އެސްއެސްސީ އިމްތިހާނުގެ މާއްދާއެއްގެ ޤޮތުގައި ޤުރުއާން ހިމެނުމަށް އެޑިއުކޭޝަން މިނިސްޓްރީއިން ނިންމައިފިއެވެ.
މިކަން ހާމަކުރައްވާފައިވަނީ މިއަދު ދިރާސީ އައު އަހަރުގެ ކިޔެވުން ފެށުމާ ގުޅިގެން ތަޢުލީމީ ވަޒީރު ޑރ. އިސްމާޢީލް ޝަފީޢު ދެއްވި ޚިޠާބުގައެވެ. ވަޒީރު ވިދާޅުވީ މިކަމުގެ މަގުސަދަކީ ކީރިތި ޤުރުއާނުގެ ޢިލްމަށް ދަރިވަރުންގެ ހިތްތަކުގައި ލޯބިޖައްސުވައި، ޤުރުއާނުގެ ޢިލްމަށް ދަރިވަރުން ޝައުޤުވެރިކުރުވުން ކަމަށެވެ.
އެހެންކަމުން، 2027 ވަނަ އަހަރުގެ ސާނަވީ އިމްތިހާނުގައި ޤުރުއާން މާއްދާ ރަސްމީކޮށް ހިމަނާ ރާއްޖޭގެ ދަރިވަރުންނަށް އެ އިމްތިހާނު ދިނުމަށް ހަމަޖެހިފައިވާކަމަށް ވެސް ވަޒީރު ވިދާޅުވިއެވެ.
މިފެށުނު ދިރާސީ އަހަރު، އެންމެ ބޮޑު އިސްކަމެއް ދޭނީ ދަރިވަރުންގެ ކިބައިގައި ރިވެތި އަޚުލާޤު އަށަގެންނެވުމަށް ކަމަށާއި، ރާއްޖޭގެ ސްކޫލު މަދަރުސާތަކުގައި ތަޢުލީމު ހާސިލުކުރަމުންދާ ކޮންމެ ދަރިވަރަކީވެސް، ރިވެތި އާދަތަކާއި ސިފަތަކުން ޖަރީވެފައިވާ، އެކަކު އަނެކަކަށް އިހުތިރާމް ކުރާ ދަރިވަރުން ތަކަކަށް ހެދުމަށް، ތަރުބަވީ ހާއްސަ ޕްރޮގްރާމެއް، މިދިރާސީއަހަރުގެ ތެރޭގައި ފަށައިގެން ކުރިއަށް ގެންދާނެކަމަށްވެސް ވަޒީރު ވިދާޅުވިއެވެ.
ކޮންމެ ދަރިވަރަކީ އަމިއްލަ އުނގެނުމަށް ޒިންމާވާ ދަރިވަރަކަށް ވުމަށް ނަސޭހަތްތެރިވެ އިސްލާމް ދީނަށް ލޯބިކުރާ، މައިން ބަފައިންނަށް ކިޔަމަންތެރިވާ، އެކަކު އަނެކަކަށް އިހްތިރާމްކުރާ، އުނގެނުމަށް ލިބިފައިވާ ރަނުގެ ފުރުސަތުގެ ބޭނުން އެންމެ ހެޔޮގޮތުގައި ހިފުމަށް ވަޒީރު ވަނީ ނަސޭޙަތްތެރިވެސް ވެފައެވެ.
ވަޒީރު އިތުރަށް ވިދާޅުވީ ދިވެހިރާއްޖޭގެ ރަސްމީ ތަޢުލީމީ ނިޒާމަށް އިންގިލާބީ ހެޔޮ ބަދަލުތަކެއް ގެނައުމުގެ ބޮޑެތި މަސައްކަތްތަކެއް މިއަހަރުގެ ތެރޭގައިވެސް، ކުރިއަށް ގެންދިޔުމަށް ރާވާފައިވާކަމަށެވެ.
Advertisement
This content is created and paid for by advertisers and does not involve Voice Journalists
