ފިލިޕީންސްގައި އިއްޔެ ފެރީއެއް ބަނޑުން ޖަހާލާ، ހިނގި ހާދިސާގެ ތެރެއިން މަރުވި މީހުންގެ އަދަދު 18 އަށް އަރައިފިކަމަށް އެގަުމުން ރިޕޯޓުކޮށްފިއެވެ. 

"އެމް.ވީ. ޓްރިޝާ ކާސްޓިން 3" ނަމަކަށް ކިޔާ ފަސިންޖަރުންނާއި މުދާ އުފުލާ މި ފެރީ ބަންޑުން ޖަހާލާފައިވަނީ އިއްޔެގެ ފަތިހުގެ ވަގުތެއްގައެވެ. މި ފެރީ ދަތުރުކުރަމުންދިޔައީ 332 ފަސިންޖަރުންނާއި 27 ފަޅުވެރިންނާއެކު، ޒަމްބޮއަންގާ ސިޓީން ސުލޫ ޕްރޮވިންސްގެ ޖޯލޯ އައިލެންޑަށޭވެ. 

ރިޕޯޓުތަކުން ބުނާ ގޮތުގައި މި ފެރީން އެހީއަށް އެދި ސިގްނަލް ފޮނުވާފައިވަނީ އެ ޤައުމުގެ ގަޑިން ފަތިހު 1:50 ހާއިރުއެވެ. އަދި ކަމާބެހޭ ފަރާތްތަކުން މަޢުލޫމާތު ދޭ ގޮތުގައި މި އުޅަނދު ބަންޑުން ޖަހާލާފައިވަނީ ބަލޫކް-ބަލޫކް ރަށާ ދެތިން މޭލު ބޭރުންނެވެ.

މި ހާދިސާގައި މީހުން ސަލާމަތްކުރުމުގެ މަސައްކަތުގައި ކޯސްޓްގާޑުގެ އުޅަނދުތަކާއި، ނޭވީ ޕެޓްރޯލް ބޯޓުތަކާއި، އަސްކަރީ މަތިންދާބޯޓުތަކުގެ އިތުރުން ކައިރީގައި ހުރި މަސްވެރި ދޯނިފަހަރުވެސް ބައިވެރިވަމުންދާކަމަށް އެގައުމުގެ ސަލާމަތީ ބާރުތަކުން މައުލޫމާތުދެއެވެ. އެގޮތުން، މިހާތަނަށް 310 އަށްވުރެ ގިނަ މީހުން ސަލާމަތްކުރެވިފައިވާއިރު، އަނިޔާވި މީހުންނަށް އިސަބެލާ ސިޓީގެ ހޮސްޕިޓަލްތަކުގައި ފަރުވާ ދެމުންދާކަމަށް މައުލޫމާތު ލިބެއެވެ.

މި ހާދިސާއިން ސަލާމަތްވި ބައެއް މީހުން ބުނި ގޮތުގައި، ކުއްލިއަކަށް ފެރީއަރިއަޅާލުމަށްފަހު، ވަރަށް އަވަހަށް ފެރީގެ ތެރެއަށް ފެން ވަދެ، ބަންޑުން ޖަހާލީއެވެ. މިކަމުގެ ސަބަބުން ގިނަ ބަޔަކު އެއްފަހަރާ ކަނޑަށް ވެއްޓުނު ކަމަށް އެމީހުން ކިޔައިދިނެވެ. ބައެއް ރިޕޯޓުތަކުގައި ކަނޑުގަދަ ކަމަށް ބުނި ނަމަވެސް، މޫސުމާ ބެހޭ އިދާރާތަކުން ބުނެފައިވަނީ ދަތުރު ފެށި އިރު މޫސުން އާންމު ގޮތެއްގައި ރަނގަޅު ކަމަށެވެ.

ސަރުކާރުގެ އޮފިޝަލުން ކަށަވަރުކޮށްދިން ގޮތުގައި، އެ ފެރީ ދަތުރުކޮށްފައިވަނީ ހުއްދަ ދެވިފައިވާ ފަސިންޖަރުންގެ އަދަދަށްވުރެ އިތުރުނުވާ ގޮތަށެވެ. އެހެންކަމުން، މި ހާދިސާ ހިނގަން މެދުވެރިވި އަސްލު ސަބަބު ދެނެގަތުމަށްޓަކައި ކަމާބެހޭ ފަރާތްތަކުން މިހާރު ވަނީ ރަސްމީ ތަޙުޤީޤެއް ފަށާފައެވެ.

ފިލިޕީންސްއަކީ ގިނަ ރަށްތަކެއްގެ މައްޗަށް އެކުލެވޭ ޖަޒީރާ ޤައުމަކަށްވުމުން، އެއް ރަށުން އަނެއް ރަށަށް ދަތުރުކުރުމަށް ފެރީގެ ޚިދުމަތަކީ ވަރަށް މުހިންމު ވަސީލަތެކެވެ. އެހެންނަމަވެސް، ބޯޓުފަހަރު ބާވުމާއި، ކުއްލިއަކަށް މޫސުން ގޯސްވުމުގެ ސަބަބުން މިފަދަ ނުރައްކާތެރި ހާދިސާތައް އެ ޤައުމުގައި ދޭތެރެއަކުން ހިނގައެވެ. އެހެންކަމުން، ސަރުކާރާއި މުޖުތަމަޢުގެ އިސްވެރިން ވަނީ ހާދިސާގައި ގެއްލުން ލިބުނު ފަރާތްތަކަށާއި މަރުވި މީހުންގެ ޢާއިލާތަކަށް ބޭނުންވާ ކާބޯތަކެއްޗާއި، ބޭސްފަރުވާ އަދި ނަފްސާނީ އެހީތެރިކަން ފޯރުކޮށްދޭނެ ކަމަށް ވިދާޅުވެފައެވެ.