މޮރޮކޯގައި ކުރިއަށްދިޔަ އެފްރިކާ ކަޕް އޮފް ނޭޝަންސްގެ ފޯރިގަދަ އަދި ހަމަނުޖެހުން ބޮޑު ފައިނަލް މެޗުގައި، މުބާރާތް ބާއްވާ ގައުމު ކަމަށްވާ މޮރޮކޯ 1-0 އިން ބަލިކޮށް ސެނެގާލުން މުބާރާތުގެ ތަށި އުފުލާލައިފިއެވެ.

އާދީއްތަ ދުވަހު ކުޅުނު މި ފައިނަލް މެޗުގެ ފުރިހަމަ ވަގުތު ހަމަވިއިރު ދެ ޓީމު އޮތީ އެއްވަރުވެފައެވެ. ސެނެގާލް މޮޅުވި ލަނޑު އިތުރު ވަގުތުގެ ފުރަތަމަ ހާފުގައި ކާމިޔާބުކޮށްދިނީ ޕާޕޭ ގޭއެވެ. އިތުރު ވަގުތުގެ ހަތަރުވަނަ މިނެޓުގައި އޭނާ މި ލަނޑު ޖެހީ ލިބުނު ފުރުސަތެއްގައި ވާތު ފައިން ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެންނެވެ.

މި މެޗުގެ ތެރެއިން ދަނޑުމަތީގައި ބޮޑެތި ހަމަނުޖެހުންތަކެއް ހިނގާފައިވެއެވެ. މެޗުގެ ފުރިހަމަ ވަގުތު ހަމަވާން ކައިރިވެފައި ވަނިކޮށް، ސެނެގާލުން ޖެހި ލަނޑެއް ގަބޫލުނުކޮށް، އަނެއްކޮޅުން މޮރޮކޯއަށް ޕެނަލްޓީއެއް ދޭން ނިންމުމާ ގުޅިގެން ސެނެގާލްގެ ކުޅުންތެރިން ވަނީ އިހުތިޖާޖުކުރުމުގެ ގޮތުން ދަނޑުން ފައިބައިގެން ގޮސްފައެވެ. މި ނިންމުމުގެ ސަބަބުން ދެ ޓީމުގެ ބަދަލު ކުޅުންތެރިންނާއި އޮފިޝަލުންގެ މެދުގައި މާރާމާރީ ހިނގާފައިވެއެވެ.

މީގެ އިތުރުން، ސެނެގާލްގެ ބައެއް ސަޕޯޓަރުން ވަނީ ދަނޑަށް އަރަން މަސައްކަތްކޮށް، ފޮޓޯގްރާފަރުން ތިބި ސަރަހައްދަށް ފުންމާލައިފައެވެ. ބައެއް ސަޕޯޓަރުން ދަނޑު ތެރެއަށް ގޮނޑި އުކާފައިވާއިރު، ފުލުހުންނަށް ޖެހުނީ ބާރުގެ ބޭނުންކޮށްގެން ސަޕޯޓަރުން ހުއްޓުވާށެވެ. މި ހަމަނުޖެހުންތަކާ ގުޅިގެން މެޗު 14 މިނެޓަށް މެދުކަނޑާލަން ޖެހުނެވެ.

މެޗު އަލުން ފެށުމަށްފަހު، ފުރިހަމަ ވަގުތުގެ އެންމެ ފަހު ވަގުތުކޮޅު މޮރޮކޯގެ ބްރަހިމް ޑިއާޒް ފޮނުވާލި ޕެނަލްޓީ ސެނެގާލްގެ ކީޕަރު އެޑޮއާޑް މެންޑީ ވަނީ ހުށިޔާރުކަމާއެކު ދިފާއުކޮށްފައެވެ. އިތުރު ވަގުތުގެ ކުޅުން ކުރިއަށް ގެންދިޔައީ ދަނޑުގެ ސަލާމަތީ ކަންކަން ވަރުގަދަކޮށް، ގިނަ އަދަދެއްގެ ފުލުހުން ސަޕޯޓަރުންގެ ކުރިމަތީގައި ސަފު ހަދައިގެން ތިބެގެންނެވެ.

މިއީ ސެނެގާލުން އެފްރިކާ ކަޕް އޮފް ނޭޝަންސް ކާމިޔާބުކުރި ދެވަނަ ފަހަރެވެ. އެޓީމުން އެންމެ ފުރަތަމަ މި މުބާރާތް ކާމިޔާބުކުރީ 2021 ވަނަ އަހަރުގެ ފައިނަލްގައި މިޞްރު ބަލިކޮށްގެންނެވެ.