ރާއްޖެއާއި އިންޑިޔާ ރައްޔިތުންގެ މަންފާއަށްޓަކައި އެކުގައި ކުރާ މަސައްކަތް ކުރިއަށްގެންދާވާނެ ކަމުގައި އިންޑިޔާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
މޯދީ މިހެން ވިދާޅުވީ، އިންޑިޔާގެ 77 ވަނަ ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ތަހުނިޔާގެ މެސެޖަށް، ޝުކުރު އަދާކުރައްވައި ކުރެއްވި ޕޯސްޓުގައެވެ.
އެގޮތުން 'އެކްސް' ގައި މޯދީ މިއަދު ކުރެއްވި ޕޯސްޓެއްގައި ވިދާޅުވީ، ރާއްޖެއާއި އިންޑިޔާގެ ރައްޔިތުންގެ މަންފާއަށްޓަކައި ދެ ގައުމުން ގުޅިގެން ކުރަމުންދާ މަސައްކަތްތައް ކުރިއަށް އޮތް ތަނުގައިވެސް ކުރިއަށްގެންދަވާނެ ކަމަށެވެ.
އަދި ރައީސް މުޢިއްޒު ފޮނުއްވި ހޫނު ތަހުނިޔާއާއި ހެޔޮއެދުންތައް އިޙްތިރާމާއެކު ބަލައިގަންނަވާކަން ފާހަގަކުރައްވައި، އެމަނިކުފާނު ވަނީ ހުރިހާ ދިވެހި ރައްޔިތުންނަށް އުފާވެރި ފާގަތި ދުވަސްތަކަކަށް އެދިވަޑައިގެންފައެވެ.
އިންޑިޔާގެ ޖުމްހޫރީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި މެސެޖުގައި، އިންޑިޔާގެ ރައީސް ދުރޫޕަދީ މުރުމޫއަށާއި ބޮޑުވަޒީރު މޯދީގެ އިތުރުން އެ ގައުމުގެ ރައްޔިތުންނަށް ވަނީ ދުވަހުގެ ހެޔޮއެދުންތައް ފޮނުއްވާފައެވެ.
ރައީސް ވިދާޅުވީ، މި ދުވަހަކީ މިނިވަންކަމާއި، ޑިމޮކްރަސީ އަދި ހެޔޮވެރިކަމުގެ އުސޫލުތައް ނެގެހެއްޓުމަށް އިންޑިޔާގެ ރައްޔިތުން ވެފައިވާ ވަރުގަދަ އަޒުމް ރަމްޒުކޮށްދޭ ދުވަހެއް ކަމަށެވެ.
މީގެ އިތުރުން، ރާއްޖެއާއި އިންޑިޔާއާ ދެމެދު އޮތް ބަދަހި ގުޅުމުގެ ސަބަބުން ދެ ގައުމުގެ ރައްޔިތުންގެ ލާބަޔާއި މަންފާއަށް ބޮޑެތި ކުރިއެރުންތަކެއް ލިބިފައިވާކަން ރައީސް ފާހަގަކުރެއްވިއެވެ. އަދި ކުރިއަށް އޮތް ތަނުގައިވެސް އެ ގުޅުން އިތުރަށް ވަރުގަދަކުރުމަށް އެކުގައި މަސައްކަތް ކުރެއްވުމަށް އެދިވަޑައިގަންނަވާކަމަށް ރައީސް މުޢިއްޒު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
