ޓެކްސީ ޑްރައިވަރުން ތަމްރީނު ކުރުމާއި ތާޒާކުރުމަށް ކުރިއަށްގެންދާ ސިލްސިލާ ޕްރޮގްރާމް ފުލުހުން ފަށައިފިއެވެ.

މިކަމާ ބެހޭގޮތުން ފުލުހުން ބުނީ ރޯޑް ސޭފްޓީ އެވެއާނަސް އެންޑް ޕްރިވެންޝަނުން ކުރިއަށްގެންދިޔަ މި ޕްރޮގްރާމަކީ ޓެކްސީގެ ހިދުމަތަށް އަލަށް ނުކުންނަ މީހުންނާއި ޓެކްސީ ޑްރައިވަރުންގެ ގޮތުގައި މިހާރުވެސް ހަރަކާތްތެރިވާ މީހުން އެއްގަމު ދަތުރުފަތުރުގެ ގާނޫނާއި ގަވާއިދުތަކަށް އިތުރަށް އަހުލުވެރިކުރުވުމަށް ކުރިއަށްގެންދާ ޕްރޮގްރާމެއް ކަމަށެވެ.

މި ޕްރޮގްރާމުގައި، އެއްގަމު ދަތުރުފަތުރުގެ ގާނޫނާއި ގަވާއިދުތަކާ ގުޅޭގޮތުން ވަނީ ޓެކްސީ ޑްރައިވަރުންނަށް މައުލޫމާތު ދީފައިވެއެވެ. އަދި އެކްސިޑެންޓުތަކާއި މަގުމަތީގައި ދިމާވާ އެކި މައްސަލަތައް ހައްލުކުރުމުގައި ޓެކްސީ ޑްރައިވަރުންގެ ދައުރާ ގުޅޭގޮތުންނާއި އެފަދަ ހާލަތުގައި ޑްރައިވަރުންގެ އަމަލުތައް ބަހައްޓަންވީގޮތާ ގުޅޭގޮތުން ވެސް މައުލޫމާތު ދީފައިވެއެވެ.

ފުލުހުން ބުނީ ފުރަތަމަ ޕްރޮގްރާމް ކުރިއަށް ގެންދިޔައީ މި ޖަނަވަރީ މަހުގެ 18 އިން 21 ވަނަ ދުވަހުގެ ނިޔަލަށް ކަމަށެވެ.  މި ޕްރޮގްރާމުގައި، ޓެކްސީގެ ހިދުމަތަށް އަލަށް ނުކުންނަ 172 ޑްރައިވަރުންނާއި މިހާރުވެސް ޓެކްސީގެ ހިދުމަތުގައި ހަރަކާތްތެރިވާ 75 ޑްރައިވަރުންނަށް ބައިވެރިވިއެވެ.

ޓެކްސީ ޑްރައިވަރުންނާ ގުޅޭގޮތުން މީސް މީޑިއާގައި ޝަކުވާތައް ވަރަށް ގިނައިން ހުންނައިރު، އެންމެބޮޑަށް ފާހަގަކުރެވޭ އެއް މައްސަލައަކީ ދަތުރުތަކަށް ކަނޑައެޅިފައިވާ އަގަށްވުރެ ބޮޑު އަގުނަގާ މައްސަލައެވެ. މީގެ އިތުރުން ދަތުރެއް ކުރަމުންދާއިރު، ކަސްޓަމަރު ކައިރީ ނާހައި އިތުރު ދަތުރެއް ނަގައި މީހުން އެރުވުމުގެ މައްސަލަތައްވެސް ޖެހެއެވެ. މީގެ އިތުރުން ކަސްޓަމަރުންނާ އަދަބު އިހުތިރާމް ކުދަވާނޭހެން މުއާމަލާތްކުރާ މައްސަލަވެސް ބައެއް ޑްރައިވަރުންގެ ފަރާތުން ފެންމަތިވެފައި އެބަހުއްޓެވެ.