އެމެރިކާގައި، މުސްހަފު އަންދަން އުޅުނު މީހަކު ހުއްޓުވައި، ލަދުގަންނުވާލައިފި
އެމެރިކާގެ މިންނިއަޕޮލިސް ސިޓީގެ ސިޓީ ހޯލް ކުރިމަތީގައި މުޞްޙަފް އަންދާނެ ކަމަށް ބުނެ އިންޒާރުދީ، މުސްލިމުންނަށް ފުރައްސާރަކުރަން އުޅުނު ހަރުކަށި ފިކުރުގެ އެކްޓިވިސްޓަކަށް ގިނަ އަދަދެއްގެ ބަޔަކު ނިކުމެ ހުރަސްއަޅައި، އޭނާ އެ ސަރަހައްދުން ފަހާލައިފިއެވެ.
މި ހަރަކާތް ރޭވީ 2021 ވަނަ އަހަރުގެ ޖެނުއަރީ 6 ގައި އެމެރިކާގެ ކެޕިޓަލް ހިލްއަށް ވަދެގަތް މައްސަލާގައި ހިމެނޭ، އަދި ފަހުން މައާފު ދީފައިވާ ޖޭކް ލޭންގް ނަމަކަށް ކިޔާ މީހެކެވެ. އޭނާ އަކީ މީގެ ކުރިންވެސް މުސްޙަފް އެންދުމުގެ ހަރަކާތް ބާއްވާފައިވެއެވެ.
"މާޗް އެގެއިންސްޓް މިނެސޮޓާ ފްރޯޑް" ގެ ނަމުގައި އޭނާ ބޭއްވި މި އެއްވުމުގެ އަސްލު ބޭނުމަކީ މުސްލިމުން ރުޅިއަރުވާލައި ދީނަށް ފުރައްސާރަ ކުރުމެވެ.
ހޮނިހިރު ދުވަހުގެ މެންދުރުގެ ވަގުތެއްގައި ލޭންގް އާއި އޭނާގެ މަދު ސަޕޯޓަރުންތަކެއް ސިޓީ ހޯލް ކައިރިއަށް އެއްވި ނަމަވެސް، އެމީހުންނާ ދެކޮޅަށް ވަރަށް ގިނަ އަދަދެއްގެ ބަޔަކު އެ ސަރަހައްދަށް އެއްވިއެވެ.
އެގޮތުން މުޞްޙަފް އަންދާނެ ކަމަށް ބުނެ ލޭންގް ދިން އިންޒާރާ ގުޅިގެން ނިކުތް މީހުން ވަނީ، އޭނާގެ އަޑު ކަނޑުވާލުމަށްޓަކައި އަޑުގަދަކޮށްފައެވެ. އަދި ބައެއް މީހުން ވަނީ އޭނާގެ ގަޔަށް ފެން ޖަހައި ހަމަލާދީފައެވެ.
މުޞްޙަފް އަންދަން އޭނާ ކަނޑައެޅި ވަގުތު ޖެހުނުއިރު، އިދިކޮޅު މީހުން ވަނީ އޭނާ ވަށާލައި، ހުރަސް އަޅާފައެވެ.
އަދި، ލޭންގް އެ ސަރަހައްދުން ދާން މަސައްކަތް ކުރުމުން، މުޒާހަރާގެ ބައިވެރިން އޭނާ ފަހާ ދުވެ، ކޮއްޕައި ހަމަލާދީފައިވެއެވެ. އޭނާ އެ ސަރަހައްދުން ފިލަން ދުވުނުއިރު ބޮލުގެ ފަހަތުން ލޭ އަންނަ މަންޒަރު ވީޑިއޯތަކުން ފެނެއެވެ. ސަލާމަތްވުމަށްޓަކައި ކައިރީގައި ހުރި "ހޮޓެލް އިންޑިގޯ" އަށް ވަދެ އޭނާ ފިލާފައިވާއިރު، މުޒާހަރާގެ ބައިވެރިން ވަނީ ހޮޓަލުގެ ބޭރުގައި ތިބެ ބިއްލޫރިގަނޑުތަކުގައި ތަޅައި އަޑުގަދަކޮށްފައެވެ.
މި ހާދިސާއާ ގުޅިގެން ފުލުހުން އެ ސަރަހައްދަށް އައިސް، މަގުތައް ބަންދުކޮށްގެން ތިބި މީހުން ދިއުމަށް އަމުރުކުރިއެވެ. އެންމެން ވަނީ އެ ސަރަހައްދުން ފައްސާލާފައެވެ.
Advertisement
This content is created and paid for by advertisers and does not involve Voice Journalists
