އެއްމަސް ދުވަހުގެ ބޮޑު ޗުއްޓީއަކަށްފަހު ދިރާސީ އައު އަހަރުގެ ކިޔެވުން މިއަދު ފަށައިފިއެވެ. 

މިއަހަރުގެ ކިޔެވުން ފަށާފައިމިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާއި އެއްގޮތަށް، ޖަނަވަރީ މަހުގައެވެ. މީގެ ކުރިން ކޮވިޑާއި ގުޅިގެން ގެނައި ބަދަލާއެކު ދިރާސީ އަހަރުގެ ކިޔެވުން ފަށަމުން އައީ އަހަރުގެ މެދު ތެރެއިންނެވެ. 

ދިރާސީ އާ އަހަރުގެ ކިޔެވުން މިއަދު ފެށިއިރު ސަރުކާރުގެ 218 އެއްހާ ސްކޫލުގައި 77،000 އަށްވުރެ ގިނަ ދަރިވަރުން ތައުލީމު ހާސިލުކުރާނެ އެވެ.

މީގެ ތެރޭގައި ގްރޭޑް 1 ގައި ކިޔަވާ 4،700 އަށްވުރެ ގިނަ ދަރިވަރުން ހިމެނެއެވެ. އެއީ މާލެ ސަރަހައްދުގެ ސްކޫލްތަކުގެ ގްރޭޑް 1 އަށް ވެއްދި 1748 ދަރިވަރުންނާއި އަތޮޅުތެރޭގެ ސްކޫލްތަކުގެ ގްރޭޑް 1 އަށް ވެއްދި 3042 ދަރިވަރުންނެވެ. 

މީގެ އިތުރުން އަތޮޅުތަކުން މި އަހަރު މާލެއަށް 1،530 ދަރިވަރުން ވަނީ ބަދަލުވެފަ އެވެ. މާލެއިން ހުޅުމާލޭގެ ސްކޫލްތަކަށް 836 ދަރިވަރުންވެސް ވަނީ ބަދަލުވެފައެވެ.

ސަރުކާރު ސްކޫލުތަކުގައި 10،500 މުދައްރިސުން ކިޔަވައިދޭއިރު މީގެ ތެރޭގައި ހިމެނެނީ ދިވެހި 8،000 މުދައްރިސުންނާއި 2،500 ބިދޭސީ މުދައްރިސުންނެވެ.

މިއަދު ފެށުނު ދިރާސީ އަހަރުގެ ކިޔެވުން ނިމޭނީ މިއަހަރުގެ ޑިސެމްބަރު މަހުގެ 17 ވަނަ ދުވަހު އެވެ.