އުމްރާއަށް ގޮސް އުޅެނިކޮށް ހާލު ދެރަވެ ހދ. ވައިކަރަދޫ، ސާނިޔާ، މުޙައްމަދު ހަސަން މިއަދު ވަނީ ނިޔާވެފަ އެވެ.

އުމުރުން 86 އަހަރުގެ މުޙައްމަދު ހަސަން، އުމްރާގެ އަޅުކަމަށް ދިޔައީ މި ޖަނަވަރީ މަހު ގިބްލަ ގުރޫޕްގެ ހަވާލުގަ އެވެ. އާއިލާއާ ދަރީންނާއެކު ކުރި މި ދަތުރު މުޙައްމަދު ހަސަނަށް ހުރިހާ ގޮތަކުން ވެސް ހާއްސަ އެވެ.

އެއީ އުމުރުގެ އެ ހިސާބުގައި އާައިލާއާއެކު އެފަދަ މާތް ދަތުރެއްގައި ދެވޭތީ އެވެ. ނަމަވެސް މިއީ ހަޔާތުގައި ކުރާނެ އެންމެ ފަހު ދަތުރަށް ވެދާނެ ކަމަށް މުޙައްމަދު ހަސަނަށް އިހްސާސް ވި އެވެ. އެ ވާހަކަ އާއިލާގެ ބައެއް މީހުންނާއި ވެސް ހިއްސާކުރި އެވެ.

އުމުރުން ދުވަސްވެފައި ވުމުގެ ސަބަބުން މުޙައްމަދު ހަސަންއަށް އުމްރާގެ އަޅުކަން އަދާކުރުން ފަސޭހަ ކަމަކަަށް ނުވި އެވެ. ނަމަވެސް އެ އަޅުކަމަށް އޮތް ބޮޑު ލޯތްބާއެކު ދަތިކަން ހިތަށްވީ ފަސޭހަ ކަމަކަށެވެ.

ވަރަށް ހިތްވަރާ ޝައުގާއެކު ދެ އުމްރާ ފުރިހަމަ ކުރި އެވެ. ހާލު ދެރަވީ އޭގެ ފަހުންނެވެ.

މި ޖަނަވަރީ ޢުމްރާ ދަތުރުގައި ޤިބްލައާއެކު ޢުމްރާގެ އަޅުކަން ފުރިހަމަ ކުރި އުމުރުން 86 އަހަރުގެ މި ބޭބެ މިއަދު މައްކާގައި ވަނީ ނިޔާވެފަ. މި ބޭބެއަކީ މި ދަތުރުގައި އަޅުގަނޑާއެކު އެއް ބަހެއްގައި ދަތުރުތައް ކުރި ބޭބެއެއް. އެ އުމުރުގައި ވަރަށް ހިއްވަރާއެކު ދެ ޢުމްރާ ފުރިހަމަ ކުރި. އަލްޙަމްދުالله

ބޭބެގެ މި ދަތުރަކީ ފަހަރުގައި ޙަޔާތުގައި ކުރާ އެންމެ ފަހު ދަތުރަށް ވެގެން ގޮސްދާނެ

ކަމަށް ފުރުމުގެ ކުރިން ބުނި ކަމަށް މައްކާގައި ތިބި އާޢިލާގެ މީހުން ކިޔާދިން.

ހާލު ދެރަވެ މައްކާގެ ނޫރު ހޮސްޕިޓަލްގަައި އެޑްމިޓް ކުރި އެވެ. ފަހުން އޮތީ ވެންޓިލޭޓަރުގަ އެވެ. މިއަދު ނިޔާވީ ވެސް ވެންޓިލޭޓަރުގައި ފަރުވާ ދެމުން ދަނިކޮށެވެ.

މަރްހޫމްގެ ހަށިގަނޑު ކަށުނަމާދަށް ގެނެސްފައި

މުޙައްމަދު ހަސަން ނިޔާވުމަކީ އޭނާގެ ކުދީންނާއި މުޅި އާއިލާއަށް ލިބުނު ފުން ހިތާމަ އެކެވެ. ނަމަވެސް އެންމެ ފަހު ވަގުތު އެންމެ މާތް ބިމުގައި އުމްރާގެ އަޅުކަމުގައި ހޭދަ ކުރެވިފައި ވުމަކީ އާއިލާއަށް ލިބޭ ހިތްހަމަޖެހުމެވެ.

މުޙައްމަދު ހަސަންގެ މައްޗަށް މިއަދުގެ މަޣްރިބް ނަމާދަށް ފަހު މަސްޖިދުލް ޙަރަމްގައި ވަނީ ކަށުނަމާދު ކޮށްފަ އެވެ. މަސްޖިދުލް ޙަރަމް އަކީ މި ބިންމަތީގައިވާ އެންމެ މާތް ބިނާ އެވެ.