އިސްލާމްދީނަށާއި ދިވެހި ޤައުމަށް ލޯބިކުރާ، އުޅުމާއި ސުލޫކު ރަނގަޅު ހަރުދަނާ ޖީލެއް ބިނާކުރުމަށް ތަޢުލީމާއި ތަރުބިއްޔަތަށް ޚާއްޞަ އަހައްމިއްޔަތުކަމެއް ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްތިމާސްކުރައްވައިފިއެވެ.

ދިރާސީ އައު އަހަރުގެ މިއަދު ފެށުމާއި ގުޅިގެން ރައީސުލްޖުމްހޫރިއްޔާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ޤައުމަށް ބޭނުންވަނީ އިސްލާމްދީނާއި ޤައުމިއްޔަތަށް ލޯބިކުރާ، ހީވާގި ދަރީންތަކެއް ކަމަށެވެ.

އަދި އެފަދަ ދަރީންތަކެއް ބިނާކުރެވޭނީ ތަޢުލީމީ ނިޒާމުގެ ތެރެއިން ތަރުބިއްޔަތަށް ބޮޑު އިސްކަމެއް ދީގެން ކަމަށް އެމަނިކުފާނު ފާހަގަކުރެއްވިއެވެ.

ރައީސް މުޢިއްޒު ވަނީ ތަޢުލީމީ ދާއިރާގައި މަސައްކަތްކުރައްވާ ހިންގުންތެރިންނާއި، މުދައްރިސުންނާއި، ބެލެނިވެރިންގެ އިތުރުން ހުރިހާ ދަރިވަރުންނަށް އައު އަހަރުގެ ތަހުނިޔާ އާއި ކާމިޔާބީއަށް އެދިވަޑައިގަންނަވާފައެވެ.

އެމަނިކުފާނު ވިދާޅުވި ގޮތުގައި، ތަޢުލީމު އުނގެނުމާއި އުނގަންނައިދިނުމަކީ ދީނީ ގޮތުންނާއި ޤައުމީ ގޮތުން އުފުލަންޖެހޭ ވަރަށް ބޮޑު ޒިންމާއެކެވެ.

"ދިވެހީން އެދޭ ފާގަތި ކުރިމަގު މި ޤައުމަށް ހޯދައިދެވޭނީ މި ޒިންމާ އަދާކުރުމުގައި އަޅުގަނޑުމެން އެންމެން އެއްބާރުލައި އިޚްލާޞްތެރިވީ މިންވަރަކުން،" ރައީސްގެ މެސެޖުގައި ވިދާޅުވެފައިވެއެވެ.

މީގެ އިތުރުން، ރާއްޖޭގެ ތަޢުލީމީ ނިޒާމު އިތުރަށް ހަރުދަނާކޮށް ކުރިއެރުވުމަށާއި، ހެޔޮލަފާ، ތޫނުފިލި، އަދި އުޅުން ރީތި ދަރިވަރުންތަކެއް ތަރުބިއްޔަތު ކުރުމުގެ ހެޔޮ ތައުފީޤު ދެއްވުން އެދި އެމަނިކުފާނު ދުޢާ ކުރެއްވިއެވެ.

ރާއްޖޭގެ ސްކޫލްތަކުގައި މިއަދު ދިރާސީ އައު އަހަރުގެ ކިޔެވުން ފަށާފައިވާއިރު،  ސަރުކާރުގެ 218 އެއްހާ ސްކޫލްގައި 77000އަށްވުރެ ގިނަ ދަރިވަރުން ތަޢުލީމް ހާސިލްކުރަމުން ދާނެއެވެ.

އެޑިޔުކޭޝަން މިނިސްޓްރީން ބުނެފައިވާގޮތުން މިއަހަރު ގްރޭޑް 1 އަށް ވަނުމަށްޓަކައި 4790 ދަރިވަރުންނަށް އެކި ސްކޫލްތަކުން ޖާގަ ދީފައިވެއެވެ. އޭގެ ތެރޭގައި މާލެ ސަރަހައްދުގެ ސްކޫލްތަކުގެ ގްރޭޑް 1 އަށް 1748 ދަރިވަރުން ވައްދާފައިވެއެވެ. އަދި އަތޮޅުތެރޭގެ ސްކޫލްތަކުންވެސް ގްރޭޑް 1 އަށް 3042 ދަރިވަރަކަށް ވަނީ ޖާގަ ދީފައެވެ.