އިނގިރޭސި ޕްރިމިއާ ލީގް ތާވަލްގެ އެއްވަނާގައި އޮވެ ފަރަގު ބޮޑުކުރުމަށް ލިބުނު ފުރުސަތު އާސެނަލުން ރޭ ނަގާލައިފިއެވެ.

ލީގްގައި ރޭ އާސެނަލް އާ އެންމެ ވާދަވެރި މެންޗެސްޓަރ ޔުނައިޓެޑް ބައްދަލުކުރިމެޗުން އާސެނަލް ބަލިވީ 3-2 ގެ ނަތީޖާއަކުންނެވެ. މެޗްގެ ކުރީކޮޅު އާސެނަލުން ވަނީ ލީޑް ނަާފައެވެ. އެއީ މެންޗެސްޓަރ ޔުނައިޓެޑްގެ ލިސަންދްރޯ މާޓިނޭޒް އަތުން ބައިކޮޅަށްވަތް ގޯލުންނެވެ. އާސެނަލްގެ ލަނޑަށްފަހު ޔުނައިޓެޑުން ވަނީ އޭގެ 7 މިނެޓްފަހުން ލަނޑެއް ޖަހައި މެޗްގެ ނަތީޖާއެއްވަރުކޮށްފައެވެ. މި ލަނޑު ޖަހައިދިނީ ބްރަޔަން އެމްބޫމޫ އެވެ.

މައިކަލް ކެރިކްގެ އިރުޝާދުގެ ދަށުން ކުޅެމުންދިޔަ މެންޗެސްޓަރ ޔުނައިޓެޑުން ފުރަތަމަ ފަހަރަށް ލީޑް ނަގާފައިވަނީ، 50 ވަނަ މިނެޓް ތެރޭގައި ޕެޓްރިކް ޑޯރޫ ޖަހައިދިން ލަނޑުންނެވެ. އޭގެފަހުން 84 ވަނަ މިނެޓް ތެރޭގައި އާސެނަލްގެ މިކެލް މެރީނޯ ވަނީ ލަނޑެއް ޖަހައި މެޗްގެ ނަތީޖާ 2-2 އަށް ބަދަލުކޮށްފައެވެ. މެޗްގައި ޔުނައިޓެޑް މޮޅުކޮށްދިން މުހިންމު ލަނޑު ޖަހައިދިނީ، 87 ވަނަ މިނެޓް ތެރޭގައި މެތިއު ކުންޔާއެވެ. 

ރޭގެ މެޗަކީ ކެރިކްގެ އިރުޝާދުގެ ދަށުން ޔުނައިޓެޑް މޮޅުވި ދެވަނަ މެޗެވެ. މެޗަށްފަހު ސްކައި ސްޕޯޓްސް އާ ވާހަކަދައްކަމުން އާސެނަލްގެ ކެޕްޓަން މާޓިން އޮޑެގާޑު ބުނީ ލީގްގެ މިހާހިސާބުން ގެއްލުނީ މުހިންމު މެޗެއް ކަމަށާއި، އަމިއްލަ ދަނޑުގައި ރޭ ނިކުތް ނަތީޖާ ރަނގަޅުނޫންކަމަށެވެ. އޮޑެގާޑު ބުނީ ފުރަތަމަ ހާފްގައި ޓީމުން ރަނގަޅުކުޅުމެއް ދެއްކިނަމަވެސް ފަހުހާފް އާސެނަލްއަށް ނުކުޅެވުނުކަމަށެވެ. ކުރިއަށް ހުރި މެޗްތަކުގައި އާސެނަލްގެ ކުޅުންތެރިން އެކަތިގަނޑަކަށް ވެގެން މަސައްކަތް ކުރާނޭކަން ފާހަގަކުރަމުން އޮޑެގާޑު ބުނީ ކުރީގެ ފެންވަރު ފެންނާނޭކަމަށެވެ.

ރޭގެ މެޗަށްފަހު ޕްރިމިއާ ލީގް ތާވަލް މިހާރު އޮތްގޮތަށް ބަލާއިރު، 4 ޕޮއިންޓްގެ ލީޑަކާއެކު ތާވަލްގެ އެއްވަނާގައި އަދިވެސް އޮތީ އާސެނަލެވެ.

ޕްރިމިއާ ލީގް ތާވަލް

ޕްރިމިއާ ލީގްގައި ރޭ ޗެލްސީއާ ކްރިސްޓަލް ޕެލަސް ބައްދަލުކުރިމެޗް 3-1 ގެ ނަތީޖާއަކުން ޗެލްސީ ކާމިޔާބުކުރިއިރު، ނިއުކާސަލް ޔުނައިޓެޑާ، އެސްޓަންވިލާ ބައްދަލުކުރިމެޗް 0-2 ގެ ނަތީޖާއަކުން ކާމިޔާބުކުރީ އެސްޓަންވިލާއެވެ.