ޤައުމީ ފުޓްސަލް ޓީމުގެ ކާމިޔާބީ ފާހަގަކުރުމަށް މާދަމާ ރޭ ހަވާ އަރުވަނީ
ސާފް ފުޓްސަލް ޗެމްޕިއަންޝިޕްގައި ރާއްޖޭގެ ޤައުމީ ފިރިހެން ޓީމް ހޯދި ކާމިޔާބީ ފާހަގަކުރުމަށް މާދަމާ ރޭ ހަވާއެރުވުމަށް ނިންމައިފިއެވެ.
ކުޅިވަރާބެހޭ ވުޒާރާއިން ބުނީ ޤައުމީ ފުޓްސަލް ޓީމް ހޯދި ކާމިޔާބީ ފާހަގަކުރުމުގެ ގޮތުން މާދަމާ ރޭ މާލޭގައި ހަވާއެރުވުމާއެކު ކުލަގަދަ ހަރަކާތްތަކެއް ކުރިއަށްގެންދިއުމަށް ނިންމާފައިވާކަމަށެވެ. ހަވާއެރުވުމާއެކު ހެންވޭރު ހެދިގޮނޑުދޮށް ސަރަހައްދުގައި ބޮޑުބެރުގެ ހަރަކާތްވެސް ކުރިއަށްގެންދިއުމަށް ނިންމާފައިވާކަމަށް ވުޒާރާއިން ބުނެއެވެ.
ސަރުކާރުންވެސް ވަނީ ވީހާވެސް ގިނަބަޔަކު ޤައުމީޓީމަށް މަރުހަބާކިޔުމަށް އާޓިފިޝަލްބީޗް ސަރަހައްދަށް ދިއުމަށް އެދިފައެވެ. އެގޮތުން ޤައުމީޓީމާއެކު ފޮޓޯނެގުމާއި އެނޫންވެސް ކަންކަން ކުރިއަށްގެންދިއުމަށް ވަނީ ނިންމާފައެވެ.
ސާފް ފުޓްސަލް ޗެމްޕިއަންޝިޕް ރާއްޖެއިން ހޯދީ އެއްވެސް މެޗަކުން ބަލިނުވެ ގިނަ ގޯލްތަކެއް ޖަހައިގެންނެވެ. މިއީ މި މުބާރާތް ބޭއްވި ފުރަތަމަ ފަހަރެވެ. ރާއްޖެއިން މި މުބާރާތް ހޯދީ ކުޅިވަރުގެ އިންފްރާސްޓަކްޗަރ އެންމެ ވަރުގަދަ ޓީމްތަކުގެ ތެރޭގައި ހިމެނޭ އިންޑިއާވެސް ބޮޑު ތަފާތަކުން ބަލިކޮށްގެންނެވެ.
މުބާރާތުގައި ދިވެހި ޓީމުން ޗެމްޕިއަންކަން ހޯދިއިރު ރާއްޖޭގެ ކުޅުންތެރިން ފަރިތަކޮށްލާނެ އިންޑޯ ދަނޑެއްހާ ހިސާބުވެސް ރާއްޖޭގައި ނެތްކަން ފާހަގަކޮށްލެވެއވެެ.
Advertisement
This content is created and paid for by advertisers and does not involve Voice Journalists
