ޔަމާލްގެ ހިތްގައިމު ލަނދާއެކު ރޭ ރެއާލް އޮވިއޭޑޯ އަތުން ބާސެލޯނާ މޮޅުވެއްޖެއެވެ.

ބާސެލޯނާގެ ދަނޑުގައި ކުޅުނު މިމެޗް އޮވިއޭޑޯގެ މައްޗަށް އެޓީމް ކުރި ހޯދީ 3-0 ގެ ނަތީޖާއަކުންނެވެ. ފޯރިގަދަ ކުޅުމެއް ފެނިެގެންދިޔަ މިމެޗްގައި ފެނިގެންދިޔަ ހުރިހާ ގޯލެއްވެސް ޖަހާފައިވަނީ ފަހުހާފްގައެވެ.

ބާސެލޯނާއަށް ގޯލް ހުޅުވާލަދިނީ 52 ވަނަ މިނެޓް ގައި އޮލްމޯއެވެ. ބާސާގެ ދެވަނަ ލަނޑު ރަފީނިއާއެވެ. މެޗްގައި ފެނިގެންދިޔަ، އަދި މި ސީޒަނުގައި މިހާތަނަށް ފެނުނު އެންމެ ހިތްގައިމުލަނޑު ޔަމާލް ޖަހާފައިވަނީ 73 ވަނަ މިނެޓް ތެރޭގައެވެ. މިއީ މި ސީޒަނުގައި ލީގްގައި ފެނިގެންދިޔަ އޭނާގެ 8 ވަނަ ލަނޑެވެ. މި ލަނޑު ޖަހާފައިވަނީ ބައިސިކަލް ކިކަކުންނެވެ. 

ރޭގެ މެޗްގައި މޮޅަށްކުޅެ ގިނަ ހަމަލާތައް އުފައްދާފައިވަނީ ބާސެލޯނާއިންނެވެ. މެޗްގައި އޮވިއޭޑޯއަށް ލަނޑެއް ނުޖެހުނު ނަމަވެސް އެޓީމުން ވަނީ ބާސެލޯނާގެ ގޯލަށް އަމާޒުކޮށް ނުރައްކާތެރި ގިނަ ހަމަލާތަކެއް ފޮނުވާލާފައެވެ.

ސްޕެނިޝް ލީގްގައި ރޭ ކުޅުނު މެޗަށްފަހު ތާވަލްގެ ދެވަނާގައި އުޅޭ ރެއާލް މެޑްރިޑަށްވުރެ އެއްޕޮއިންޓްގެ ފަރަގަކާއެކު އެއްވަނާގައި ބާސެލޯނާ އޮތީ 52 ޕޮއިންޓާއެކުގައެވެ.

ސްޕެނިޗް ލީގް ތާވަލް

ލީގްގައި ރޭ ރެއާލް މެޑްރިޑާ ވިޔަރެއާލް ބައްދަލުކުރިމެޗް 2-0 ގެ ނަތީޖާއަކުން ކާމިޔާބުކުރީ ރެއާލް މެޑްރިޑެވެ. މެޗްގައި ފެނިގެންދިޔަ ރެއާލްގެ ދެ ލަނޑުވެސް ކާމިޔާބުކޮށްދިނީ އެމްބާޕޭ އެވެ. ރޭގެ މެޗްގައި އެމްބާޕޭ ޖެހި ދެ ލަނޑާއެކު މި ސީޒަނުގައި އޭނާ ޖެހި ލަނޑުގެ އަދަދު ވަނީ 21 ހަށް އަރާފައެވެ. ސްޕެއިން ލީގްގެ އެންމެ ގިނަ ލަނޑު މި ސީޒަނުގައި ޖަހާފައި ވަނީ އެމްބާޕޭއެވެ.