އެމެރިކާގެ މިނިއާޕޮލިސް ސިޓީގައި އެގައުމަށް ހިޖުރަކޮށްގެން ދިރިއުޅޭ މީހުންނާ ދެކޮޅަށް ހިންގަމުންދާ ހާއްސަ އޮޕަރޭޝަނެއްގެ ތެރެއިން، ފެޑަރަލް އެޖެންޓުން އެމެރިކާގެ ރައްޔިތެއް ބަޑިޖަހައި މަރާލައިފިއެވެ.

މިކަމާ ގުޅިގެން އެ ސިޓީގައި ބޮޑެތި އިހުތިޖާޖުތަކެއް ފަށައި، ރައީސް ޑޮނަލްޑް ޓްރަމްޕް އެ ސިޓީއަށް ފޮނުއްވާފައިވާ ހަތިޔާރު އެޅި އޮފިސަރުން ވަގުތުން ބޭރުކުރުމަށް ގޮވާލާ އަޑުތައް ވަނީ ގަދަވެފައެވެ.

މިނިއާޕޮލިސްގެ ޕޮލިސް ޗީފް ބްރަޔަން އޯހާރާ ބުނި ގޮތުގައި، ހޮނިހިރު ދުވަހު ފެޑަރަލް އެޖެންޓުން ދިން ބަޑީގެ ހަމަލާތަކުގައި މަރުވެފައިވަނީ އުމުރުން 37 އަހަރުގެ އެލެކްސް ޕްރެޓީއެވެ. އޭނާއަކީ އެ ސިޓީގެ އައިސީޔޫ ނަރުހެއްގެ ގޮތުގައި މަސައްކަތްކުރަމުންދިޔަ އެމެރިކާގެ ރައްޔިތެކެވެ.

މި ހާދިސާ ހިނގާފައިވަނީ ޓްރަމްޕްގެ ސަރުކާރުން ހިޖުރަވެރިންނާ ދެކޮޅަށް ފަށާފައިވާ "އެންޓި-އިމިގްރޭޝަން" ކެމްޕޭނުގެ ދަށުން މިނިއާޕޮލިސްގައި ފެޑަރަލް އެޖެންޓުން ހަރަކާތްތެރިވަމުންދާ ދަނޑިވަޅެއްގައެވެ.

މީގެ ކުރިން ޖެނުއަރީ 7 ވަނަ ދުވަހުވެސް އައިސް (ICE) އޮފިސަރަކު ވަނީ ބަޑިޖަހައި އަންހެނަކު މަރާލާފައެވެ. އަދި މިދިޔަ ހަފުތާގައި ވެނެޒުއޭލާގެ ރައްޔިތަކަށްވެސް ވަނީ ބަޑީގެ ހަމަލާދީފައެވެ.

މި ހާދިސާއާ ގުޅިގެން މިންސޫޓާގެ ގަވަރުނަރު ޓިމް ވޯލްޒް ބުނީ، މިއީ މިހާރު ހިޖުރަވެރިންގެ މައްސަލައެއް ނޫން ކަމަށާއި، މިއީ އެ ސްޓޭޓްގެ ރައްޔިތުންނާ ދެކޮޅަށް ރޭވުންތެރިކަމާއެކު ހިންގާ ލާއިންސާނީ އަމަލުތަކެއް ކަމަށެވެ. ނަމަވެސް ޑިޕާޓްމަންޓް އޮފް ހޯމްލޭންޑް ސެކިއުރިޓީން ބުނެފައިވަނީ އެޖެންޓުން ބަޑިޖެހީ ހަތިޔާރާއެކު ހުރި މީހަކު އެމީހުންނަށް ހަމަލާދޭން އުޅުމުން ދިފާއުގައި ކަމަށެވެ.

މި މައްސަލައިގައި ރައީސް ޓްރަމްޕް ވަނީ ސޯޝަލް މީޑިއާ މެދުވެރިކޮށް ގަވަރުނަރާއި މިނިއާޕޮލިސްގެ މޭޔަރަށް ވަރަށް ބޮޑަށް ފާޑުކިޔާފައެވެ. ޓްރަމްޕް ތުހުމަތު ކުރި ގޮތުގައި އެ ސިޓީގެ ފުލުހުންނަށް އައިސް އޮފިސަރުން ހިމާޔަތްކުރުމުގެ ފުރުސަތު ނުދީ، ވެރިން ދަނީ ބަޣާވާތަކަށް ހިތްވަރު ދެމުންނެވެ.

އާންމުވެފައިވާ ވީޑިއޯތަކުން ފެންނަ ގޮތުގައި، އެލެކްސް ޕްރެޓީ މަގުމަތީގައި ހުރެ ފޯނުން ވީޑިއޯ ކުރަނިކޮށް އެޖެންޓުން އޭނާއަށް ޕެޕަރ ސްޕްރޭ ޖަހައި، ބިމަށް ވައްޓާލައި އަނިޔާކުރެއެވެ. އަދި އޭނާ ބިމުގައި އޮއްވައި އެތައް ފަހަރަކު ބަޑިޖަހާ މަންޒަރު ފެނެއެވެ. ތަހުގީގީ އިދާރާއެއް ކަމަށްވާ ބެލިންގްކެޓުން ބުނާ ގޮތުގައި، ފުރަތަމަ ބަޑިޖެހުމުގެ ކުރިންވެސް އޭނާގެ އަތުގައި އޮތް ފިސްތޯލަ އެޖެންޓުން ވަނީ އަތުލާފައެވެ.

މިނިއާޕޮލިސްގެ މޭޔަރު ޖޭކޮބް ފްރޭ ބުނީ، މާސްކު އަޅައިގެން ތިބި އެޖެންޓުން އާންމު ރައްޔިތަކަށް އަނިޔާކޮށް މަރާލާ މަންޒަރު ފެނުމަކީ ބަލައިގަނެވޭނެ ކަމެއް ނޫން ކަމަށެވެ. އަދި ސިޔާސީ މަގުސަދެއް ހާސިލުކުރުމަށް އެމެރިކާގެ ރައްޔިތުންގެ ފުރާނަ ގުރުބާން ނުކުރުމަށް އޭނާ ޓްރަމްޕަށް ގޮވާލިއެވެ.

މި ހާދިސާއާ ގުޅިގެން އެ ސިޓީގެ މަސްލަހަތު ވަނީ ވަރަށް ބޮޑަށް ގޯސްވެފައެވެ. އެތައް ސަތޭކަ ބަޔަކު މަގުތަކަށް ނުކުމެ އިހުތިޖާޖު ކުރަމުންދާއިރު، ފެޑަރަލް އެޖެންޓުން ދަނީ ކަރުނަގޭސް ބޭނުންކުރަމުންނެވެ.