ރާއްޖޭގެ ޝަރުއީ ދާއިރާގެ މާލީ މިނިވަންކަން ކަށަވަރުކޮށް، އަދުލު އިންސާފުގެ ނިޒާމު ހަރުދަނާކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަސައްވަރާ އެއްގޮތަށް، 'ޝަރުޢީ ދާއިރާގެ ގުޅުންހުރި މާލީ ކަންކަމުގައި ޢަމަލުކުރާނެ ގޮތުގެ އުސޫލު' މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިން މިއަދު ޝާއިއުކޮށްފިއެވެ.

މި އުސޫލަކީ ޝަރުޢީ ދާއިރާއަށް ދައުލަތުގެ ބަޖެޓުން ކަނޑައަޅާ ފައިސާ ރޭވުމާއި، ދޫކުރުމާއި، ބެލެހެއްޓުމުގެ އިތުރުން ރިޕޯޓްކުރުމަށްޓަކައި ޚާއްޞަ އޮނިގަނޑެއް އެކަށައެޅުމުގެ މަޤްޞަދުގައި އެކުލަވާލާފައިވާ އުސޫލެކެވެ. ދައުލަތުގެ މާލިއްޔަތު ޤާނޫނާއި ގަވާއިދުގެ ދަށުން އެކުލަވާލާފައިވާ މި އުސޫލުގެ ސަބަބުން، ދައުލަތުގެ މާލީ ނިޒާމުގެ ތެރޭގައި އެއް މިންގަނޑުތަކެއް ހިފެހެއްޓުމާއެކު، ޝަރުޢީ ދާއިރާގެ މަސައްކަތްތަކަށް ބޭނުންވާ ޚާއްޞަ އިންތިޒާމުތަކަށް މަގުފަހިވެގެންދާނެ ކަމަށް މާލީ ވުޒާރާއިން ބުނެއެވެ. 

މި އުސޫލުގައި ހިމަނާފައިވާ ކަންކަމުގެ ތެރޭގައި؛ 

އަލަށް އެކުލަވާލި އުސޫލުގައިވާ ގޮތުން، ކޮންމެ އަހަރަކު ވެސް ރައްޔިތުންގެ މަޖިލީހުން ފާސްކުރާ ދައުލަތުގެ ބަޖެޓުގައި ޝަރުޢީ ދާއިރާއަށް ބޭނުންވާ ފައިސާ ހިމަނަންޖެހެއެވެ. އަދި ކޮންމެ އަހަރެއް ފެށުމުގައި، ދައުލަތަށް ލިބޭނެކަމަށް އަންދާޒާކުރާ އާމްދަނީގެ މަދުވެގެން %2 ޝަރުޢީ ދާއިރާއަށް ކަނޑައަޅަންވާނެއެވެ. މި މިންވަރު ހިސާބުކުރުމުގައި ވަކި ކަމަކަށް ޚާއްޞަކޮށްފައިވާ އާމްދަނީއާއި އަލަށް ތަޢާރަފުކުރާ އާމްދަނީގެ ފިޔަވަޅުތަކުން ލިބޭ ފައިސާއެއް ނުހިމެނެއެވެ.

ޝަރުޢީ ދާއިރާއަށް ދެވޭ 'ޖުޑީޝަރީ ސެކްޓޯރަލް ގްރާންޓް' އެހީ ބެލެހެއްޓުމަށް ހަމަޖެހިފައިވަނީ މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) ގައި ހުޅުވާފައިވާ ޚާއްޞަ އެކައުންޓެއް މެދުވެރިކޮށެވެ. މި އެކައުންޓުން ކުރެވޭ ހުރިހާ މުޢާމަލާތްތަކެއް ހިންގަންވާނީ ދައުލަތުގެ ޕަބްލިކް އެކައުންޓިންގ ސިސްޓަމް މެދުވެރިކޮށް، މާލިއްޔަތު ގަވާއިދާ އެއްގޮތަށެވެ. މީގެ ސަބަބުން މާލީ ކަންކަން ކޮންޓްރޯލްކުރުމާއި، ދައުލަތުގެ މައި ހިސާބުތަކާ އަޅާކިޔުން ފަސޭހަވެގެންދާނެއެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީ.ޖޭ.އޭ) އިން ކޮންމެ އަހަރެއްގެ ސެޕްޓެމްބަރު 30 ގެ ކުރިން ބަޖެޓް ތައްޔާރުކޮށް މާލީ ވުޒާރާއަށް ހުށަހަޅަންޖެހެއެވެ. ބަޖެޓު ތަންފީޒުކުރުމުގެ ޒިންމާ މާލީ ޒިންމާދާރު ވެރިޔާ އުފުލަންޖެހޭއިރު، ކަނޑައެޅިފައިވާ ބަޖެޓުން ބޭރުން ޚަރަދެއް ކުރަންޖެހިއްޖެނަމަ ސަޕްލިމެންޓްރީ ބަޖެޓެއް ފާސްކުރަންޖެހެއެވެ.

މުވައްޒަފުންގެ މުސާރައާއި އިނާޔަތްތައް ދިނުމުގައި ޕޭ ކޮމިޝަންގެ މިންގަނޑުތަކަށާއި، ދައުލަތުގެ މުސާރައިގެ ސިޔާސަތުގެ ޤާނޫނަށް ޢަމަލުކުރަންޖެހެއެވެ. އަދި ކުއްޔާއި ބިލްތައް ފަދަ ކޮންމެހެން ކުރަންޖެހޭ ޚަރަދުތަކަށް ފައިސާ ހުރިކަން ކަށަވަރުނުކޮށް، އިތުރު ޚަރަދުތަކަކަށް ޒިންމާވެގެން ނުވާނެ ކަމަށްވެސް އުސޫލުގައި ބަޔާންކޮށްފައިވެއެވެ.

ދެފުށް ފެންނަ ނިޒާމެއްމާލީ ކަންކަން ދެފުށް ފެންނަ ގޮތަށް ކުރިއަށް ގެންދިއުމަށްޓަކައި، ކޮންމެ މަހަކު ކުރެވޭ ޚަރަދުތަކުގެ ތަފުސީލު އެ މަސް ނިމުމުގެ ކުރިން އާންމުކުރަންޖެހެއެވެ. އަދި ޚަރަދުގެ ރިޕޯޓު ޖެހިގެން އަންނަ މަހުގެ 15 ގެ ކުރިން މާލީ ވުޒާރާއަށް ހުށަހަޅަންޖެހެއެވެ.