ސްރީލަންކާއަށް ދަތުރުކުރާ ދިވެހިން އިލެކްޓްރޯނިކް ޓްރެވަލް އޮތޮރައިޒޭޝަން (އީޓީއޭ) ހުށަހަޅަން ނުޖެހޭނޭކަމަށްބުނެ، އެޤައުމުގެ ސަރުކާރުން އެކަން ހަނދާންކޮށްދީފިއެވެ.

މިކަމާ ގުޅޭގޮތުން ރާއްޖޭގައި ހުންނަ ލަންކާގެ އެމްބަސީން ނެރުނު ނޯޓިހެއްގައި ބުނެފައިވަނީ، އެޤައުމަށް ޒިޔާރަތްކުރާ ދިވެހިންނަށް 90 ދުވަހުގެ އޮންއެރައިވަލް ވިސާ ވަގުތުން ލިބޭނޭކަމަށް ބުނެފައެވެ. އަދި އެ ވިސާގައި އެޤައުމަށް ދަތުރުކުރާއިރު، އީޓީއޭ ހުށަހަޅަން ނުޖެހޭނޭކަމަށްވެސް ވަނީ ބުނެފައެވެ.

ރާއްޖޭގައި ހުންނަ ސްރީލަންކާގެ އެމްބަސީން މިފަދަ ނޯޓިހެއް ނެރެފައިމިވަނީ، މިފަހުން އެޤައުމުގައި ހުންނަ ދިވެހި ސަފީރު ވިސާގެ ކަންތަކުގައި ވާހަކަތަކެއް ދައްކަވާފައިވަނިކޮށެވެ.

ސްރީލަންކާގައި ހުންނަވާ ދިވެހި ސަފީރު މަސްއޫދު އިމާދު އެޤައުމުގެ ނޫހަކަށް ދެއްވި ބަސްދީގަތުމެއްގައި ވިދާޅުވެފައިވަނީ، ސްރީލަންކާއަށް ޒިޔާރަތްކުރާ އަދި އެ ގައުމުގައި ދިރިއުޅޭ ދިވެހި ރައްޔިތުންނަށް ވިސާ ހޯދުމުގައި އެ ގައުމުގެ އިމިގްރޭޝަން ޑިޕާޓްމަންޓުގެ އޮފިޝަލުންގެ ފަރާތުން ދަތިތައް ކުރިމަތިކުރުވަމުންދާކަމަށެވެ. އެގޮތުން ދިވެހި ރައްޔިތުން ވިސާ ހޯދުމަށްޓަކައި ހެނދުނު 9:00 އިން ހަވީރު 5:00 އަށް އިމިގްރޭޝަން އޮފީހުގެ ދިގު ކިއުތަކުގައި މަޑުކުރަން ޖެހޭކަން ފާހަގަކުރައްވައި ސަފީރު ވިދާޅުވީ، އެހެން ގައުމުތަކުން ޒިޔާރަތްކުރާ މީހުންނަށް ހުންނަފަސޭހަތައް ދިވެހިންނަށް ނުލިބޭކަން ފާހަގަ ކުރައްވާފައެވެ.

ސަފީރު ވިދާޅުވީ، ހަމުގެ ކުލަ އަލި މީހުންނަށް އެކަނި އިސްކަންދީ، އެ މީހުންނަކީ ހަމައެކަނި ޒިޔާރަތްކުރާ މީހުންގެ ގޮތުގައި އިމިގްރޭޝަން އޮފިޝަލުން ދެކޭ ކަމަށާއި، އަދި ވަކިން ހުށަހަޅާ ވިސާ އެޕްލިކޭޝަންތަކަށް ގިނަ ވަގުތު ހޭދަވި ނަމަވެސް، ޓްރެވަލް އެޖެންޓުން މެދުވެރިކޮށް ހުށަހަޅާ ފޯމުތަކަށް އެއްވެސް ދަތިކަމެއް ނެތި ވަގުތުން ވިސާ ލިބޭކަމަށެވެ. މިއީ އިމިގްރޭޝަންގެ ތެރޭގައި ހިނގާ މާލީ މަންފާތަކަކާ ގުޅުންހުރި ކަމެއް ކަމަށްވެސް އޭނާ ތުހުމަތު ކުރެއްވިއެވެ.

ޚާއްޞަކޮށް ކިޔަވާ ކުދިންނާއި ބެލެނިވެރިން ވިސާ ހޯދުމަށް ގިނަ ގަޑިއިރުތަކެއް ވަންދެން މަޑުކުރަން ޖެހުމަކީ ބަލައިގަނެވޭނެ ކަމެއް ނޫން ކަމަށް މަސްއޫދު ވިދާޅުވިއެވެ. އަދި މިކަން މިގޮތަށް ކުރިއަށްދާނަމަ، ސްރީލަންކާގެ ޕްރޮފެޝަނަލުންނަށް ރާއްޖެއިން ވިސާ ދޫކުރުމުގައި ގެންގުޅޭ އުސޫލުތައް މުރާޖައާކުރަން ރާއްޖެއަށް މަޖުބޫރުވާނެ ކަމުގެ އިންޒާރުވެސް ސަފީރު ދެއްވިއެވެ.