބަބުން މި މަސައްކަތަށް ބޮޑެތި ގޮންޖެހުންތަކެއް ކުރިމަތިވި ނަމަވެސް، މިއަދުގެ ހެނދުނު ވަގުތު ވަނީ ބޯޓުގެ ބައިތަކަކާއި ބައެއް ކުޑަދޮރުތައް ވެސް ފެނިފައެވެ. މިހާތަނަށް މަރުވެފައިވާ ފިރިހެނެއްގެ ހަށިގަނޑު ފެނިފައިވާއިރު، އިތުރު މީހުން ހޯދުމުގެ މަސައްކަތް މެދުކެނޑުމެއް ނެތި ދަނީ ކުރަމުންނެވެ.
ބޯޓު ވެއްޓެން ދިމާވި ސަބަބު ކަމާބެހޭ ފަރާތްތަކުން އަދި ކަށަވަރުކޮށްދީފައެއް ނުވެއެވެ. ތަޙުޤީޤު ކުރާ ފަރާތްތަކުން މިހާރު ދަނީ އެ ސަރަޙައްދު ބަލައި ފާސްކޮށް، ހެކި އެއްކުރުމުގެ މަސައްކަތް ކުރަމުންނެވެ. މި ބޯޓަކީ އިންޑޮނޭޝިއާގެ މިނިސްޓްރީ އޮފް މެރިން އެފެއާޒް އެންޑް ފިޝަރީޒްގެ ބޭނުމަށް، އެޤައުމުގެ ބޮޑު ކަނޑުގެ ސަރަޙައްދު މޮނިޓަރ ކުރުމަށްޓަކައި ޗާޓަރުކޮށްގެން ދަތުރުކުރި ބޯޓެކެވެ.
މި ހާދިސާއަކީ އިންޑޮނޭޝިއާގެ ވައިގެ ދަތުރުފަތުރުގެ ދާއިރާގައި ހިނގި ނުރައްކާތެރި ހާދިސާއަކަށް ވާއިރު، މިއީ އެޤައުމުގެ ފަރުބަދަތައް ހިމެނޭ ސަރަޙައްދުތަކުގައި ދަތުރުކުރާ އުޅަނދުތަކުގެ ސަލާމަތީ ކަންކަމާމެދު އޮތް ކަންބޮޑުވުންތައް އިތުރުވެގެންދިޔަ ކަމެކެވެ.
Advertisement
This content is created and paid for by advertisers and does not involve Voice Journalists
