ފިލިޕީންސްގެ ދެކުނުގެ ބެސިލަން ޕްރޮވިންސްގެ ކަނޑުގެ ސަރަހައްދަށް ދިޔުމަށް 350 އަށްވުރެ ގިނަ މީހުންނާއެކު ދަތުރުކުރި ފެރީއެއް މިއަދު ފަތިހުގެ ވަގުތެއްގައި އަޑިއަށް ގޮސް 15 މީހުން މަރުވެއްޖެއެވެ.

"އެމް.ވީ ޓްރިޝާ ކާސްޓިން 3" ނަމަކަށް ކިޔާ މި ފެރީ ދަތުރުކުރަމުން ދިޔައީ ޒަމްބޮއަންގާ ސިޓީން ސުލޫ ޕްރޮވިންސްގެ ޖޯލޯ އައިލެންޑަށެވެ. ދެކުނު ފިލިޕީންސްގެ ބަލުކް-ބަލުކް ރަށާ ގާތްގަނޑަކަށް ފަސް ކިލޯމީޓަރު ދުރުން ފެރީ އަޑިއަށް ދާންފަށާފައިވަނީ ރޭ ދަންވަރުގެ ވަގުތެއްގައެވެ. މިއާއެކު އެ ފެރީއިން ވަނީ އެހީއަށް ވެސް އެދިފައެވެ.

ކަމާބެހޭ ފަރާތްތަކުން ހާމަކުރި ގޮތުގައި، މި އުޅަނދުގައި 332 ފަސިންޖަރުންނާއި 27 ފަޅުވެރިން ތިއްބެވެ. 

ފިލިޕީންސްގެ ކޯސްޓްގާޑުން ބުނި ގޮތުގައި، ކޯސްޓްގާޑާއި ނޭވީ އަދި އެއާފޯސްގެ އިތުރުން އެ ސަރަހައްދުގައި ހަރަކާތްތެރިވި މަސްވެރި އުޅަނދުފަހަރުގެ އެހީތެރިކަމާއެކު 300 އަށްވުރެ ގިނަ މީހުން ވަނީ ސަލާމަތްކުރެވިފައެވެ. ސަލާމަތްވި މީހުން އިޒަބެލާ ސިޓީއާއި ޒަމްބޮއަންގާގެ ބަނދަރުތަކަށް ގެންގޮސްފައިވާއިރު، އޭގެ ތެރެއިން ގިނަ ބަޔަކަށް ދަނީ ލިބުނު އަނިޔާތަކަށާއި ފިނީގެ ސަބަބުން ދިމާވި ސިއްހީ މައްސަލަތަކަށް ފަރުވާ ދެމުންނެވެ.

ކަމާބެހޭ ފަރާތްތަކުން ކަށަވަރުކޮށްދިން ގޮތުގައި، މި ހާދިސާގައި ކުޑަކުއްޖަކާއެކު ޖުމްލަ 15 މީހުން ވަނީ މަރުވެފައެވެ. އަދިވެސް 28 ވަރަކަށް މީހުންގެ ޚަބަރެއް ނުވެއެވެ. މި މީހުން ހޯދުމުގެ މަސައްކަތަށް ދަތިތަކެއް ކުރިމަތިވި ނަމަވެސް، އޮޕަރޭޝަން މެދުނުކެނޑި ކުރިއަށްދާ ކަމަށާއި، މަރުވި މީހުންގެ އަދަދު އިތުރުވުން އެކަށީގެންވާ ކަމަށް އޮފިޝަލުން ވިދާޅުވިއެވެ.

ފެރީ އަޑިއަށް ދާން ދިމާވި ސަބަބު އަދި ކަށަވަރު ނުވި ނަމަވެސް، ރިޕޯޓްތަކުން އެނގޭ ގޮތުގައި އުޅަނދަށް ދިމާވީ ޓެކްނިކަލް މައްސަލައެކެވެ. މި ހާދިސާ ހިނގި ވަގުތު މޫސުން ގޯސް ނޫން ކަމަށާއި، އުޅަނދުގައި މީހުން ގިނަވެ ބަރުވެފައި ނުވާ ކަމަށްވެސް އޮފިޝަލުން ފާހަގަކުރެއްވިއެވެ. އަދި މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ކަމާބެހޭ އިދާރާތަކުން މިހާރު ވަނީ ރަސްމީ ތަހުގީގެއް ފަށާފައެވެ.

7000 އަށް ވުރެ ގިނަ ރަށްތަކުގެ މައްޗަށް އެކުލެވޭ ފިލިޕީންސްގައި ކަނޑުދަތުރުފަތުރަކީ އާންމު ކަމަކަށް ވާއިރު، ފެރީތަކަށް ދިމާވާ މިފަދަ ހާދިސާތަކަކީ އެ ގައުމުގައި ތަކުރާރުވަމުންދާ ކަމެކެވެ. އުޅަނދުތައް ބާވުމާއި ސަލާމަތީ ފިޔަވަޅުތައް އެޅުމުގައި ހުރި އިހުމާލުތަކާ މެދު ކަމާބެހޭ ފަރާތްތަކުން އަބަދުވެސް އިންޒާރު ދެމުންދާއިރު، މި ހާދިސާގެ ތަހުގީގުގައި އެ ކަންކަމަށް ވަރަށް ބޮޑަށް ބަލާނެ ކަމަށް ބެލެވެއެވެ.