ފާއިތުވި ރަމަޟާން މަހުގެ ރޯދަތައް ޤަޟާ ނުކުރެވި ހުރި ނަމަ، އެ ރޯދަތައް ޤަޟާކުރަން އަވަސްވެގަތުމަށް ހުކުރު ޚުތުބާގައި ގޮވާލައިފިއެވެ. 

"ޝަޢުބާން މަހު ކުރެވޭ ހެޔޮ ޢަމަލު" މި މައުޟޫޢުގެ މައްޗަށް ބިނާކޮށް މިއަދު އިއްވި ޚުތުބާގައި ބުނީ، މިހާރު އަހަރެމެން ގުނަމުންދާ ޝަޢުބާން މަހަކީ ރަމަޟާން މަހަށް މަރުޙަބާ ކިޔުމަށްޓަކައި ތައްޔާރުވާން އޮތް ޚާއްޞަ މަހެއް ކަމަށެވެ. އެގޮތުން، ރޯދައާ ގުޅޭ ދީނީ ޙުކުމްތައް އުނގެނުމަށާއި، މި މަހު ސުންނަތް ރޯދަ ހިފައި، ހެޔޮ ޢަމަލުތައް ގިނަކޮށް އަޅުކަމުގައި ހީވާގިވުމަށް ޚުތުބާގައި ބާރުއަޅާފައިވެއެވެ.

ކީރިތި ރަސޫލާ ﷺ ގެ ސުންނަތަށް އަލިއަޅުވާލަމުން ޚުތުބާގައި ބަޔާންކުރީ، ޝަޢުބާން މަހަކީ މީސްތަކުން އެ މަހަކާ މެދު ޣާފިލުވެފައިވާ މަހެއް ކަމަށާއި، ނަމަވެސް އެއީ ޢާލަމްތަކުގެ ވެރި ރަސްކަލާނގެ ޙަޟުރަތަށް އަޅުތަކުންގެ ޢަމަލުތައް އުފުއްލެވޭ މަސް ކަމަށެވެ. އެހެންކަމުން، ރޯދައަށް ހުރެ ޢަމަލުތައް އުފުއްލެވުމަށް އެކަލޭގެފާނު ލޯބިކުރެއްވި ކަމަށް ޙަދީޘްފުޅުތަކުން އެނގެން އޮތްކަން ޚުތުބާގައި ހަނދާންކޮށްދިނެވެ.

ޚުތުބާގައި އިތުރަށް ބުނީ، ހެޔޮ ޢަމަލު ކުރުމުގައި ދެމިހުރުމަކީ މުހިންމު ކަމެއް ކަމަށާއި، މާތް اللهގެ ޙަޟުރަތުގައި އެންމެ ލޮބުވެތިކަން ބޮޑު ޢަމަލަކީ ކިތަންމެ މަދުން ނަމަވެސް އެ ކަމެއް ކުރުމުގައި ދެމިހުންނަ ޢަމަލު ކަމަށެވެ.

ޝަޢުބާން މަހުގެ މުހިންމު ކަންކަމަށް ބަލާއިރު، މި މަހަކީ މުސްލިމުންގެ ޤިބުލަ އަލްމަސްޖިދުލްއަޤްޞާއިން ކަޢުބަތުﷲ ގެފުޅަށް ބަދަލުވި މަސް ކަމަށް ގިނަ ޢިލްމުވެރިން ވިދާޅުވާކަން ޚުތުބާގައި ފާހަގަކުރިއެވެ. އަދި ޝަޢުބާން މަހުގެ ފަނަރަވިލޭރޭގެ މަތިވެރިކަމާ ބެހޭގޮތުން ވާހަކަދައްކަމުން، އެ ރޭ މާތް الله މުއުމިނުންގެ ފާފަ ފުއްސަވައިދެއްވާނެ ކަމަށާއި، ނަމަވެސް އެ ރެއަށް ޚާއްޞަ ވަކި ނަމާދެއް ނުވަތަ ދުޢާއެއް އޮތްކަން ޞައްޙަ ސަނަދުން ސާބިތުނުވާ ކަމަށްވެސް ބުންޏެވެ.

ރަމަޟާން މަހަށް ތައްޔާރުވުމުގެ ގޮތުން ކުރަންޖެހޭ މުހިންމު ކަންތައްތަކެއްވެސް މިއަދުގެ ޚުތުބާގައި ވަނީ ހިއްސާކޮށްފައެވެ:

ރޯދައިގެ ޙުކުމްތައް އުނގެނުން: ރޯދަ ގެއްލޭ ކަންތައްތަކާއި، ޤަޟާކުރުމާއި ފިދުޔައިގެ ޙުކުމްތައް އަމިއްލައަށާއި އަނބިދަރިންނަށް ދަސްކޮށްދިނުން.

ޤަޟާ ރޯދަ ފުރިހަމަކުރުން: ވޭތުވެދިޔަ އަހަރުތަކުގައި ނުހިފި ހުރި ފަރުޟު ރޯދަތައް މި މަސް ނިމުމުގެ ކުރިން ހިފައި ނިންމުން.

އިސްރާފު ކުޑަކުރުން: ރަމަޟާން މަހަކީ އިސްރާފުކުރާ މަހަކަށް ނުހަދައި، ދީލަތިކަމާއެކު ޞަދަޤާތްކުރުމަށް ނިޔަތްގަތުން.

ވިޔަފާރިވެރިންގެ ދައުރު: ވިޔަފާރިވެރިން އަގުތައް ހެޔޮކޮށް ދީލަތިވުމަކީ ބޮޑުވެގެންވާ ޘަވާބު ލިބޭނެ ކަމެއް ކަމުގައި ބުނުން.

އަޚްލާޤު ރީތިކުރުން: ދުލާއި ގުނަވަންތައް ފާފަތަކުން ރައްކާތެރިކޮށް، ޒުވާބުކުރުމާއި ހުތުރު ބަސްތަކުން ދުރުހެލިވުން.

ނިންމާލަމުން ޚުތުބާގައި ބުނީ، ރަމަޟާން މަހަކީ ކީރިތި ޤުރުއާނުގެ މަސް ކަމަށްވާތީ، ޤުރުއާން ކިޔެވުމާއި ދީނީ ދަރުސްތައް އަޑުއެހުމަށް ޚާއްޞަ ސަމާލުކަމެއް ދީގެން، މުޅި ރަމަޟާން މަހުގެ ބޭނުން އެންމެ ހެޔޮގޮތުގައި ހިފުމަށް އަޒުމް ކަނޑައަޅަންޖެހޭ ކަމަށެވެ.