ހުޅުމާލެ ފޭސް 2 ގައި އިމާރާތްކޮށްފައިވާ ހިޔާ ފްލެޓްތަކުގެ ތެރެއިން 8 ވަނަ ޓަވަރުގައި އިތުރަށް ހަރުކުރި ލިފްޓުތަކުގެ މަސައްކަތް އެއްކޮށް ނިންމައި، އާންމުންނަށް ހުޅުވާލާފައިވާ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.

މިއީ ހިޔާގެ 16 ޓަވަރުގައި އިތުރު 32 ސްޓްރެޗަރ ލިފްޓު ހަރުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުގެ ދަށުން ކުރިއަށްދާ މަޝްރޫއެކެވެ. މި މަޝްރޫއުގެ ދަށުން ކޮންމެ ޓަވަރެއްގައި ދެ ލިފްޓު ހަރުކުރުމަށް ވަނީ ހަމަޖެހިފައެވެ.

އެޗްޑީސީން އާންމުކޮށްފައިވާ އެންމެ ފަހުގެ މަޢުލޫމާތުތަކަށް ބަލާއިރު (25 ޖެނުއަރީ 2026 ގެ ނިޔަލަށް)، ހިޔާގެ H1، H2، H3، H4، H5، H6، H7 އަދި H8 ޓަވަރުގެ ލިފްޓްގެ މަސައްކަތްތައް ވަނީ އެއްކޮށް ނިންމައި، އާންމުން ބޭނުންކުރުމަށް ވަނީ ހުޅުވާލާފައެވެ. މީގެ އިތުރުން H1 އިން ފެށިގެން H13 އާ ހަމައަށް ހުރި ޓަވަރުތަކުގެ ލިފްޓުތައް ހަރުކޮށް، ޓެސްޓު ކުރުމުގެ މަސައްކަތްތައް ވެސް ވަނީ ފައިނަލް ކުރެވިފައެވެ.

މީގެ އިތުރުން އެޗްޑީސީން ބުނެފައިވާގޮތުން، މުޅި މަޝްރޫއުގެ 89 އިންސައްތަ މަސައްކަތް މިހާރު ވަނީ ނިމިފައެވެ. އެގޮތުން ޑިޒައިން ކުރުމާއި، ސިވިލް މަސައްކަތްތަކާއި، ސްޓްރަކްޗަރަލް މަސައްކަތްތައް މިހާރު ވަނީ 100 އިންސައްތަ ނިމިފައެވެ. އަދި ލިފްޓު ހަރުކުރުމުގެ 86 އިންސައްތަ މަސައްކަތް ނިމިފައިވާއިރު، ކްލެޑިންގް އަދި ފިނިޝިންގް މަސައްކަތްތަކުގެ 62 އިންސައްތަ ވަނީ ނިމިފައެވެ.

މި މަޝްރޫއުގެ ދަށުން ކުރަންޖެހޭ އެންމެހައި ސްޓީލް އެރެކްޝަން މަސައްކަތްތައް 16 ޓަވަރުގައި ވެސް މިހާރު ނިމިފައިވާއިރު މަސައްކަތަށް ބޭނުންވާ ހުރިހާ ތަކެތި މިހާރު ސައިޓަށް ލިބިފައިވާ ކަމަށް އެޗްޑީސީން މައުލޫމާތުދެއެވެ.

މިހާރު ކުރިއަށްދާ މަސައްކަތްތަކަށް ބަލާއިރު، H14، H15 އަދި H16 ޓަވަރުގައި ލިފްޓު ހަރުކުރުމުގެ މަސައްކަތް ކުރިއަށްދާއިރު H9، H10، H11 އަދި H12 ގައި ކްލެޑިންގް އާއި ފްރޭމް ހަރުކުރުމުގެ މަސައްކަތް ކުރިއަށްދާއިރު، H11 އަދި H12 ގެ ފްރޭމް ފެބްރިކޭޝަން މަސައްކަތް ވެސް ކުރަމުންދާ ކަމަށް ބުނެފައިވެއެވެ. މީގެ އިތުރުން H16 ގައި ފްލޯ ކަނެކްޝަން ނުވަތަ ޕްލެޓްފޯމްގެ މަސައްކަތްތައް ކުރިއަށްދާ ކަމަށް ބުންޏެވެ.