ލޯކަލް ކައުންސިލް އިންތިހާބުގައި އަމިއްލަ ގޮތުން ވާދަކުރާ ކެންޑިޑޭޓުން ހޯދަން ޖެހޭ 50 ސޮއި ހޯދުމުގައި އެ ސޮއިދޭ މީހާ އެ މީހާ އަމިއްލައަށް އީފާސް މެދުވެރިކޮށް ވެރިފައި ކުރަން ޖެހޭ ގޮތަށް ހަމަޖެއްސުމަކީ އެ ކެންޑިޑޭޓުންގެ އިންތިހާބީ ހައްގަށް އުނިކަން އަންނާނެ ކަމެއް ކަމުގައި ފާހަގަކޮށް ކަންބޮޑުވުން ފާޅުކޮށް ކުރީގެ ހޯމް މިނިސްޓަރު އުމަރު ނަސީރު އިލެކްޝަންސް ކޮމިޝަނަށް ސިޓީއެއް ފޮނުއްވައިފި އެވެ.

އެ ސިޓީގައި އުމަރު ވިދާޅުވި ގޮތުގައި އެކަން އިލެކްޝަންސް ކޮމިޝަނާއި އެ ކޮމިޝަންގެ ރައީސްގެ ސަމާލު ކަމަށް ގެންނަވަނީ އޭނާ އަކީ 2023 ވަނަ އަހަރުގެ ރިޔާސީ އިންތިހާބުގައި އަމިއްލަގޮތުން ވާދަކުރެއްވި އަދި 2028 ވަނަ އަހަރުގެ އިންތިހާބުގައި ވެސް އަމިއްލަ ގޮތުން ވާދަކުރެއްވުމަށް ގަސްތުކޮށްގެން ހުރި ކެންޑިޑޭޓަކަށް ވާތީ އެވެ.

އީފާސް ބޭނުންކޮށްގެން ހިދުމަތް ހޯދަން ދަންނަނީ ރާއްޖޭގެ އާބާދީގެ 10 އިންސައްތަ ކަމަށާ އަނެއް 90 އިންސައްތަ މީހުންނަކީ ދުވަހަކުވެސް އީފާސް ބޭނުން ނުކުރާ ނުވަތަ ބޭނުންކުރަން ނުދަންނަ މީހުން ކަމަށް އުމަރުގެ ސިޓީގައި ވިދާޅުވެފައިވެ އެވެ. އެހެން ކަމުން އެ 90 އިންސައްތަ މީހުންގެ ހައްގަށް އުނިކަން އަންނަ ކަމެއް ކަމުގައި ވިދާޅުވި އެވެ.

އުމަރު ވިދާޅުވީ މިފަދަ ހުރަހެއް ކުރިމަތި ކުރުވުމަކީ ގާނޫނަކުން ނޫނީ ކުރެވޭނެ ކަމެއް ނޫން ކަމަށެވެ. އަދި އިންތިހާބުތަކުގައި މީހުންނަށް ފަރިތަ އުސޫލުތަކަަށް އަމަލު ކުރުމަކީ މުހިންމު ކަމެއް ކަން ވެސް އުމަރު ފާހަގަ ކުރެއްވި އެވެ.

މައުލޫމާތު ލިބިފައިވާ ގޮތުން އިންތިހާބަށް އޮފިޝަލުން ހޯދުމުގައި އީފާސް މެދުވެރިކޮށް ނަން ހުށައަޅަން ޖެހުމުން އޮފިޝަލުން ލިބުމުގައި ވެސް ދަތިވިކަން އުމަރުގެ ސިޓީގައި ފާހަގަ ކުރެއްވި އެވެ.

އެހެން ކަމުން އެ އުސޫލު ބާތިލުކޮށްދޭން އުމަރު ވަނީ އެދިވަޑައިގެންފަ އެވެ.